قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي سەرىكباي وراز اقتوبە وبلىسىن ارالادى. ايماقتاعى "حيدجاب داۋىنا" قاتىستى ءمۇفتي "اتا-انا ۇرپاعىن ءبىلىم الۋدان شەكتەمەۋى ءتيىس" دەپ سانايدى. بۇل تۋرالى Qamshy.kz اقپارات اگەنتتىگى ازاتتىقتىڭ دەرەگىنە سۇيەنە وتىرىپ جازادى.
- ءباليعات جاسىنا جەتپەگەن قىز بالالاردىڭ، ءتىپتى 7-8 جاستاعى قىز بالالاردى ياعني، جاس بالانىڭ تاعدىرىن تالكەككە، ساۋداعا سالۋ - جاڭساق دۇنيە. اللا پارىز ەتكەن، بۇيىرعان ءساتى كەلمەگەنگە دەيىن بالاعا ءوز كوزقاراسىن تاڭۋ دۇرىس ەمەس. مەن باس ءمۇفتي رەتىندە ازاماتتاردى تۇسىنىستىكپەن قارىم-قاتىناس جاساۋعا شاقىرامىن. ءبىلىم بەرۋ وشاقتارىنىڭ تالاپ-تىلەكتەرىن دە جاقسى بىلەمىز. ءبىز ۇرپاعىمىزدى ءبىلىم الۋدان شەكتەمەۋىمىز كەرەك، – دەدى قازاقستان مۇسىلماندارى ءدىني باسقارماسىنىڭ ءتوراعاسى سەرىكباي وراز.
باس ءمۇفتي اقتوبە وبلىسىندا 26 قىركۇيەككە دەيىن العا، مۇعالجار اۋداندارىن ارالاپ شىقپاق. ءتىلشىنىڭ "مەكتەپ فورماسىنا بايلانىستى بالالارىن ساباققا جىبەرمەي وتىرعان اتا-انالارىمەن كەزدەسەسىز بە؟" دەگەن ساۋالىنا ءمۇفتي: "بالكىم، كەزدەسەرمىن" دەپ جاۋاپ بەردى.
ءقازىر اقتوبە وبلىسىندا "مەكتەپ فورماسى تالابىن ساقتاماعاندىقتان" ساباققا قاتىسا الماي وتىرعان 34 وقۋشى قىز بار. اقتوبە وبلىستىق ءدىن ىستەرى دەپارتامەنتىنىڭ دەرەگىنشە، ولاردىڭ كوبى - باستاۋىش سىنىپ وقۋشىلارى.
ەلدەگى "ءدىني احۋالى ەڭ كۇردەلى ايماق" سانالاتىن اقتوبە وبلىسىندا سوڭعى جىلدارى بيلىك "تەرىس ءدىني اعىمداردىڭ" ىقپالىن ازايتۋعا، ءدىني ەكسترەميزم مەن تەررورزيمنىڭ الدىن الۋعا باعىتتالعان ءتۇرلى شارالارعا باسا ءمان بەرە باستاعان. قازاقستان بيلىگى ءدىني راديكاليزمنىڭ تاراۋىنان ساقتانۋ شارالارى رەتىندە "ءداستۇرلى ءدىني قۇندىلىقتاردى" بەلسەندى تۇردە ناسيحاتتايدى. كەيبىر بيلىك وكىلدەرى وقۋشى قىزداردىڭ حيدجاب تاعۋىن "جات ءدىني اعىمداردىڭ اسەرى" دەپ قاۋىپتەنەدى.
