ادامعا ءتۇرلى سىناقتار بەرىلەتىنى بەلگىلى. وزىڭىزگە عانا ارنالعان ومىرلىك سىناقتى جەڭىپ شىعۋ دا، مويىماي، العا قاراي ۇمتىلۋ دا وزىڭىزگە تىكەلەي بايلانىستى. ون ەكى مۇشەمىز ساۋ بولسا دا ايتەۋىر ءبىر نارسەگە كوڭىلىمىز تولماي، ءوزىمىزدى، كەيدە وزگەلەردى جازعىرىپ، ءجيى دەپرەسسياعا ءتۇسىپ جاتامىز. ال مۇمكىندىگى شەكتەۋلى... جو-جوق،  مۇمكىندىگى شەكسىز جاندار بارىن باعالاي المايتىن جاندارعا ومىرگە دەگەن قۇشتارلىقتىڭ ارتۋىنا سەبەپشى بولىپ جاتادى. قۋانىش باشاروۆ سونداي ەرەكشە جانداردىڭ ءبىرى. وعان "سەن ءانشى بولا المايسىڭ"، دەپ ايتقاندار كوپ بولعان، الايدا ول ماقساتىنىڭ ايقىن ەكەنىن سەزىپ، ەڭ باستىسى  قارىم قابىلەتىنىنە سەنىپ، قازىرگى قازاقتىڭ تويىندا ءان شىرقاپ، ءوز ونەرىمەن حالىقتى تاڭداي قاقتىرىپ ءجۇر. Qamshy.kz اقپارات اگەنتتىگىنىڭ ءتىلشىسى جۇمىس بارىسىمەن الماتىعا كەلگەن قۋانىش باشاروۆپەن كەزدەسىپ، سۇقبات الدى. 

— قازىرگى تاڭدا نەمەن اينالىسىپ ءجۇرسىز؟ شىعارماشىلىعىڭىزدا قانداي جاڭالىقتار بار؟

— جاقىن ارادا بەينەبايان ءتۇسىرۋدى جوسپارلاپ وتىرمىز. مەنىڭ تانىلۋىما سەبەپكەر بولعان «جالعىز جاپىراق» انىنە بەينەبايان تۇسىرەمىز. ال ءقازىر تويدىڭ قامىمەن ءجۇرمىز. مەن كوبىنەسە شىمكەنت قالاسىنىڭ تۇرعىندارى تويعا شاقىرادى.

— ءوزىڭىز جايلى ايتقان كەزدە كوپشە تۇردە سويلەيسىز. تويعا شىققاندا، كوشەدە سەرۋەندەگەندە جالعىز جۇرەسىز بە؟ الدە ۇنەمى قاسىڭىزدان تابىلاتىن جاندار بار ما؟

— جوق، جالعىز جۇرمەيمىن. مەن قىدىرعان كەزدە دە، تويعا شىققاندا دا باۋىرلارىم قاسىمنان تابىلادى. 

— تويدان العان قاراجاتىڭىزدى قايىرىمدىلىققا جۇمسايتىنىڭىزدى ەستىدىم. قايىرىمدىلىقپەن اينالىسۋىڭىزعا نە سەبەپ بولدى؟

— مەن بالا كەزىمدە اقشا جەتىسپەۋشىلىگىنىڭ سەبەبىنەن ەمدەلە الماي قالدىم. قاراجات جاعىنان كوپتەگەن ماسەلەلەر تۋىنداعان بولاتىن. سول كەزدە وز-وزىمە ۋادە بەرگەن ەدىم. ەگەر تانىمال ءانشى بولىپ كەتسەم، قايىرىمدىلىق جاسايمىن، ءوزىم سەكىلدى جاندارعا قول ۇشىن سوزامىن دەپ وزىمە سەرت بەردىم. ەڭ ءبىرىنشى، ءانشى بولۋدى، سودان كەيىن قايىرىمدىلىق جاساۋدى ارماندادىم. كەيىن تويدان تۇسكەن قاراجاتتاردى مۇقتاج جاندارعا بەرە باستادىم. سوڭعى رەت جاز مەزگىلىندە قايىرىمدىلىق شاراسىن جاسادىم. قىزىلوردا وبلىسى جاڭاقورعان اۋدانىنى قوجاكەنت دەگەن اۋىلدا جەتىمدەر ۇيىندە قايىرىمدىلىق كونسەرتىن بەردىم.

— قايىرىمدىلىق جاسار الدىندا نەگە كوپ ءمان بەرەسىز؟ كىمدەرگە قايىرىمدىلىق جاسايسىز؟

— كەز كەلگەن مۇقتاج جانعا قولدان كەلگەنشە كومەگىمدى تيگىزەمىن. مىسالى مەن بىردە جولدان ءبىر قارت ايەلدى كوردىم. اياعى جوق ەكەن. ونىمەن سويلەسىپ، بالالارىنىڭ، نەمەرەلەرىنىڭ كومەك كورسەتپەيتىنىن ءبىلدىم. ونىڭ اياعىنا پروتەز الۋ كەرەك بولدى. سوعان قارجىلاي كومەك كورسەتتىم. 

— ەڭ العاش ورىنداعان ءانىڭىز "جالعىز جاپىراق" بولدى. شىعارماشىلىق جولىن نە سەبەپتى «جالعىز جاپىراق» انىەن باستادىڭىز؟

— بۇل ءاندى ايتۋىما العاشقى ماحابباتىم سەبەپكەر بولدى دەسەم دە بولادى. ايدا ەسىمدى شىمكەنتتىك قىزدى جاقسى كوردىم، ول دا مەنى جاقسى كوردى. ول شىمكەنت قالاسىنىڭ مىرزاكەنت اۋىلىنان ەدى. ءبىز ەكەۋمىز الەۋمەتتىك جەلى ارقىلى تانىسقانبىز. كەيىن اڭگىمەمىز جاراسىپ، شىمكەنتكە تويعا بارعان كەزدە ايدامەن كەزدەسىپ ءجۇردىم. ءجيى كەزدەسىپ، ءجيى سەرۋەندەيتىن ەدىك. ەكەۋمىز 2 جىلداي قىز بەن جىگىت رەتىندە جۇردىك. الايدا ايدا اتا-اناسىنىڭ ايتقانىنان شىعا المايتىن قىز بولاتىن. ونىڭ اتا-اناسى ءبىزدىڭ ارالاسۋىمىزعا قارسى بولاتىنىن بىلگەن سوڭ ارا قاتىناسىمىزدى توقتاتۋعا بەل بۋدىق. ءبىراق ايدا ءبىزدىڭ قىز بەن جىگىت بولىپ جۇرگەنىمىزدى اتا-اناسىنا ايتپادى. سەبەبى ولاردىڭ قارسى بولاتىنىنا سەنىمدى ەتىن. مەن دە ونى قيناعىم كەلمەدى. ءسويتىپ ەكەۋمىزدىڭ جولىمىز ەكىگە ايىرىلدى.

— ال العاشقى ماحاببات حيكاياسىنان كەيىن عاشىق بولا الدىڭىز با؟

— جوق، عاشىق بولا المادىم. «جالعىز جاپىراق» ءانىن ايتقان سايىن ايدا ەسىمە تۇسەتىنىن جاسىرا المايمىن. ءبىراق وسى اننەن ءوزىم ءلاززات الامىن.

— بولاشاق جارىڭىزدى قالاي ەلەستەتەسىز؟

— ءوزىمنىڭ انامداي بولۋى كەرەك. مەنىڭ انام قاراپايىم، مىنەزى وتە جايلى ادام. يماندى دا، يبالى قىزدى جولىقتىرىپ، وزىمە جار ەتسەم دەپ ارماندايمىن.

— ال قازىرگى ۋاقىتتا ۇيلەنبەي جۇرگەنىڭىزگە العاشقى ماحابباتىڭىزدىڭ اسەرى بار ما؟

— شىنىمدى ايتسام، ءيا. العاشقى ماحابباتىمدى ۇمىتا الماي ءجۇرمىن.

— "جالعىز جاپىراق" ءانىن سىزدەن بولەك تانىمال ءانشى ءابدىجاپپار ءالقوجا دا ايتىپ ءجۇر. ءابدىجاپپار ءالقوجانىڭ تاراپىنان دۋەت بولىپ ءان ايتۋعا ۇسىنىس تۇسكەن جوق پا؟

—  ءبىز ەكەۋمىز جاڭاقورعانداعى تويدا وسى ءاندى بىرگە ايتقانبىز. حالىققا ۇناعان. ءبىراق ءابدىجاپپاردىڭ تاراپىنان ماعان ۇسىنىس ايتىلمادى. مەنىڭ اعام دا "بۇل ءاندى جالعىز ءوزىڭ ورىنداعانىڭ دۇرىس بولادى"،  -دەگەن. ءبىراق ءابدىجاپپار ءالقوجا ماعان حابارلاسىپ، حال-جاعدايىمدى سۇراپ تۇرادى. 

— قازىرگى قازاق ەستراداسىنا كوڭىلىڭىز تولا ما؟

— ەندى ءارقالاي. سەبەبى بارلىعىن بىردەي داتتاپ، بارلىعىن بىردەي ماقتاي المايسىڭ. قازىرگى ەسترادادا جۇرگەن كەي انشىلەردى كورىپ «اتتەڭ» دەيسىڭ، كەي انشىلەردى كورىپ سۇيسىنەسىڭ. قازاق ەستراداسىنداعى «Ninety one» توبىن جەك كورەمىن. سەبەبى ولاردىڭ ستيلدەرى قازاقتىڭ ءداستۇرى مەن مەنتاليتەتىنە ساي ەمەس. قۇلاعىنا سىرعا تاعىپ، شاش بوياعان قازاق جىگىتى بولماعان. ولاردىڭ اندەرىن مۇلدەم تىڭداعىم كەلمەيدى. اندەرىنىڭ ءمان-ماعىناسى جوق.

— ال كىمدەردى ۇلگى تۇتاسىز؟

— مەنىڭ اعام بار. مەنىڭ تويعا شىعۋىما سەبەپشى بولعان اعام مەنى ۇنەمى قامشىلاپ، شابىت سىيلاپ وتىرادى. ونىڭ تولىق ءاتى-جونى جانىبەك سىزدىقوۆ. ول ءوزى تامادا بولىپ جۇمىس ىستەيدى. مەن سول اعاممەن بىرگە، سول اعامنىڭ قولداۋىمەن تويعا شىعامىن. ونى جەكە پروديۋسسەرىم دەسەم دە بولادى. ال انشىلەردىڭ ىشىندە قايرات نۇرتاستى ۇلگى تۇتامىن.

— ءسىز جاعىمسىز پىكىرلەردى قالاي قابىلدايسىز؟

— جاعىمسىز پىكىر ايتۋشىلارعا ءجيى ايتاتىن جاۋابىم بىرەۋ-اق. «ءيا» دەگەن ءسوز. سەبەبى ولارمەن ءسوز تالاستىرىپ ەشتەڭەگە جەتە المايسىڭ. سول سەبەپتى «سەنىكى دۇرىس» دەپ قانا قۇتىلامىن. «يت قاپتى ەكەن دەپ سەن دە قاپساڭ، ادامدىعىڭنان نە قالادى» دەمەكشى مەن ولاردىڭ دەڭگەيىنە تۇسكىم كەلمەيدى. ەشقانداي ارتىق ءسوز دە ايتپايمىن، وعان جۇيكەمدى دە جۇقارتپايمىن. ءبىراق وسىدان ەكى جىل بۇرىن ەرۋباي قالدىبەكوۆ «دۋاناعا ءناپاقا، قايىرشىعا ساداقا» اتتى ماقالاسىن «جاڭاقورعان تىنىسى» گازەتىنە جاريالادى. مەن تۋرالى جاعىمسىز پىكىرىن گازەتكە جاريالاي وتىرىپ ونىڭ نەنى كوكسەگەن،  ماقالانى قانداي ماقساتتا جازعانىن مەن بىلمەيمىن. ءبىراق ماعان بۇل ماقالا كۇش-جىگەر بەردى. مەن سول ماقالانى جازعان ادامعا ەرەگەسىپ، ءوزىمدى قامشىلاپ، تويعا شىقتىم. 

— ومىردەگى قيىندىقتاردان شارشاعان كەزدە نەدەن كۇش-قۋات، شابىت الاسىز؟ ءومىر سۇرۋگە دەگەن قۇشتارلىق قايدان پايدا بولادى؟

— مەن جاعىمسىز پىكىردەن كۇش-جىگەر الامىن. سونىمەن بىرگە ماعان شابىت سىيلايتىن دا، كۇش-جىگەر سىيلايتىن دا اعام. مەن سول ءۇشىن جانىبەك اعاما العىسىمدى ايتقىم كەلەدى. مەنى ۇنەمى جىگەرلەندىرىپ وتىرادى. 

مەن ءومىر سۇرۋگە دەگەن قۇشتارلىقتى مەنەن دە جاعدايى ناشار ادامداردان الامىن. سول جاندارعا قاراپ شۇكىرشىلىك ەتەمىن، سول جانداردى كورىپ ءوزىمدى-وزىم جىگەرلەندىرە تۇسەمىن. ال بارلىق مۇشەسى ساۋ بولا تۇرا ومىردەن تۇڭىلەتىندەرگە ءبىر عانا نارسە ايتامىن - ومىردە ەشقاشان تۇڭىلمەۋ كەرەك. بارلىعىن جەڭە ءبىلۋ كەرەك. قيىندىقتى بەرگەن قۇداي جەڭىلدىكتى دە بەرەدى. تەك شىدامدىلىق پەن تاباندىلىق كەرەك.

— العا قويعان ماقساتىڭىز قانداي؟

— ماقساتتى ايتساڭ، ورىندالماي قالادى. مەن وسىعان سەنەمىن. سوندىقتان بۇل سۇراققا جاۋاپ بەرمەي-اق قويايىن. ءبىراق ارمانىم شەتەلدى باعىندىرۋ. شەتەلگە قۋانىش ەكەندىگىمدى كورسەتسەم ەكەن دەيمىن. ماعان "سەن ءانشى بولا المايسىڭ"،- دەپ ءجيى ايتادى. مەن سول ادامدارعا مەنىڭ قولىمنان ءانشى بولۋ كەلەتىنىن دالەلدەگىم كەلەدى.

— انشىلىكتەن باسقا قانداي قىزىعۋشىلىعىڭىز بار؟ بوس ۋاقىتىڭىزدا نەمەن اينالىساسىز؟

— مەن انشىلىكتەن باسقا تەحنيكاعا قاتتى قىزىعامىن. ۇيدە كومپيۋتەرگە ارنايى پروگرامما ورناتامىن. جاڭا دۇنيەلەردى پروگراممالاردى قولدانۋدى ۇيرەنەمىن. نەگىزى انشىلىكتەن بولەك وسىنداي قىزىعۋشىلىعىم بولعان. الايدا ونەر جولىن تاڭداپ، ناقتى شەشىم قابىلداعاننان كەيىن بۇل قىزىعۋشىلىقتى ىسىرىپ قويۋعا تۋرا كەلدى. جالپى ءانشى بولماسام، سول تەحنيكا سالاسىنداعى قىزمەتكەر بولار ەدىم.

— ومىرىڭىزدە قانداي كەلەڭسىزدىكتەر ءجيى ورىن الادى؟ قوعامعا ايتار سىنىڭىز بار ما؟

— جالپى كەز كەلگەن ادامنىڭ ومىرىندە اياقتان شالۋعا تىرىساتىندار كەزدەسەدى دەپ ويلايمىن. مەن تويعا بارعان كەزدە كوپتەگەن اسابالار ءان ايتقىزباي، مەنسىبەي تۇرادى. قازىرگى قوعامدا مەنسىنبەۋشىلىك، بىرەۋدى بىرەۋدەن تومەن ساناۋ ءجيى كەزدەسىپ جاتادى. وسىنى كورىپ ءىشىم اشيدى. كوبىسى دۇنيەقوڭىزدىققا سالىنىپ جاتادى. بار ويى الا بەرسەم، جەي بەرسەم دەگەندەر كوپ.

قوعامعا كوڭىلىم تولمايدى. مۇمكىندىگى شەكتەۋلى جاندارعا جەتكىلىكتى دەڭگەيدە كوڭىل ءبولىنىپ، قولداۋ كورسەتىلىپ جاتقان جوق. مەملەكەتتىك مەكەمەلەردەگى پلانتۋستان ساۋ ادامنىڭ ءوزى سۇرىنەدى. كەي مەكەمەلەردە مۇلدەم پلانتۋس جوق. قازاقستانداعى كوپتەگەن قالالاردا مۇگەدەكتەرگە جاعداي جاسالماعان. ءتىپتى كوشەدە ءجۇرۋدىڭ ءوزى قيىنعا سوعادى. قازاقستان مۇمكىندىگى شەكتەۋلى جاندارعا ارنالماعان. اكىمدىككە ارىزدانعاننان ەشتەڭە ونبەيدى. ولاردىڭ ەسىگىن توزدىرعاننان باسقا ەش پايدا جوق. مىسال مەن ءقازىر الماتىداعى اۆتوبۋسقا ءمىنىپ، مۇگەدەكتىگىم تۋرالى ارنايى قۇجاتتى كورسەتسەم، مەنەن اقشا الادى. سەبەبى مەن بۇل قالانىڭ تۇرعىنى ەمەسپىن. اقشا تولەمەس ءۇشىن وسى قالادا تىركەۋگە تۇرۋىم كەرەك ەكەن. سول كەزدە قازاقستان ءبىرتۇستاستىعى قايدا ويعا كەلدىم.

— قازىرگى قىزدارعا ايتارىڭىز بار ما؟ ماعان قازىرگى قىزدارعا كوڭىلىڭىز تولمايتىن بولىپ كورىندىڭىز...

— ءيا، ايتارىم بار. قازىرگى قىزداردىڭ جارتىسىنان كوبى مەن سەكىلدى جىگىتتەردى كورسە، ۇركە قارايدى. سوعان تاڭقالام، ءبىر جاعىنان قىنجىلام. قىزداردىڭ كوبىسى اقشاعا، بايلىققا قۇمار كەلەدى. باي جىگىتتى كورگەن قىزدار سول جىگىتپەن قىدىرىپ، ىشىپ-جەپ، سەرۋەندەپ جۇرگەندى قالايدى. اقشاعا دەگەن ءناپسىنى تىيا المايدى.

— شىنايى ماحابباتتىڭ بارىنا ءالى كۇنگە دەيىن سەنەسىز بە؟

— ءيا، ارينە سەنەمىن. سەنگەندىكتەن "جالعىز جاپىراقتى" ءالى كۇنگە دەيىن ورىنداپ ءجۇرمىن عوي. سەنەمىن. كۇتەمىن.

— ادامداردىڭ قانداي قاسيەتى جانىڭىزعا جاقپايدى؟ ال قانداي قاسيەتتى باعالاي بىلەسىز؟

— ماعان ءوزىمشىل ادامدار مۇلدەم ۇنامايدى. ال سابىرلى، ادال جانداردى باعالاي بىلەمىن. 

— ساتقىندىقتى باستان وتكەردىڭىز بە؟

— ءيا، ونداي كەزدەر بولعان. مەن قاتتى سەنەتىن ءبىر دوسىم بار ەدى. ۇنەمى تويعا سول جىگىت اپارىپ جۇرەتىن. مەن وعان تويدان تۇسكەن قاراجاتتارىمنان سىيلىق سىيلاپ، العىسىمدى ايتاتىنمىن. ءبىر كۇنى ول مەنەن تويدان تۇسكەن قاراجاتتان بەلگىلى ءبىر پايىزىن بەرۋىمدى سۇرادى. سولاي اقشاعا بولا ءتۇرلى كەلىسپەۋشىلىكتەر ورىن الىپ، مۇلدەم ارالاسپاي كەتتىك. سولاي... قازىرگى ادامداردىڭ كوبىسى اقشانى ويلايدى، تەز بايىعىسى كەلەدى. الايدا ءومىردىڭ ءمانى اقشاعا بايلانىپ قالعان جوق قوي.