ازات پەرۋاشيەۆ سانكت-پەتەربۋرگ ورمان تەحنولوگيالىق ۋنيۆەرسيتەتىنىڭ رەكتورىنا وسى وقۋ ورنىنىڭ تۇلەگى ءاليحان بوكەيحاننىڭ مەموريالدى تاقتاسىن ورناتۋ تۋرالى ۇسىنىسىن جولدادى دەپ حابارلايدى Qamshy.kz اقپارات اگەنتتىگى «اق جول» قدپ باسپا ءسوز قىزمەتىنە سىلتەمە جاساي وتىرىپ.
حاتتا ەسىمدەرى ريەۆوليۋسياعا دەيىنگى رەسەيدىڭ، كسرو جانە ونىڭ بۇرىنعى رەسپۋبليكالارىنىڭ تاريحىنا كىرگەن كوپتەگەن تانىمال جانە اتى اڭىزعا اينالعان ادامدار اتالمىش جوعارعى وقۋ ورنىنىڭ قابىرعاسىندا وقىپ، جوعارى ءبىلىم العانى جونىندە ايتىلعان. ۋنيۆەرسيتەتتىڭ ەڭ ايتۋلى تۇلەكتەرىنىڭ ءبىرى – XX عاسىردىڭ باسىنداعى رەسەي مەن قازاقستاننىڭ ءىرى قوعام ءارى مەملەكەتتىك قايراتكەرى ءاليحان بوكەيحان.
ول I مەملەكەتتىك دۋمانىڭ دەپۋتاتى، ۋاقىتشا ۇكىمەتتىڭ كوميسسارى بولعان.
1917 جىلدىڭ قاراشا ايىندا بۇكىلرەسەيلىك قۇرىلتاي جينالىسىندا دەپۋتات بولىپ سايلاندى. حح عاسىردىڭ باسىنداعى قازاق ۇلتتىق قوزعالىسىنىڭ كوشباسشىسى، «الاش» قازاق اۆتونومياسىنىڭ نەگىزىن قالاۋشى جانە جەتەكشىسى بولعاندىقتان دا ول شىن مانىندە قازاقستاننىڭ مەملەكەتتىلىگىن قالىپتاستىرۋداعى ەڭ كورنەكتى ءارى ءبىرتۋار تۇلعا بولىپ سانالادى.
«ورىس جانە قازاق حالىقتارىنىڭ دوستاستىعىن نىعايتۋعا ۇلەس قوسقان عالىم جانە مەملەكەت قايراتكەرى رەتىندە ونىڭ وراسان زور ەڭبەگىن مويىنداپ، ا.بوكەيحانعا قۇرمەت بىلدىرە وتىرىپ، «اق جول» فراكسياسىنىڭ دەپۋتاتتارى سىزدەن ۋنيۆەرسيتەتتىڭ باس وقۋ كورپۋسىنىڭ عيماراتىنا كەلەسىدەي جازبامەن مەموريالدى تاقتانى ورناتۋ مۇمكىندىگىن قاراستىرۋىڭىزدى سۇرايدى:
«بۇل جەردە 1890-1894 جىلدارى I مەملەكەتتىك دۋمانىڭ دەپۋتاتى، قازاقستان بويىنشا ۋاقىتشا ۇكىمەتتىڭ كوميسسسارى، «الاش» قازاق اۆتونومياسىنىڭ نەگىزىن قالاۋشى جانە جەتەكشىسى، كورنەكتى مەملەكەتتىك جانە قوعام قايراتكەرى، جۋرناليست، ءبىرتۋار عالىم-ەنسيكلوپەديست – ءاليحان نۇرمۇحامەد ۇلى بوكەيحان (بوكەيحانوۆ) ءبىلىم العان»، - دەپ ايتىلعان ازات پەرۋاشيەۆ قول قويعان ءوتىنىش حاتتا.
