كۇزدىڭ باسىندا بيلىكتەگى ءاۋىس-تۇيىستىڭ ءيىسى شىعا باستاعاندا جورامال جاساپ، اركىم ءوز نۇسقاسىن ۇسىنعان ەدى. جەل تۇرماسا، ءشوپتىڭ باسى قيمىلدامايدى، ءيا، ءاۋىس-تۇيىس بولدى. ءبىرىنشى بولىپ پرەزيدەنت اكىمشىلىگىندە وتىرعان ادىلبەك جاقسىبەكوۆ زەينەتكەرلىك جاسقا تولىپ، قىزمەتىنەن بوساتىلعان ەدى. ارتىنشا استانانىڭ اكىمى، ەلىمىزدىڭ قارجى ءمينيسترى اۋىسىپ، كۇتپەگەن «توسىن سىي» جاسادى. تاعى دا اۋىسۋلار بولا ما؟ قانداي وزگەرىس كۇتىپ تۇر؟ ساۋالدارىمىزعا ساياساتكەر ءامىرجان قوسانوۆ جاۋاپ بەردى.
-قىركۇيەكتىڭ باسىندا بيلىكتە ازدى-كوپتى ءاۋىس-تۇيىس بولدى. جاڭا تاعايىنداۋلاردان ايتارلىقتاي وزگەرىس كۇتە الامىز با؟
-سەنىمنەن ابدەن ايرىلعان ءارى ەكونوميكانى تۇبىنە جەتكىزۋگە شاق قالعان ۇكىمەت قۇرامىنداعى بىردى-ەكىلى ءمينيستردى اۋىستىرۋ بيلىك قىزمەتىنە، ونىڭ ساپاسىنا تۇبەگەيلى وزگەرىس اكەلەدى دەپ ويلاۋ ابەستىك بولار.
مەنىڭشە، بۇل كادرلىق اۋىسۋلارعا پرەزيدەنت اكىمشىلىگىنىڭ جەتەكشىسىنىڭ ورنىنان كەتۋى باستى سەبەپ بولىپ وتىر. جاقسىبەكوۆ ورنىنان كەتپەگەندە يسەكەشوۆ كەلمەس ەدى. ول اكىمدىكتەن جوعارعى جىلجىماعاندا ورنىنا سۇلتانوۆ كەلمەس ەدى. سۇلتانوۆ جىلى ورنىن اۋىستىرماعاندا ورنىنا سمايلوۆ وتىرماس ەدى.
سوندىقتان دا بۇل اۋىسۋلاردان ۇكىمەت جۇمىسىن جاقسارتۋعا ارنالعان سەبەپ-سالدار ىزدەمەي-اق قويعان دۇرىس بولار: ءبارى دە امالسىزدان جاسالعان ورىن الماسۋلار.
«وسى قىزمەتتە پالەنشەيەۆ تۇگەنشەيەۆتەن گورى جاقسى جۇمىس اتقارادى» دەگەن ءۋاج جوق مۇندا.
-19 قىركۇيەكتە ق ر قارجى ءمينيسترى بولىپ ءاليحان سمايىلوۆ تاعايىندالدى. تاعى دا اۋىسۋلار بولا ما؟
-و جاعىن الدىمەن قۇداي، سوسىن پرەزيدەنت بىلەدى. بىزدەگى قادرلىق وزگەرىستەردە ەشبىر قيسىن نە بىرىزدىلىك جوق. ءبارى دە ءبىر ادامنىڭ قولىندا، سوندىقتان بولجاپ ايتۋدىڭ ءوزى مۇمكىن ەمەس.
ماسەلەن، وسى وزگەرىستەرگە دەيىن «پرەزيدەنت اكىمشىلىگىنىڭ جەتەكشىسى جاقسىبەكوۆ زەينەتكەرلىككە ءارى بيۋدجەتكە قارىز بولىپ كەتەدى» دەپ كىم ايتا الدى؟!
مينيستر، اكىمدى حالىق سايلاپ وتىرعان جوق. حالىق ءۇشىن بۇل اۋىسۋلار ەش وزگەرىس اكەلمەيتىن بولعان سوڭ بەلسەندىلىك تانىتاتىندار دا از. قاشان حالىق ەل ءمينيسترىن ءوزى تاڭداي الادى؟
بۇل ءوزى ساياسي استارى بار ماسەلە.
ول ءۇشىن ءبىز، دەموكراتتار ايتىپ جۇرگەندەي، ۇكىمەت قۇرامىن پارلامەنتتىك سايلاۋدا جەڭىسكە جەتكەن پارتيا قۇراپ، بەلگىلى ءبىر مەرزىمگە ۇجىمدىق جاۋاپكەرشىلىكتى ءوز موينىنا الۋى ءتيىس. ءوز ۋادەلەرىن ورىنداي السا، كەلەسى سايلاۋدا حالىق ول پارتيانى قولدايدى، قولىنان ءىس كەلمەسە، ول پارتياعا داۋىس بەرمەي قويادى. مىنە، حالىق بيلىگى وسىنداي داستۇردەن قۇرالادى.
ونداي دەموكراتيالىق وزگەرىستەر ورنىقپاي، كادر ماسەلەسىندەگى بەي-بەرەكەتشىلدىك، جەرشىلدىك، رۋشىلدىق، كلاندىق سەكىلدى تەرىس قۇبىلىستاردان، سونداي باسشىلاردىڭ بىلىمسىزدىگى مەن بىلىكسىزدىگىنەن، تۇپتەپ كەلگەندە بۇكىل باسقارۋشى ورگانداردىڭ جۇگەنسىز جاۋاپسىزدىعى مەن جان-جاعىن جالماپ جاتقان جەمقورلىعىنان ءبىرجولاتا قۇتىلا الامىز.
ا.تاۋباي
