ساكەننىڭ 100 جىلدىعىنا ارنالعان ءمۇشايرانىڭ بەينەجازباسى تابىلدى، دەپ جازادى Qamshy.kz اقپارات اگەنتتىگى sakenmuseum.kz-كە سىلتەمە جاساي وتىرىپ.

بەلگىلى قازاق اقىنى جەڭىس قاشقىنوۆتىڭ بالاسى، اۋدارماشى، جۋرناليست ەرنات قاشقىنوۆ ساكەن سەيفۋلليننىڭ 100 جىلدىعىنا ارنالعان رەسپۋبليكالىق ءمۇشايرانىڭ بەينەجازباسىن ساكەن سەيفۋللين مۋزەيىنە اكەلىپ تاپسىردى. بۇل بەينەتاسپا جەڭىس اقىننىڭ جەكە مۇراعاتىنان تابىلعان. ساكەن سەيفۋلليننىڭ 100 جىلدىعىنا ارنالعان رەسپۋبليكالىق ءمۇشايرا قاراعاندى وبلىسى جاڭاارقا اۋدانىنىڭ ورتالىعى اتاسۋدا 1994 جىلى ۇيىمداستىرىلعان.

ساكەن سەيفۋللين مۋزەيىنىڭ ديرەكتورى، اقىن، مەملەكەتتىك سىيلىقتىڭ لاۋرەاتى  نەسىپبەك ايت ۇلى بەينەتاسپانى ەرەكشە قۋانىشپەن قابىلداپ، رۋحاني ءمانى زور قۇندى دۇنيەنى مۋزەيگە تابىس ەتكەن ەرنات قاشقىنوۆقا شەكسىز العىسىن ءبىلدىردى. بەينەجازبادا جىر دوداسىندا ولەڭدەرىن وقىعان 25 اقىننىڭ بەينەسى بار. زىرلاعان ۋاقىتتا تۇرلاۋ بار ما دەسەڭىزشى. سودان بەرى شيرەك عاسىر ءوتتى. سونداعى جىر دوداعا قاتىسقان عافۋ قايىربەكوۆ، اسقار ەگەۋبايەۆ، كاكىمبەك سالىقوۆ، جەڭىس قاشقىنوۆ قاتارلى اقىندار بۇگىندە باقيلىق بولعان. رۋحاني قازىناعا جانە اكەدەن قالعان مۇراعا جاۋاپكەرشىلىكپەن قارايتىن ەرنات قاشقىنوۆتىڭ ەڭبەگىنە ەل ريزا بولارى انىق. وتكەن تاريحتىڭ كۋاسىندەي بولعان اتالمىش بەينەتاسپا الداعى ۋاقىتتا ەل كادەسىنە جارارى ءسوزسىز.

الاش ءتۇرسىنالى