قىتايداعى Sina پورتالى قىتايلىقتار اراسىندا رەزونانس تۋدىرعان ۆيدەو جاريالادى. وندا قىتايلىق جۋرناليست ترامپقا ساۋدا سوعىسى مەن قىتايعا قارسى سالىنعان سانكسيالار ءۇشىن العىس ايتقان. بۇل تۋرالى inosmi.ru سايتى جاريالادى. «جۋرناليست العىس ءبىلدىرۋ ارقىلى مازاق ەتىپ تۇرعانىمەن، ترامپ پوزيسياسىنىڭ ءالسىز تۇستارىن جەتكىزە العان» دەپ جازدى Inosmi.

ۆيدەودا ترامپقا «ريزاشىلىعىن بىلدىرگەن» جۋرناليست «تەك ءسىزدىڭ ارقاڭىزدا جۇڭگو جاقسى جاققا قاراي وزگەرىپ كەلەدى» دەدى.  

ونىڭ ۇستىنە قىتايلىق ZTE كومپانياسىنا سالعان سانكسيالار ءۇشىن دە العىس ايتتى. سەبەبى سانكسيانىڭ اسەرىنەن قىتايلىقتار ونەركاسىپ كومپانياسىنىڭ السىزدىگىن كورە الدى. ەندى كومپانياعا تيىسىنشە قارجى بولىنەتىن بولادى.

سونىمەن قاتار، قىتايلىقتار اقش-تان تىس جەردە ساتىپ الۋعا تۇرارلىق كەرەمەت كاسىپورىنداردىڭ بار ەكەنىن ءبىلدى. ۆيدەوداعى ءجۋرناليستىڭ ايتقانىن تومەندەگى ماتىننەن وقي الاسىزدار:

«قۇرمەتتى ترامپ مىرزا!

جۇڭگو مەن اقش اي مەن كۇن سەكىلدى، بىر-بىرىنە مۇلدە ۇقسامايتىن الشاق مەملەكەتتەر. سول سەبەپتى ءبىر كەلىسىمگە كەلىپ، ءتۇسىنىسۋ كەرەكتىگىن تۇسىندىرگەن شوك تەراپياڭىز ءۇشىن العىس بىلدىرەمىن. ينتەللەكتۋالدار، عالىمدار، كومپانيالار قيىندىقتاردى زەرتتەپ، تىعىرىقتان شىعۋ ماقساتىندا بىرىگەدى. ءسىز دۇنيەجۇزىلىك ساۋدا ۇيىمىن رەفورمالاۋدىڭ قاجەتتىلىگىن ەسكە سالعاندىقتان، وزگە ەلدەر بىرىگىپ جاتىر. قىتايدىڭ كەمشىلىكتەرىن بۇكىل الەمگە پاش ەتكەن بايانداماڭىز ءۇشىن راقمەت. ەندى مەملەكەتىمىز رەفورمالار وتكىزىپ، شەتەلدىك ينۆەستيسيالاردى تارتۋعا مۇمكىندىك الدى. سالەم، Tesla!

قىتايعا قاراپايىمدىلىق قاسيەتتى قايتارعانىڭىز ءۇشىن تاعى العىس ايتامىز. وزىمشىلدىك پەن مەنمەندىكتەن تۋعان كەمشىلىكتەرگە اكسەنت جاساپ، كوڭىل بولگەنىڭىز ءۇشىن العىس. ەشكىم ءسىز سەكىلدى مەيىرىمدى ەمەس.

ءسىز بولماساڭىز جانە ZTE كومپانياسىنا سالعان سانكسيالارىڭىز بولماسا، جۇڭگو ونەركاسىبىنە ايتارلىقتاي كوڭىل بولىنبەس پە ەدى، ەندى بۇرىنعىدان دا كوپ قارجى سالىناتىن بولادى. اقش-تان تىس جەردە ساتىپ الۋعا بولاتىن تاماشا نىسانداردىڭ بار ەكەنىن كورسەتتىڭىز. قىتايدىڭ ەۋروپادان ساتىپ العان نىساندارىنىڭ كولەمى جارتى جىلدا 20 ميلليارد دوللاردى قۇرادى. بۇل كورسەتكىش اقش-تان 9 ەسە كوپ.

ىسكەرلىك ورتانىڭ وكىلدەرىنە قاراپايىم، ۇستامدى بولۋدى ۇيرەتتىڭىز. «سەمىزدىكتى قوي عانا» كوتەرەدى دەگەن ءسوز بار ەمەس پە؟ «بوينگ» (Boeing) بيىل قىتايلىقتارعا اسەر ەتكەن جوق. اقش-تىڭ ءىرى IT كومپانياسى تاپسىرىس قابىلداۋدى دوعاردى، نارىقتاعى ۇلەسىن تومەندەتۋ ءۇشىن قىتايداعى باعالاردى ءوسىردى. كاسىپكەرلەر سىزگە قارىز بولدى، سول سەبەپتى بۇرىنعىدان دا بەلسەندى جۇمىس ىستەيتىن بولادى.

ءسىزدىڭ ارقاڭىزدا امەريكالىق ۆەچينا مەن بۋربون (ساپالى ۆيسكي) ونىمدەرىنەن باس تارتتىق.

جۋرناليست رەتىندە ماعان ۇيرەتكەنىڭىز كوپ بولدى. سول ءۇشىن دە مىڭ العىس.

ءسىز بەن ءسىزدىڭ كومانداڭىز بولماسا، ساۋدا سوعىسىن جاي عانا وتكىنشى قيىندىق دەپ تۇسىنەر ەدىك.

بىزگە باسشىلىقتىڭ كەرەمەت ءادىسىن ۇيرەتكەنىڭىز ءۇشىن العىس ايتامىز. مەن مۇنى «ترامپتىڭ كوزى» دەپ اتار ەم.

باق-تىڭ بەدەلىن تۇسىرگەنىڭىز دە ءبىزدى زور مۇمكىندىكتەرگە جەتەلەدى. سەبەبى ءسىزدىڭ ارقاڭىزدا ەكى ەسە جىلدامدىقپەن جۇمىس ىستەيمىز، ءاربىر ماتەريالىمىزدى مىڭ قايتارا تەكسەرىپ، ساپالى ەكەندىگىنە كوز جەتكىزىپ وتىراتىن بولامىز. ءسىز ۇلى ادامسىز!

ىزگى ماحابباتپەن، چەن لەي»