ەلباسى 5 قازاندا اقوردا رەزيدەنسياسىندا حالىققا جولداۋىن جاريالادى. جولداۋىن جاريالاماس بۇرىن قازاقستاننىڭ بۇگىنگى كۇنگە دەيىنگى جەتىستىكتەرىن ءتىزىپ، الداعى جوسپارلاردى اتادى.

ەلباسى جولداۋىن ۇلتتىق تەلەارنالار مەن اقوردانىڭ فەيسبۋكتەگى رەسمي پاراقشاسى تىكەلەي ەفيردە كورسەتىپ جاتىر.

جولداۋىندا ەلباسى ادام قۇقىقتارىنا ەرەكشە توقتالىپ ءوتتى. ءبىرىنشى كەزەكتە ادام دەنساۋلىعىن ءبىرىنشى ورىنعا قويۋ كەرەك ەكەنىن باسا ايتتى. ول ءۇشىن تۇرعىنداردىڭ جايلى ءومىر سۇرۋىنە مۇمكىندىك جاساۋدى تاپسىردى. مۇنى ايتقان نازاربايەۆ الماتى قالاسىنىڭ اكىمى باۋىرجان بايبەكتى ماقتادى.

«ساپالى ءومىر ءسۇرۋ دەگەنىمىز جايلى پاتەردە تۇرۋ دەگەن ءسوز. جۇمىسىنا دا جاقىن، ءۇيىنىڭ ساپاسى دا جوعارى، اۋلاسى دا جايلى. بۇل جاعىنان الماتىنىڭ اكىمى باۋىرجان بايبەككە قوشەمەت كورسەتىپ قويساڭىزدار بولادى. استانا دا ءدال سولاي»، - دەگەن نازاربايەۆ «ايتەۋىر مەن جۇرگەن جەرلەر تازا» دەپ زالدى ءبىر كۇلدىرىپ الدى.

دەگەنمەن ەلباسى كەز كەلگەن ۋاقىتتا كەز كەلگەن بۇرىشقا وتە سالاتىنىن ەسكەرتتى.

ەلباسىنىڭ 2017 جىلعى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى حالىققا جولداۋىندا ەل ەكونوميكاسىن وركەندەتىپ قانا قويماي، ءبىلىمدى دامىتۋ، رۋحانياتىمىزدى جاڭعىرتۋ، قاۋىپسىزدىك شارالارىن كۇشەيتۋ، ءدىني ەكسترەميزمنىڭ الدىن الۋ، قىلمىستىق جازانى وتەپ جاتقان ازاماتتاردى تەولوگيالىق تۇرعىدان ساۋاتتاندىرۋ ماسەلەلەرى ايتىلدى.

مەملەكەت باسشىسى وسكەلەڭ ۇرپاقتى ءوز بەتىمەن ىزدەنۋگە ۇندەپ، وسى باعىتتا وقىتۋ باعدارلامالارىن جەتىلدىرۋدى تاپسىردى. سونىمەن قاتار، ITء-بىلىمدى، قارجىلىق ساۋاتتىلىقتى، ۇلتجاندىلىقتى دامىتۋعا باسا كوڭىل ءبولۋ قاجەتتىگىن ءسوز ەتتى.

ال 2018 جىلى 10 قاڭتاردا «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىن جاريالادى. وندا ءتورتىنشى ونەركاسىپتىك ريەۆوليۋسيا الەمىنە بەيىمدەلۋ مەن جەتىستىككە جەتۋ جولىن تابۋ ءۇشىن نە ىستەۋ قاجەتتىگىن ايقىندادى.  ءۇش ءتىلدى مەڭگەرگەن كەز كەلگەن ەتنيكالىق توپتىڭ وكىلى پرەزيدەنت بولا الاتىنى ايتىلدى. 2018 جىلى زەينەتاقى مەن جاردەماقىنىڭ جانە مۇعالىمدەر جالاقىسىنىڭ نەشە پايىزعا وسەتىنىن حابارلادى.