بۇگىن «نۇر وتان» پارتياسىنىڭ ورتالىق اپپاراتىندا پارتيا ءتوراعاسىنىڭ ءبىرىنشى ورىنباسارى ماۋلەن اشىمبايەۆ قازاقستان جازۋشىلار وداعىنىڭ مۇشەلەرىمەن جانە ەلىمىزدىڭ زيالى قاۋىم وكىلدەرىمەن كەزدەستى. سونىڭ ناتيجەسىندە پارتيا مەن جازۋشىلار وداعى اراسىنداعى ءوزارا ىنتىماقتاستىق تۋرالى مەموراندۋمعا قول قويىلدى.

جالپى مەملەكەت باسشىسىنىڭ تاپسىرماسىمەن «نۇر وتان» پارتياسى قاشاندا زيالى قاۋىمعا، اقىن-جازۋشىلارعا، مادەنيەت پەن ونەر سالاسىندا تەر توگىپ جۇرگەن بارشا ازاماتتارعا قولداۋ كورسەتىپ كەلەدى. جيىندا وسى جۇمىستاردىڭ الداعى ۋاقىتتا دا ءوز جالعاسىن تاباتىنى ايتىلدى. سول سەبەپتى اتالعان مەموراندۋم اياسىندا الداعى جۇمىستىڭ باسىم باعىتتارى ايقىندالدى. بۇل رەتتە پارتيا اقىن-جازۋشىلاردى قولداۋ ماقساتىندا ءتورت بىردەي جوبا ۇسىنىپ وتىرعانىن اتاپ وتكەن ءجون.

ياعني پارتيا جاس اقىن-جازۋشىلارىمىزدى قولداۋ، ولاردى ىنتالاندىرۋ ماقساتىندا «رۋحاني جاڭعىرۋ» باعدارلاماسى اياسىندا ارنايى بايقاۋ وتكىزۋدى ۇسىنىپ وتىر. سول ارقىلى اتالعان باعدارلامانىڭ ءمانى مەن ماڭىزىن جانە ونىڭ قۇندىلىقتارىن كەڭىنەن دارىپتەۋ جانە جاس اقىن-جازۋشىلارعا جۇيەلى تۇردە قولداۋ كورسەتۋ كوزدەلگەن. ەكىنشى جوبا – «رۋحاني جاڭعىرۋ» باعدارلاماسىن ىسكە اسىرۋ اياسىندا جازۋشىلار وداعىمەن بىرلەسىپ «استانا» تەلەارناسىنان كورسەتىلەتىن ارنايى تەلەباعدارلاما دايىنداۋ. ءۇشىنشى جوبا – قازىرگى زامانعى تەحنولوگيالاردىڭ كومەگىمەن YouTube-تە ارنايى كانال اشىپ، رۋحاني جاڭعىرۋدىڭ قۇندىلىقتارىن ناسيحاتتايتىن، يدەولوگيالىق، تاربيەلىك، اعارتۋشىلىق ماڭىزعا يە، ۇلتتىق كودتى ساقتاپ، بىلىمگە دەگەن قۇشتارلىقتى ارتتىرۋعا ۇلەس قوساتىن باستامالاردى جۇزەگە اسىرۋ. ءتورتىنشى جوبا پارتيالىق باستامالار اياسىندا جاڭعىرتىلعان ەلىمىزدەگى كىتاپحانالاردا اقىن-جازۋشىلارمەن كەزدەسۋلەر، ءتۇرلى شىعارماشىلىق كەشتەر وتكىزەتىن ارنايى كلۋبتار قۇرۋ.

– بۇل جوبالاردىڭ بارلىعىن جاس اقىن-جازۋشىلارىمىزعا بەرىلىپ وتىرعان مول مۇمكىندىك دەپ ەسەپتەيمىز. سوندىقتان وسى مۇمكىندىكتى ءتيىمدى پايدالانىپ، العا قويعان ماقساتتارىمىزعا جەتۋ ءۇشىن بىرلەسىپ جۇمىس ىستەيىك، – دەدى ماۋلەن اشىمبايەۆ.

ءىس-شاراعا جازۋشىلار وداعىنىڭ ءتوراعاسى ۇلىقبەك ەسداۋلەت، «ميراس» رەسپۋبليكالىق كەڭەسىنىڭ ءتوراعاسى، ءماجىلىس دەپۋتاتى بەكبولات تىلەۋحان، دراماتۋرگ، جازۋشى تولەن ابدىك، جازۋشى الدان سمايىل، ءماجىلىس دەپۋتاتى ساۋىتبەك ءابدىراحمانوۆ، اقىن باۋىرجان قاراعىز ۇلى جانە باسقا دا قالامگەرلەر قاتىسىپ، كوتەرىلگەن ماسەلەلەر بويىنشا ءوز ويلارىمەن ءبولىستى.

سونىمەن قاتار جيىن بارىسىندا ەلباسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا كورسەتىلگەن مىندەتتەردىڭ ماڭىزى كەڭىنەن تالقىلانىپ، حالىققا ءتۇسىندىرۋ جۇمىستارىن بىرلەسىپ اتقارۋ جايى دا ءسوز بولدى.