شەرحان اعامەن العاش 1992 جىلى الماتىدا جۇزدەستىم. قاڭتار ايىنىڭ ورتاسى بولاتىن. "ەگەمەندى قازاقستان" گازەتىنىڭ رەداكسياسىندا، ءوز كابينەتىندە قابىلدادى. ول كەزدە مەن موڭعول ۇكىمەتى جانىنداعى مونسامە اگەنتتىگىنىڭ ارناۋلى ءتىلشىسىمىن. قازاقستانعا العاش رەت ارنايى ىسساپارمەن كەلگەنىم. ءبىر ساعاتتان استام ۋاقىت ۇزاق اڭگىمەلەستىك. اڭگىمەسى تارتىمدى، اسەرلى ءارى شىنايى. رەداكسيادا ەشقانداي بيۋروكراتتىق جوعى بىردەن اڭعارىلىپ تۇردى. ورىنباساسارلارى ەمەن-ەركىن كىرىپ-شىعىپ، الدەبىر قاعازعا قول قويدىرىپ الادى، اڭگىمە اراسىندا ولارعا تاپسىرمالارىن دا بەرىپ تاستايدى. ءبىراز ۋاقىتتان كەيىن شەراعاڭ ماعان سۇراق قويدى: 
- موڭعولدار ۇلانباتىردىڭ اتاۋىن وزگەرتپەك بولدى دەپ ەستىدىم. اقىرى، قالاي شەشىلەتىن بولدى؟
- ءيا، اعا! پارلامەنتتە ءۇلانحۇۇ دەگەن جاس دەموكرات سونداي ماسەلە كوتەردى. 
- ۇلانباتىردىڭ نەسى ۇناماي قالىپتى، ول جىگىتكە؟ 
- ونىڭ ايتقان ءۋاجى بىلاي بولدى: "ۇلانباتىر (قىزىل باتىر) اتاۋىن كومينتەرننىڭ وكىلى قىزىل بولشيەۆيك تۇرار رىسقۇلوۆ قويعان. ەندى، بۇل اتاۋ - ساياسي قاتە. باسقاشا اتالۋى كەرەك". سوندا، ءبىر قارت دەپۋتات: "الدىمەن، جاس دەموكرات ءسىزدىڭ ماسەلەڭىزدى شەشىپ الايىق. سەنىڭ دە اكەڭ قىزىل بولشيەۆيك بولعانعا ۇقسايدى. سەبەبى، اتىڭدى ءۇلانحۇۇ (قىزىلبالا) دەپ قويعان ەكەن. سەن ءوز ەسىمىڭدى ءحوححۇۇ (كوكبالا) نەمەسە ءساعانحۇۇ (اقبالا) دەپ وزگەرتىپ كەل. ماسەلەنى سودان كەيىن قاراستىرۋعا بولادى" - دەگەندە پارلامەنت مۇشەلەرى قىران-توپان كۇلكىگە قارق بولدى دا ۇسىنىس كۇنتارتىبىنەن الىنىپ تاستالدى - دەدىم. 
شەراعاڭ راقاتتانا كۇلدى دە الگى ەسىمدەردى قايتالاپ سۇراپ، قاعازعا ءتۇرتىپ الدى. 
ەرتەڭىندە "ەگەمەندى قازاقستاننىڭ" "دۇبىرگە تولى دۇنيە" ايدارىندا "ۇلانباتىر اتاۋى وزگەرگەن جوق" دەگەن تاقىرىپپەن شاعىن ءماتىن جاريالانعان ەدى.
جالپى، شەرحان مۇرتازا - جاعىمپازدىقتان اۋلاق، تۋراشىل ساناۋلى جازۋشىلاردىڭ بىرەگەيى ەدى. اقيقاتتى ىزدەدى، ونى جەر بەتىنەن تاپپادى. ەندى، ماڭگىلىك ومىرگە ءوزى اقيقات بولىپ اتتاندى. ءومىر زاڭى سولاي.

قۋاندىق شاماحاي ۇلى