«دۇنيە ويلاپ تۇرساڭ شولاق ەكەن،
ادامزات بىر-بىرىنە قوناق ەكەن.
بىر-بىرىمىزگە قوناقپىز. دۇنيە وتەدى دە كەتەدى، ءبىراق اقىرى قانداي بولادى؟ سونى ويلاۋ ءۇشىن كەلىپ ءجۇرمىز...»
بۇل شەرحان مۇرتازانىڭ جۇما ناماز كەزىندە ايتقان سوڭعى وسيەت ءسوزى. ۆيدەونى «اسىل ارنا» تەلەارناسىنىڭ ديرەكتورى مۇحامەدجان تازابەك Instagram-داعى پاراقشاسىنا جاريالادى.
پوسموترەت ەتۋ پۋبليكاسيۋ ۆ Instagramشەرxان مۇرتازا اتامىزدىڭ جۇما نامازداعى سوڭعى وسيەت سوزىنەن... #اسىلارنا
ايتا كەتەيىك، 9 قازاندا حالىق جازۋشىسى شەرحان مۇرتازا قايتىس بولدى.
شەرحان مۇرتازا 1932 جىلى 28 قىركۇيەكتە جامبىل وبلىسى، جۋالى اۋدانى، مىڭبۇلاق اۋىلىندا دۇنيەگە كەلگەن. 1955 جىلى م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن ءتامامداعان.
«لەنينشىل جاس» (قازىرگى «جاس الاش») گازەتىنىڭ، «سوسياليستىك قازاقستان» (قازىرگى «ەگەمەن قازاقستان») گازەتىنىڭ ءتىلشىسى، ادەبي قىزمەتكەرى بولدى. 1963-1970 جىلدارى «لەنينشىل جاس» گازەتىنىڭ رەداكتورى.
سودان كەيىنگى ۋاقىتتا «جازۋشى» باسپاسىنىڭ، «جالىن» الماناحىنىڭ، «جۇلدىز» جۋرنالىنىڭ باس رەداكتورى، قازاقستان جازۋشىلار وداعى باسقارماسىنىڭ ەكىنشى حاتشىسى، «قازاق ادەبيەتى» گازەتىنىڭ باس رەداكتورى ءارى قازاقستان جازۋشىلار وداعى باسقارماسىنىڭ حاتشىسى.
1989-1992 جىلدارى «ەگەمەن قازاقستان» گازەتىنىڭ باس رەداكتورى، 1992–1994 جىلدارى قازاقستان رەسپۋبليكاسى مەملەكەتتىك تەلەراديو كومپانياسىنىڭ ءتوراعاسى بولىپ ىستەدى. ق ر پارلامەنتىنىڭ ءماجىلىس دەپۋتاتى بولعان.
جازۋشىنىڭ ءار جىلدارى «تابىلعان تەڭىز» (1963)، «بەلگىسىز سولداتتىڭ بالاسى» (1969)، «احمەتجاننىڭ انتى» (1973)، «مىلتىقسىز مايدان» (1977) پوۆەستەرى، «41-جىلعى كەلىنشەك» (1972)، «ينتەرنات نانى» (1974) اڭگىمەلەرى، «قارا مارجان» (1977)، بەس كىتاپتان تۇراتىن «قىزىل جەبە»، «اي مەن ايشا» (1999) روماندارى، شىعارمالارىنىڭ ءتورت تومدىعى (1990-2000)، شىعارمالارىنىڭ 6 تومدىعى، تاڭدامالى شىعارمالارىنىڭ 7 تومدىعى، «ەلىم، ساعان ايتام، ەلباسى، سەن دە تىڭدا» (ك. سمايىلوۆپەن بىرگە) (1998)، «ءبىر كەم دۇنيە» (2008) كىتاپتارى جارىق كورگەن.
ونىڭ شىعارمالارى كسرو حالىقتارى مەن شەتەل تىلدەرىنە اۋدارىلعان.
قازاق تىلىنە گ.ح.اندەرسەننىڭ اڭگىمەلەرىن، ۆەنگر حالىق ەرتەگىلەرىن، ش.ايتماتوۆتىڭ «بوتاگوز»، «قوش بول، گۇلسارى»، «تەڭىز جاعالاي جۇگىرگەن تارعىل توبەت»، «بوراندى بەكەت» تۋىندىلارىن؛ مۇستاي كارىمنىڭ «ءبىزدىڭ ءۇيدىڭ قۋانىشى» پوۆەسىن، ە.ەرسكيننىڭ «مارىكچان بالالارى» رومانىن، ل.لاگيننىڭ «حوتتابىچ قارت» پوۆەسىن ءتارجىمالادى. «ءازيزا» پەساسى مادەنيەت جانە اقپارات مينيسترلىگىنىڭ گرانتىن جەڭىپ الدى.
