بۇل تۋرالى «نۇر وتان» پارتياسى ءتوراعاسىنىڭ ءبىرىنشى ورىنباسارى «ايقىن»، «ليتەر» گازەتتەرىنىڭ استاناداعى جاڭا رەداكسياسىنا بارعان كەزدە ايتتى.
وسىعان دەيىن الماتىدان شىعىپ كەلگەن اتالعان ەكى باسىلىم وسى اپتادا استاناعا كوشىپ كەلدى. سوعان وراي بۇگىن ماۋلەن اشىمبايەۆ رەداكسيالارعا ارنايى بارىپ، گازەتتەردىڭ ۇجىمىمەن جانە باسشىلىعىمەن كەزدەستى. كەزدەسۋدە ول بۇگىندە پارتيالىق اقپارات قۇرالدارىنىڭ الدىندا كونتەنتتى جاڭعىرتۋ، ماتەريالداردىڭ جازىلۋ ءستيلى مەن جەتكىزۋ فورمالارىن وزگەرتۋ سياقتى جاڭا مىندەتتەر تۇرعانىن ايتتى. سونداي-اق باسىلىمداردىڭ استاناعا كوشۋى پارتيالىق جاڭعىرۋدىڭ ءبىر كورىنىسى ەكەنىن دە تىلگە تيەك ەتتى.
– ءقازىر استانادا ساياسي، عىلىمي جانە زيالى ورتا قالىپتاستى دەۋگە تولىق نەگىز بار. مۇندا ەلىمىزدىڭ بولاشاعىن ايقىندايتىن ۇلكەن جينالىستار، ءىرى ءىس-شارالار، ءتۇرلى حالىقارالىق باسقوسۋلار وتەدى. گازەتتەرىمىزدىڭ نەگىزگى باعىتى ەلباسى ساياساتى مەن تاپسىرمالارىنىڭ ورىندالۋى، ۇكىمەتتىڭ، پارلامەنتتىڭ اتقارىپ جاتقان جۇمىستارى ەكەنى بەلگىلى. سوندىقتان باسىلىمنىڭ ورتالىققا كوشۋى وتە ورىندى. بۇل ەكى گازەت پارتيانىڭ باسىلىمى بولعاندىقتان، ولاردىڭ ورتالىق اپپاراتتا ورنالاسۋىنىڭ ءوزى ەلباسى ساياساتىن ناسيحاتتاۋ ءۇشىن دە جاقسى باستاما. سوندىقتان بۇل شەشىمدى پارتيالىق جاڭعىرۋ جولىنداعى سيمۆوليكالىق قادام دەپ قابىلداۋعا بولادى، – دەدى ماۋلەن اشىمبايەۆ.
اتالعان باسىلىمداردىڭ رەداكسيالارى قونايەۆ كوشەسىندەگى «نۇر وتان» پارتياسى ورتالىق اپپاراتىنىڭ عيماراتىندا ورنالاسقان. مۇندا ۇجىمنىڭ شىعارماشىلىقپەن اينالىسۋى ءۇشىن بارلىق جاعداي جاسالعان. سوندىقتان ەندى گازەتتەردىڭ مازمۇنى مەن فورماتىن دا جاڭعىرتۋ كەرەكتىگىن ايتقان ماۋلەن اشىمبايەۆ: «وسى جولدا ەلباسى تاپسىرمالارىنىڭ ورىندالۋىن قاتاڭ قاداعالاپ، كەيبىر وڭىرلەردەگى ولقىلىقتاردى گازەت بەتتەرىندە باتىل جاريالاۋىمىز قاجەت، – دەدى.
ودان بولەك، پارتيا ءتوراعاسىنىڭ ءبىرىنشى ورىنباسارى ەكى رەداكسيانىڭ قىزمەتكەرلەرىنە الەۋمەتتىك ماسەلەلەردى وڭتايلى شەشۋ ءۇشىن پارتيا تاراپىنان قولداۋ كورسەتىلەتىنىن دە جەتكىزدى. ياعني الداعى ايدان باستاپ قىزمەتكەرلەردىڭ ايلىعى 20 پايىزعا كوبەيمەك. بۇدان باسقا، ولاردىڭ مەملەكەتتىك باعدارلامالار بويىنشا جەڭىلدىكپەن پاتەر الۋىنا دا پارتيا قول ۇشىن سوزاتىن بولادى.
