ق ر مادەنيەت جانە سپورت ءمينيسترى ارىستانبەك مۇحامەدي ۇلى 100 سپورت ورتالىعىن سالسا، 100 اۋرۋحانا سالۋدىڭ قاجەتى جوق دەگەن ويدا. بۇل تۋرالى مينيستر ۇكىمەت ساعاتىندا ايتتى، دەپ حابارلايدى Qamshy.kz اقپارات اگەنتتىگى. 

ءمينيستردىڭ مالىمەتىنە سايكەس، حالىقتىڭ سپورت ورتالىقتارىنا دەگەن سۇرانىسى - 43 %. اۋىلدى ايماقتاردا سپورت ورتالىقتارىنىڭ تاپشىلىعى - 80 %.

«ساراپتاما كورسەتكەندەي، اۋىل تۇرعىندارىنىڭ تەك 20–25% عانا سپورتپەن شۇعىلدانا الادى. سوندىقتان مينيسترلىك 100 ساۋىقتىرۋ كەشەندەرىن سالۋدى كوزدەپ وتىر. مۇنداي جاعدايدا 100 اۋرۋحانا سالۋ قاجەتتىلىگى بولمايدى. ءقازىر قارجى ماسەلەسى شەشىلىپ جاتىر. قارجىنىڭ كوپ بولىگى فۋتبول مەن حوككەي كوماندالارىنا بولىنەدى. ءبىراق نەگىزگى قارجى جالپى سپورتقا جۇمسالىنۋى ءتيىس. بۇل ماسەلە، اسىرەسە، اۋىلدى ايماقتاردا سەزىلىپ وتىر»، -  دەيدى ارىستانبەك مۇحامەدي ۇلى.