ءبىر كەم دۇنيە... بۇگىن الماتى كۇڭىرەنىپ تۇر. سەبەبى وڭتۇستىك استانا حالىق ادامى، عاسىر ادامى، جازۋشى شەرحان مۇرتازانى اقتىق ساپارعا شىعارىپ سالدى. قوشتاسۋ ءراسىمى مۇحتار اۋەزوۆ اتىنداعى مەملەكەتتىك اكادەميالىق دراما تەاترىندا ءوتتى، دەپ حابارلايدى Qamshy.kz اقپارات اگەنتتىگى.

قوشتاسۋ راسىمىنە جازۋشىنىڭ جاقىن تۋىستارى مەن ارىپتەس-دوستارى جينالدى. شەراعامەن ارالاسقان ارىپتەس دوستارى، شاكىرتتەرى باستاپ، بيلىك وكىلدەرىنە دەيىن بوي كورسەتتى. ەگىلىپ جىلاپ تۇرعان ۇلىقبەك ەسداۋلەتتى كوردىم، ۇستازىنان ايىرىلعانىنا كۇڭىرەنگەن نۇرلان ءورازاليندى كوردىم، باسىن ءبىر كوتەرمەي، تەك تومەن قاراپ شەراعانى شىعارىپ سالعان ءاسانالى ءاشىموۆ تە بار.

جاسى شەرحان مۇرتازادان ۇلكەن بولسا دا، حالىق جازۋشىسىن تىك تۇرىپ شىعارىپ سالعان ءابدىجامىل نۇرپەيىسوۆتى اتاپ وتپەسكە بولماس. قولىنداعى تاياعى، ءدىر-دىر ەتىپ تۇرعان اياعىنا قاراماستان كىشىگە دەگەن ىزەتتىلىگىن، ۇلى تۇلعاعا دەگەن قۇرمەتىن، مارقۇمعا دەگەن سىيلاستىعىن كورسەتىپ، بوس تۇرعان ورىندىققا ءراسىمنىڭ سوڭىنا دەيىن وتىرمادى.

تىرىسىندە قارايلاسپاعان بيلىك وكىلدەرى دە قازاعا جينالدى. ق ر مادەنيەت جانە سپورت ءمينيسترى ارىستانبەك مۇحامەدي ۇلى، الماتى قالاسىنىڭ اكىمى باۋىرجان بايبەك، جامبىل وبلىسىنىڭ اكىمى اسقار مىرزاحمەتوۆ، ەنەرگەتيكا ءمينيسترى قانات بوزىمبايەۆ، ءماجىلىس دەپۋتاتى ساۋىتبەك ءابدىراحمانوۆتار بار. ال مەملەكەت باسشىسى نۇرسۇلتان نازاربايەۆ شەراعامەن قوشتاسۋعا كەلە المادى، تەك قوشتاسۋ حاتى وقىلدى.

شەرحان مۇرتازامەن ارىپتەس بولىپ ارالاسقان اقىن-جازۋشىلارىمىز مارقۇممەن ەستەلىكتەرىمەن بولىسسە، جاس بۋىن قازاق ادەبيەتى مەن جۋرناليستيكاسىندا وشپەس ءىز قالدىرعان جازۋشىعا زور العىستارىن جاۋدىردى.

«بۇگىن ءبىز عاسىر ادامى – شەرحان مۇرتازانى اقتىق ساپارعا شىعارىپ سالۋ ءۇشىن جينالدىق. ول قازاقستاندىق جۋرناليستيكادا وشپەس ءىزىن قالدىردى. ءتىپتى قازاقستاندىق باسىلىمداردىڭ ءبارىن دەرلىك باسقاردى. پارلامەنت دەپۋتاتى بولدى، مەملەكەتتىڭ قوعامدىق ومىرىنە ارالاستى، حالىق ءۇشىن جۇمىس ىستەدى. ءبىز ءور تۇلعانى ۇمىتپايمىز»، - دەدى باۋىرجان بايبەك.

اكادەميك ورازالى سابدەن حالىقتىڭ قامى ءۇشىن تەر توگىپ، شىندىق ءۇشىن كۇرەسكەن شەراعاسىن ايتىپ تەبىرەندى. ءارى سوڭعى كۇندەرىندە جازۋشىنىڭ جاعدايىن جاساپ، قامقور بولعان ۇلى مەن قىزىنا العىس ءبىلدىردى.

«شەرحان مۇرتازا تۋرالى كوپ ايتىلادى، ايتامىز دا. ول ۇلى ابايدا كەيىن قازاقتىڭ ءۇنىن ۇندەپ، جوعىن جوقتاعان ادام. ول تىرىسىندە نە ايتپادى، نە جازبادى؟ مۇنىڭ ءبارى حالىققا ءمالىم. جوعارعى كەڭەستىڭ دەپۋتاتى ءتىل ماسەلەسىنە وراي «جىلان دا عانا قوس ءتىل بولادى» دەگەن. جەر ماسەلەسىنە كەلگەندە «جەر انانى ساتپايمىز، ەشكىمگە بەرمەيمىز» دەپ كەسىپ ايتقان. بويىنداعى تەكتىلىگىن جوعالتپاعان الىپ تۇلعا ەدى. سونىسى بىزگە ۇلگى بولۋ كەرەك»، - دەدى ورازالى سابدەن.

اقىن، دراماتۋرگ نۇرلان ورازالين شەرحان مۇرتازانى «قازاقتى وياتقان الاشتىڭ ارىستانى» دەپ باعالادى. ءاليحان، احمەتتەردەن كەيىنگى قاراپايىم حالىقتىڭ مۇددەسىنە جۇمىس ىستەگەن شەراعانى ايتقاندا، كوڭىلى تولقىپ سالا بەردى.

«ادام بالاسى مىنا جەكە بەلگىلى ءبىر مىندەتتى اتقارۋ ءۇشىن كەلەدى. ءدال وسى تۇرعىدا شەراعام سوناۋ عاسىردان باستاپ كۇنى كەشەگى ءوزىمىزدىڭ جاۋلاسقان ۇرپاقتارىمىزعا دەيىنگى ارالىقتا وسى كەڭەزڭنىڭ ىشىندە ۇلتتىڭ الدىنداعى مىندەتتى اتقارۋ ءۇشىن يىعىنا تۇسكەن جۇكتى كوتەرگەن الاشتىڭ ارىستانى»، - دەدى نۇرلان ورازالين.

ءيا، بۇگىن ازا تۇتقان قازاق ەلى ارداقتىسىن، اياۋلىسىن، ۇلى پەرزەنتىن قيماي قارا جەرگە تاپسىردى. كۇڭىرەنگەن الماتى... ءبىر كەم دۇنيە...

ايتا كەتەيىك، جازۋشى شەرحان مۇرتازا قازاننىڭ 9-ى كۇنى 86 جاسىندا دۇنيەدەن ءوتتى. ول 1932 جىلى جامبىل وبلىسىنا قاراستى جۋالى اۋدانىندا دۇنيەگە كەلگەن. 55 جىلى ماسكەۋدەگى لومونوسوۆ ۋنيۆەرسيتەتىنىڭ جۋرناليستيكا فاكۋلتەتىن ءتامامداعان. "لەنينشىل جاس"، "سوسياليستىك قازاقستان" گازەتتەرىنىڭ رەداكتورى، قازاقستان مەملەكەتتىك تەلەراديو كومپانياسىنىڭ ءتوراعاسى قىزمەتتەرىن اتقارعان. قازاقستاننىڭ جوعارعى كەڭەسىندە، كەيىن پارلامەنت ماجىلىسىندە دەپۋتات بولعان. جازۋشى "قىزىل جەبە"، "تامۇق"، "اي مەن ايشا"، "قارا مارجان" ءتارىزدى بىرنەشە رومان جازعان. ودان بولەك ونداعان اڭگىمە-پوۆەستەرى بار.