«قازمەديا ورتالىعىنىڭ» كينوكونسەرت زالىندا حالىق جازۋشىسى، «قازاقستان» كورپوراسياسىنىڭ ارداگەرى شەرحان مۇرتازانىڭ قايتىس بولۋىنا بايلانىستى قارالى ميتينگ وتكىزىلدى. بۇل تۋرالى Qazaqstan جاڭالىقتارى حابارلادى.
جيىنعا اقپارات جانە كوممۋنيكاسيالار ءمينيسترى داۋرەن ابايەۆ، قازاق تەليەۆيزياسىنىڭ ارداگەرلەرى سۇلتان ورازالين، ەرلان قوجاگەلدييەۆ، مەملەكەت جانە قوعام قايراتكەرى مىرزاتاي جولداسبەكوۆ، ساتيريك كوپەن امىربەك، «Qazaq radiosy»-نىڭ ديرەكتورى سەرىك ءابدۋالى قاتىسىپ، قالامگەردىڭ شىعارماشىلىق جولىن بايانداپ، ءومىرى تۋرالى جارقىن ەستەلىكتەرمەن ءبولىستى.
سونىمەن قاتار، ۇلتتىق ارنانىڭ «التىن قورىندا» ساقتالعان بەينەماتەريالداردان شاعىن فيلم ۇسىنىلدى.
«سوسياليستىك قازاقستان»، «لەنينشىل جاس»، «ەگەمەن قازاقستان»، «قازاق ادەبيەتى» سياقتى بىرنەشە قابىرعالى باسىلىمعا، «قازاقستان» مەملەكەتتىك تەلەراديوكومپانياسى سىندى ءىرى مەدياۇيىمعا باسشىلىق جاساعان قالامگەر وتاندىق جۋرناليستيكانى وركەندەتۋگە قوماقتى ۇلەس قوستى. گازەتتە دە، تەلەارنادا دا جۋرناليستەردىڭ الەۋمەتتىك ماسەلەلەرىن شەشىپ، قامقورلىق جاسادى. «شەرحاننىڭ شەكپەنىنەن شىققان» دەپ ماقتانا الاتىن مايتالمان مامانداردى تاربيەلەدى. ق ر پارلامەنتى ءماجىلىسىنىڭ دەپۋتاتى رەتىندە دە قىرۋار شارۋا اتقاردى. ال، قارىمدى پۋبليسيست، قايراتكەر رەتىندە قوعامنىڭ كوكەيكەستى ماسەلەلەرىن كوتەرىپ، ۇلت مۇددەسى ءۇشىن رياسىز قىزمەت ەتتى. جازۋشىنىڭ «قىزىل جەبە»، «اي مەن ايشا»، «ينتەرنات نانى» سياقتى قۇندى تۋىندىلارى قازاق ادەبيەتىنىڭ ايشىقتى شىعارمالارىنا اينالدى. ىزەتتىلىك پەن زيالىلىقتىڭ ۇلگىسىنە اينالعان ازاماتتىڭ ەلگە سىڭىرگەن ەڭبەگى مەن جارقىن ديدارى حالقىمىزدىڭ جۇرەگىندە ماڭگى ساقتالادى»، - دەدى قارالى جيىندى اشقان مينيستر د.ابايەۆ.
شاراعا قاتىسۋشى زيالى قاۋىم وكىلدەرى جازۋشىنىڭ قازاق جۋرناليستيكاسىنا سىڭىرگەن ەڭبەگى مەن ۇلت مۇددەسى ءۇشىن اتقارعان قىزمەتى تۋرالى ايتىپ ءوتتى.
قازاقستاننىڭ بەلگىلى جازۋشىسى، قوعام قايراتكەرى شەرحان مۇرتازا 9 قازان كۇنى 86 جاسىندا اۋىر ناۋقاستان قايتىس بولدى.
قالامگەرمەن قوشتاسۋ ءراسىمى بۇگىن الماتىدا م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ءوتتى.
