«اۆتوبۋس» جەدەل-پروفيلاكتيكالىق شاراسى بارىسىندا 2 كۇننىڭ ىشىندە پوليسەيلەر جولاۋشىلار اۆتوبۋسىنىڭ جۇرگىزۋشىلەرى جىبەرگەن جول قوزعالىسى ەرەجەسىن بۇزعان 224 فاكتىنى انىقتادى، دەپ حابارلايدى Qamshy.kz اقپارات اگەنتتىگى استانا اكىمدىگىنىڭ باسپا ءسوز قىزمەتىنە سىلتەمە جاساپ.

ونىڭ 38 فاكتىسى – قورشاعان ورتانى لاستاۋ (پايدالانىلعان گاز) جانە شۋ دەڭگەيى. سونداي-اق جاياۋ جۇرگىنشىلەر جولىندا جول بەرمەي ءوتىپ كەتكەن 2 فاكتى مەن رۋلدە كەلە جاتىپ تەلەفونمەن سويلەسكەن 17 وقيعا انىقتالدى.

استانا ءىىد باسپا ءسوز قىزمەتى ايتقانداي، «اۆتوبۋس» جەدەل-الدىن الۋ شاراسى استانا توڭىرەگىندە 9-13 قازان ارالىعىندا اپاتتىڭ بولۋىن تومەندەتۋ ماقساتىندا جۇرگىزۋشىلەردىڭ جولاۋشىلار مەن جۇكتەردى تاسىمالداۋ ەرەجەسىن باقىلاۋدى كۇشەيتۋ ءۇشىن وتكىزدى.

جپش وتكىزۋ كەزەڭىندە جولاۋشىلار اۆتوترانسپورتىنىڭ جۇرگىزۋشىلەرى تاراپىنان جقە قاتاڭ بۇزعانداردىڭ جولىن كەسۋ جانە انىقتاۋ بويىنشا رەيدتىك شارالار وتكىزىلۋدە. سونداي-اق اۆتوبۋستاردىڭ تەحنيكالىق جاعدايى، نورماتيۆ پەن ستاندارت تالاپتارى بۇزىلعان اۆتوبۋستى پايدالانۋ جانە باسقارۋ فاكتىلەرى انىقتالۋدا، جۇرگىزۋشىلەردىڭ ەڭبەك جانە دەمالىس رەجيمى مەن جولاۋشىلاردى تاسىمالداۋداعى بەكىتىلگەن نورمالاردى ساقتاۋى دا تەكسەرىلدى. بۇعان قوسا، پوليسيا قىزمەتكەرلەرى قالالىق اۆتوبۋستاردىڭ تەحنيكالىق جاعدايى مەن جۇرگىزۋشىلەردىڭ جول قوزعالىسى ەرەجەسىن ساقتاعانىنا دا كوڭىل ءبولىپ باقىلادى.

بۇگىندە شاراعا باقىلاۋ ءۇشىن اكىمشىلىك پوليسيا جانە جەرگىلىكتى پوليسيا قىزمەتكەرلەرىنەن، استانا بويىنشا كولىك باقىلاۋ ينسپەكسياسى، مەملەكەتتىك كىرىستەر دەپارتامەنتى مەن قوعام مۇشەلەرىنەن قۇرالعان 10 توپ جۇمىلدىرىلدى.