اقش-تىڭ ەكس-پرەزيدەنتى كىشى دجوردج بۋش ەندى ۋايىمسىز، تىپ-تىنىش ۇيىقتاي بەرسە بولادى. ول 36 جاستاعى ءوزىنىڭ كىشى قىزى باربارا بۋشتى تۇرمىسقا بەردى. ەندى اتا اتانىپ، نەمەرە ءسۇيۋدى اسىعا كۇتىپ ءجۇر. Qamshy.kz اقپارات اگەنتتىگى ششەتەلدىك باق-تاردان اكەسى تانىمال ەكس-پرەزيدەنت بولعان قالىڭدىقتىڭ تويى تۋرالى اقپاراتتى جيناپ، وقىرمان نازارىنا ۇسىنادى.
باربارا بۋش وزىمەن جاسى شامالاس 37 جاستاعى اسا قاتتى تانىمال ەمەس اكتەر ءارى سەناريست كرەيگ كوينعا تۇرمىسقا شىقتى. ولار بىلتىرعى جىلدىڭ قاراشا ايىندا تانىسقان. اراعا بەس اپتا سالىپ كرەيگ كوين بارباراعا سەزىمىن ءبىلدىرىپ، ۇسىنىس جاساعان. ال اتاستىرۋ ءراسىمى 1943 جىلى ۇلكەن دجوردج بۋش پەن ونىڭ جۇبايىنىڭ نەكە قيعان جەرىندە وتكەن.
بۇل تويدىڭ باستى كەيىپكەرى باربارا بۋش "بۇل توي وتە قىسقا ءارى وتە ءتاتتى ەستەلىكتەردى قالدىردى"، دەپ جازدى ءوزىنىڭ الەۋمەتتىك پاراقشاسىنا.
ءبىر جىلعا جۋىق جاقىن ارالاسقان باربارا مەن كرەيگ ارا-قاتىناسىن وسى كەزگە دەيىن جاسىرىپ كەلگەن. ءتىپتى اقسۇيەكتەر وتباسى بۇل تويدى دا قۇپيا تۇردە، حالىقتى شۋلاتپاي، كوپشىلىكتىڭ نازارىنان تىس وتكىزۋدى جوسپارلاعان. الايدا باربارا بۋشتىڭ اناسى شىدامسىزدانىپ، توي سۋرەتتەرىن ءوزىنىڭ الەۋمەتتىك جەلىسىنە جاريالادى.
اقش-تىڭ ەكس-پرەزيدەنتى كىشى قىزىن قالاي ۇزاتتى دەپ ويلايسىز؟ تاڭعالارلىق توي كويلەگى، كوز جاۋىن الاتىن ساراي جانە ءقازىر سانگە اينالعان بىرنەشە قاباتتى تورت پەن تانىمال جارىق جۇلدىزدار مەن جۇزدەگەن قوناقتار. ءدال وسىلاي ەلەستەتتىڭىز بە؟ وكىنىشكە قاراي جوق. توي ءسىز ويلاعاننان مۇلدەم باسقاشا ءوتتى. ءبىزدىڭ ەلدەگى تويلارعا قاراعاندا وتە-موتە قاراپايىم دەڭگەيدە ءوتتى.
امەريكانىڭ 43-پرەزيدەنتى قىزىن اكەسىنىڭ اتلانت مۇحيتىنىڭ جانىندا ورنالاسقان كەننەبانكپورتتاعى قارا شاڭىراقتا شاعىن توي جاسادى.
كوپتەگەن قىزداردىڭ ارمانى اق بوز اتتى حانزاداعا جولىعىپ اق كويلەك كيۋ ەكەنى بەلگىلى. ال اكەسى دە اتاسى دا اقش-تىڭ پرەزيدەنتى بولعان قالىڭدىق ۆەرا ۆونگ ديزاينەرىنىڭ جىبەكتەن تىگىلگەن كويلەگىن تاڭداعان. ال قولىنا باربارانىڭ اتاسى ۇلكەن دجوردج بۋشتىڭ سوناۋ 1970 جىلدارى جۇبايىنا سىيلاعان بىلەزىگىن تاققان. بولدى. اسىپ-تاسىپ بارا جاتقان بايلىعى بولسا دا ءۇستى باسىنا گاۋھاردى، التىن-كۇمىستى جابىستىرا بەرگەن جوق. سونىمەن بىرگە بەس توننا ماكياج تۇگىلى ەرەكشە شاش ۇلگىسىن دە جاساماعان. بارلىعى قاراپايىم ءبىراق ادەمى وتكەن.
قازاقتاردىڭ دا، امەريكالىقتىڭ دا تۋعان-تۋىس، دوس جارانى كوپ. ءبىراق امەريكالىقتار تويعا بارلىعىن بىردەي شاقىرا بەرمەيدى. جۇرت نازارىنان تىس وتكەن تويعا 20 شاقتى جاقىن ادامدار عانا شاقىرىلىپتى. ولاردىڭ قاتارىندا باربارانىڭ ەگىزى دجەننا دا بار. ايتا كەتكەن ءجون ءبىر-بىرى ءۇشىن ءولىپ-وشىپ تۇراتىن ءاپالى-سىڭىلى ەكەۋى جاقىندا «العاشقى بولىپ اپكەم» («سناچالا سەسترا») اتتى اۆتوبيوگرافياسىن جارىققا شىعاردى.
دجەننا باربارادان بىرنەشە مينۋت كەيىن دۇنيەگە كەلسە دە اپكەسىنىڭ الدىن وراپ، ءبىرىنشى بولىپ تۇرمىسقا شىقتى. كىشى دجوردج بۋش 2013 جىلى اتا اتاندى. تۇڭعىش نەمەرەسىنىڭ اتىن مارگارەت قويدى. اراعا 2 جىل سالىپ دجەننا ەكىنشى رەت انا اتانىپ، قىزدى بولدى. ونىڭ اتىن پوپپي دەپ قويدى. ەندىگى كەزەك بارباراعا كەلگەن سىڭايلى.
ءيا، اقسۇيەكتەردىڭ تويى وسىلاي قاراپايىم وتەدى. ال ءبىز كورپەمىزگە قاراي كوسىلە الماي ءجۇرمىز. وكىنىشتى-اق... ەلىكتەگىش بولساق، شەت ەلدىڭ وسىنداي قاسيەتتەرىنەن ۇلگى الساق قايتەدى؟! ءبىزدىڭ قازاقتىڭ اراسىنان ميلليونەر سياقتى توي جاسايتىن ميلليونەردى دە، اي سايىن الاتىن جالاقىسىن كەلەسى ايعا جەتكىزە الماي، قينالىپ جۇرەتىن قىزمەتكەردى دە تاباسىز. سونداعى ماقسات باسقا تۋعان-تۋىستىڭ سوزىنە قالماي، دوس-جاراننىڭ وسەگىنە اينالماۋدىڭ قامى. باتىس ەلدەرى نە ءۇشىن دامىپ جاتىر؟! سەبەبى ولار باسەكەلەستىك دەگەن ۇعىمدى پايدالى جاعىنان قولدانا بىلەدى. ناقتىراق ايتساق، شەت ەلدىكتەر باسەكەلەستىك ارقىلى پايدا تابادى. ال بىزدەر باسەكەلەستىك ارقىلى شىعىنعا باتامىز. بار ايىرماشىلىق تا وسىندا. ويلانايىق، وزگەرىسكە ۇمتىلايىق!
