زاميرا حادجييەۆا ۇلىبريتانيادا ەكى ۇشاق، ەكى ۆيللا، ءتۇرلى اشەكەي بۇيىمدارىن جالپى سوماسى 20 ميلليارد تەڭگەدەن اساتىن اقشاعا ساتىپ العان. بۇل تۋرالى كتك ارناسىنىڭ جاڭالىقتارىندا ايتىلدى.
مۇنداي اقشانى وڭدى-سولدى شاشىپ ءجۇرۋى بريتانيالىق قۇزىرلى ورگانداردىڭ كۇدىگىن تۋعىزدى. ءسويتىپ، شىلدە ايىندا 55 جاستاعى زاميرا حادجييەۆا تەرگەلە باستاعان. ول ازىرگە اقشانىڭ قانداي جولمەن تاپقانىن دالەدەي الماي الەك. ونىڭ كۇيەۋى جاھانگير حادجييەۆ كەزىندە ءازىربايجان ۇكىمەتىنە تيەسىلى حالىقارالىق بانكتى باسقارعان. 2014 جىلى قازاقستاننىڭ ءبىرىڭعاي زەينەتاقى قورى وسى قارجى ۇيىمىنا 71 ميلليارد تەڭگە ينۆەستيسيا سالعان. الايدا كەيىن بانكروت بوپ، 2016 جىلى ونىڭ باسشىسى 15 جىلعا سوتتالىپتى.
ال قازاقستاننىڭ قاراجاتىن ءازىربايجاننىڭ قۇندى قاعازدارىنا الماستىرىپ، ونى جىلدىق 3 پايىز ۇستەماقىمەن 15 جىل بويى قايتاراتىن بولعان.
