شەتەلدىكتەر 150 مىڭ دوللارعا قازاقستان رەسپۋبليكاسىنىڭ ازاماتتىعىن الا الاتىنى جايلى اقپارات شىندىققا سايكەس كەلمەيدى. ب ا ق پەن الەۋمەتتىك جەلىنى شارلاپ كەتكەن سىبىسقا قاتىستى «احقو اكىمشىلىگى» اق باسقارما ءتوراعاسىنىڭ ورىنباسارى مارات ايتەنوۆ وسىلاي جاۋاپ بەردى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

«قازاقستاننىڭ بۇقارالىق اقپارات قۇرالدارى مەن الەۋمەتتىك جەلىلەردە «قازاقستاننىڭ ازاماتتىعىن الۋ ءۇشىن شەتەلدىكتەرگە 150 مىڭ دوللارىن تولەۋ جەتكىلىكتى» دەگەن اقپارات تاراپ كەتتى. ول حابارلامالاردا مۇنداي نورمانىڭ ««استانا» حالىقارالىق قارجى ورتالىعى» تۋرالى ق ر زاڭىنا ەنگىزىلگەن جاڭا وزگەرىستەردە قاراستىرىلعانى جازىلىپ ءجۇر. شىنتۋايتىندا، اتالمىش قۇجاتتا ينۆەستيسيالىق رەزيدەنتتىكتىڭ باعدارلاماسى جازىلعان جانە ول شەتەلدىكتەرگە ازاماتتىق بەرۋدى قاراستىرمايدى»، - دەيدى مارات ايتەنوۆ. ونىڭ حابارلاۋىنشا، ينۆەستورلارعا بەرىلەتىن بارلىق باسىمدىقتار كونستيتۋسيالىق زاڭمەن عانا ەمەس، سونىمەن قاتار احقو قۇجاتتارىمەن دە رەتتەلەتىن بولادى. «الايدا ورتالىقتىڭ قۇجاتتارىندا ينۆەستيسيالىق رەزيدەنتتەرگە ازاماتتىق بەرۋدى قاراستىرۋ ماسەلەسى بۇعان دەيىن كوتەرىلگەن ەمەس، كوتەرىلمەيتىن دە بولادى. سونىمەن قاتار، احقو ءوزىنىڭ جۇمىسىنا قاتىستى بارلىق زاڭ جوبالارى بويىنشا ازاماتتىق قوعامداستىقتارمەن بىرگە كونسترۋكتيۆتى تالقىلاۋ جۇرگىزۋگە تولىق ءازىر»، - دەپ حابارلايدى «احقو اكىمشىلىگى» اق باسقارما ءتوراعاسىنىڭ ورىنباسارى مارات ايتەنوۆ.