كەشە «قازاقستاننىڭ بۇقارالىق اقپارات قۇرالدارى مەن الەۋمەتتىك جەلىلەرىندە «قازاقستاننىڭ ازاماتتىعىن الۋ ءۇشىن شەتەلدىكتەرگە 150 مىڭ دوللار تولەۋ جەتكىلىكتى» دەگەن اقپارات تاراپ كەتتى.
♦ق ر ازاماتتىعى شەتەلدىكتەر ءۇشىن $150 000 تۇرا ما؟
الايدا كەيىننەن بۇل اقپاراتتىڭ اقيقاتقا ساي كەلمەيتىنى انىقتالدى. ءبىراق دۇنيە جۇزىندە مۇنداي اقشاعا ازاماتتىق بەرە سالاتىن ەلدەر بار. ول ءۇشىن ينۆەستور ەل ەكونوميكاسىنا مول قارجى قۇيىپ، قازىناعا كوپ مولشەردە سالىق تولەۋى كەرەك. سونىمەن...
وسىدان ءبىراز ۋاقىت بۇرىن Bloomberg اگەنتتىگى ازاماتتىقتى اقشاعا ساتىپ الۋعا بولاتىن مەملەكەتتەردىڭ ءتىزىمىن جاريالادى. ول ءۇشىن ەڭ الدىمەن ەل ەكونوميكاسىنا ءتيىستى مولشەردە ينۆەستيسيا قۇيۋۋىڭ كەرەك.
سونىمەن قالتاڭىزعا قارجىڭىز سىيماي بارا جاتسا، ءسىز قاي ەلدىڭ ازاماتتىعىن الار ەدىڭىز؟ اگەنتتىكتىڭ دەرەگىنشە، العاشقى وندىققا ون ەل كىرگەن. سونىڭ ىشىندەگى سەگىزى حالىقارالىق ۆاليۋتا قورىنىڭ دەرەگى بويىنشا وفشورلىق ايماق بولىپ سانالادى. ءبىراق ساراپشىلاردىڭ ايتۋىنا قاراعاندا، باي كاسىپكەرلەردىڭ كوبىسى ازاماتتىقتى باسقا سەبەپپەن ساتىپ الاتىن كورىنەدى. ونىڭ ىشىندە قارجىدان جالتارۋ دەرەگى نەگىزگى سەبەپ ەكەنى ءسوزسىز. ال ازاماتتىق الۋعا بولاتىن ەڭ قىمبات ەلدەردىڭ ءبىرى – اۆستريا. اۆستريا ءتولقۇجاتىن الۋ ءۇشىن ءسىز ەل ەكونوميكاسىنا 23،75 ميلليون دوللار قۇيۋىڭىز كەرەك. ودان كەيىنگى ورىندا 2،375 ميلليون دوللارمەن كيپر مەملەكەتى تۇر. ءۇشىنشى ورىندى مالتا ەلى الادى. ول ءۇشىن ءسىز اتالعان ەلدىڭ قازىناسىنا 1،065 ميلليون دوللار ينۆەستيسيا تولەۋىڭىز قاجەت. ءتىپتى مەنشىگىڭىزدەگى ياحتاڭىز بەن ەكى ۇشاعىڭىز ارقىلى دا مالتا ەلىنىڭ ءتولقۇجاتىن الۋعا بولادى. ال ەڭ ارزان ەل قايسى؟ سونىمەن، كىشكەنتاي ارالداعى دومينيكا، سەنت-ليۋسيا، انتيگۋا جانە باربۋدا ەلدەرىنە 100 مىڭ دوللار بەرسەڭىز، قينالماي، جەدەل تۇردە اتالعان مەملەكەتتىڭ ازاماتى اتانا الاسىز. ال ەگيپەت پارلامەنتى بۇعان قاتىستى ارنايى زاڭ قابىلداپ، مۇنى جاقىندا عانا بەكىتتى. ەگەر شەتەلدىك ازامات ەگيپەتتە بەس جىل تۇرىپ، ەل ەكونوميكاسىن دامىتۋعا 400 مىڭ دوللار بولەتىن بولسا، وندا ەلدىڭ ازاماتتىعىن الۋعا تولىق قۇقىسى بار.
...ارينە، باي ادامعا بۇل تۇك ەمەس، ال باسقاعا قيىن.
بەرىك بەيسەن ۇلى
