Whatsapp-تى استانا قالاسىنىڭ قوناقۇيلەرىنىڭ بىرىندە ازاپتاپ ولتىرىلگەن ۇقك قىزمەتكەرى تابىلدى دەگەن اقپارات شارلاپ ءجۇر. انىعىن ايتقاندا، قولى كىسەندەۋلى ءارى سكوچتالىنعان دەلىنگەن بولاتىن. بۇگىنگە دەيىن ءىىد ءلام-ميم دەپ اۋزىن اشپادى. قىسقا-نۇسقا قايىرعاندارى: «ۇستىمىزدەگى جىلدىڭ 16 قازانىندا استاناداعى «الاندا» قوناقۇيىندە ۇقك قىزمەتكەرىنىڭ مۇردەسى تابىلدى. ەشقانداي ازاپتاۋ بەلگىلەرى بايقالمادى». ءىىد باسپا ءسوز قىزمەتى وسىدان باسقا ەشقانداي اقپاراتتى حالىق جاريا ەتە المايتىندىقتارىن ەرەكشە اتاپ ءوتىپتى. «قامشى» ءوز كەزەگىندە ۇقك-گە، ىىم-گە دە ۇزاق قوڭىراۋ شالدى. الايدا حالىقتى تولعانتقان سۇراقتار جاۋاپسىز قالدى. ويتكەنى ورگاندار  تەلەفوندارىن كوتەرمەيدى.

«الاندا» قوناقۇيىنە قوڭىراۋ شالعانىمىزدا رەسەپشىندەگى مەنەدجەر ۆالەريا قانداي دا ءبىر اقپارات بەرۋگە قۇقىلى ەمەستىگىن ايتتى. ونداي قۇقىققا يە اعا مەنەدجەر ورنىندا بولماي شىقتى. «الاندا» ءقوناقۇيىنىڭ ءتورت جۇلدىزى بار. دەمەك بۇل تاپ-تازا، قىزمەت كورسەتىلۋى سىن كوتەرەتىن، ەليتالىق دەڭگەيگە ءسال جەتىڭكىرەمەيتىن ەلوردالىق قوناقۇيلەردىڭ ءبىرى. مۇنداعى ءنومىردى تاۋلىككە جالعا الۋ 35 000 تەڭگەدەن باستالادى. جۇرتتىڭ جاعاسىن ۇستاتقان جاعدايدىڭ قوناقۇيدە ورىن الۋى ءبىرىنشى رەت پە دەگەن سۇراق مەنەدجەرلەر تاراپىنان جاۋاپسىز قالدى.

ءبىر ايتا كەتەتىنى، مارقۇمنىڭ جاسى 25-تە بولاتىن.