5 قىركۇيەكتە قىزىلوردا وبلىسىنىڭ اكىمى قرىمبەك كوشەربايەۆ بايقوڭىرعا ىس-ساپارمەن باردى. وبلىس اكىمى ءىس ساپار بارىسىندا بىرنەشە كوپقاباتتى تۇرعىن ءۇيدىڭ قۇرىلىس جۇمىستارىمەن تانىسىپ، وبلىستىق مەديسينا ورتالىعىنىڭ فيليالى مەن № 1 دەمالىس ورنىن ارالادى.

سول كۇنى «بايقوڭىر» قوناقۇيىندەگى كونفەرەنسيا زالىندا كرىمبەك كوشەربايەۆتىڭ قاتىسۋىمەن بايقوڭىر قالاسى مەن جاقىن ماڭداعى تورەتام جانە اكاي اۋىل-ايماعىنىڭ دامىتۋعا بايلانىستى جيىن ءوتتى.

اتالمىش جيىندا بايقوڭىر قالاسى اكىمشىلىگىنىڭ باسشىسى كونستانتين بۋسىگين مەن اكىمنىڭ ورىنباسارى ۆيكتور لوپاتكين، نيكولاي اداسيەۆ جانە سەرگەي دميترييەۆ، «بايقوڭىر» كەشەنىندەگى ق ر پرەزيدەنتىنىڭ وكىلى سەرىك قوجانيازوۆ، تاعى باسقا قىزمەتكەرلەر قاتىستى. 

ءبىرىنشى بولىپ ءسوز سويلەپ، جيىندى اشقان كرىمبەك كوشەربايەۆ بايقوڭىر قالاسى مەن كوسمودرومدى دامىتۋ بارىسىندا ەكى مەملەكەت اراسىندا ۇلكەن جوبالاردىڭ اتقارىلىپ جاتقانىن تىلگە تيەك ەتتى. سونىمەن بىرگە بىرىككەن جۇمىستىڭ ناتيجەسىندە جاسالعان «بايتەرەك» زىمىراندىق كەشەنى ىسكە قوسىلماق.

«بايقوڭىردىڭ دامۋىنا بايلانىستى كەيبىر ماسەلەردى شەشۋ ماقساتىندا اۋماقتىق دامىتۋدىڭ ۇزاقمەرزىمدى جوبالارى بويىنشا بىرنەشە جوبالار ىسكە اسىرىلىپ جاتىر. اتاپ وتەتىن بولساق، تۇرعىن ءۇي قۇرىلىسى مەن تۇرعىن ءۇيدى گازبەن قامتاماسىز ەتۋ ءۇشىن ارنايى جوبالار ىسكە اسىرىلىپ جاتىر. تاعى ءبىر ايتا كەتەرلىگى تۇرعىندارعا بارلىق جاعدايدى جاساۋ ءۇشىن قالاداعى جول مەن ەسكى تۇرعىن ۇيلەردى قايتا جوندەۋدەن وتكىزۋ جۇمىستارى دا جۇرگىزىلىپ جاتىر. ال بۇگىن ءبىز وسىنداي جوسپارلاردى تالقىلاپ، كەي ماسەلەلەرگە بايلانىستى تۋىنداعان سۇراقتارعا جاۋاپ بەرۋ ءۇشىن جينالىپ وتىرمىز»، دەدى وبلىس اكىمى.

ءبىراق بايقوڭىر قالاسىنداعى اۋقىمدى جوبالاردىڭ بارلىعىن بىردەي ىسكە اسىرىپ، بارلىق مىسەلەلەردى بىردەن شەشۋگە مەملەكەتتىڭ قاراجاتى جەتكىلىكسىز ەكەنىن دە ەسكەرتتى وبلىس اكىمى. ول ماسەلەلەردى بىرتىندەپ، جوسپار بويىنشا شەشەتىنىن اتاپ ءوتتى.

«ءبىز قالاداعى تۇرعىن ءۇي قۇرىلىسىنا، تەحنيكالىق-ەكونوميكالىق نەگىزىندە جاڭارۋ مەن قالاداعى سۋ قۇبىرى مەن كارىس جەلىسىن قايتا جاڭارتۋ ءۇشىن بيۋدجەتتەن بەلگىلى ءبىر مولشەردە قاراجات بولىنەدى. ايتا كەتەرلىگى، قاراجات بەلگىلى ءبىر مولشەردە، رەت-رەتىمەن بولىنەتىنىن ەسكەرگەن ءجون. ال تورەتام مەن اقساي ايماقتارىن دامىتۋ ارقىلى ءبىز بايقوڭىردى دا دامىتىپ جاتىرمىز. جاقىن ارادا بۇل ايماق بايقوڭىر قالاسىنىڭ قۇرامىنا ەنەتىن ىقشام اۋدانعا اينالادى»، دەدى كوشەربايەۆ.

اتالمىش جيىندا اەروعارىشتىق كوميتەتتىڭ ورىنباسارى عالىمجان دانبايەۆ بايقوڭىر ايلاعىنداعى عارىشتىق جوبالار تۋرالى اقپارات بەرىپ، بۇل جوبالاردىڭ بايقوڭىر قالاسى مەن تورەتام، اقساي ايماقتارىنىڭ دامۋىنا قانداي اسەرىن تيگىزەتىنىن اتاپ ءوتتى.