تۇركىستان وبلىسىندا «قازاقستاننىڭ بولاشاعى – قازاق تىلىندە» اتتى سەمينار ترەنينگ وتەدى. وسىعان وراي، وڭىرلىك كوممۋنيكاسيالار قىزمەتىندە باسپا ءسوز جيىنى ءوتتى. وعان قازاقستان حالقى اسسامبلەياسى عىلىمي-ساراپتاما كەڭەسىنىڭ مۇشەسى، ساياساتكەر دوس كوشىم مەن ب ا ق وكىلدەرى قاتىستى، دەپ حابارلايدى Qamshy.kz اقپارات اگەنتتىگى. 

باسپا ءسوز ءماسليحاتىندا مەملەكەتتىك ءتىلدىڭ مارتەبەسى ءسوز بولدى. قازاقستان حالقى اسسامبلەياسى عىلىمي-ساراپتاما كەڭەسىنىڭ مۇشەسى، ساياساتكەر دوس كوشىمنىڭ ويىنشا، قازاق ءتىلىنىڭ مارتەبەسىن كوتەرۋ ءۇشىن حالىقتىڭ بەلسەندىلىگى جوعارى بولۋى كەرەك.

«كەڭەس ۇكىمەتىنىڭ شەكپەنىنەن بوساپ شىققان ەلدەردىڭ اراسىندا مەملەكەتتىك ءتىلدىڭ مارتەبەسىن كوتەرۋ جاعىنان كەمشىن تۇستارىمىزدىڭ بارى جاسىرىن ەمەس. بۇل ولقىلىقتىڭ ورنىن تولتىرۋ ءۇشىن قوعام بولىپ اتسالىسۋ كەرەك. ياعني، مەملەكەت تاراپىنان قازاق تىلىنە جاسالىپ وتىرعان جاعدايدى دۇرىس پايدالانۋىمىز كەرەك. سوڭعى كەزدەرى قوعامدا ءجيى ايتىلىپ جۇرگەن ماسەلەنىڭ ءبىرى مەملەكەتتىك ءتىلدى كوتەرۋ. الەۋمەتتىك جەلىلەردە، جيىنداردا ءتۇرلى ۇسىنىستار مەن پىكىرلەر ايتىلىپ جاتادى. ءبىراق، ءىس جۇزىنە كەلگەندە ەشكىم باس اۋىرتقىسى كەلمەيدى. مەنىڭ ايتقىم كەلگەنى قوعامدا مەملەكەتتىك تىلگە دەگەن سۇرانىستى ارتتىرۋ كەرەك. ازاماتتار تاراپىنان قاجەتتىلىك بولماسا، بۇل ماسەلە سول كۇيى قالا بەرمەك»، – دەدى دوس كوشىم.

سونىمەن قاتار، باسپا ءسوز وتىرىسىندا كيريلل ءقارپىن لاتىن قارپىنە كوشىرۋ جايى دا تالقىلاندى. 2018 جىلدىڭ سوڭىنا قاراي لاتىن قارپىنە نەگىلدەلگەن جاڭا ءالىپبي قابىلداناتىنىن ايتقان سپيكەرلەر وسى ماسەلەگە دە بەيجاي قاراماۋ كەرەك ەكەنىن ايتادى. لاتىن ءقارپىن تالقىلاۋعا قاتىساتىن عالىمدارمەن وتكەن دوڭگەلەك ۇستەلدەردە ءوز ۇسىنىسىن  تالقىلاۋعا سالىپ، بەلسەندىلىك تانىتۋدىڭ ماڭىزى زور ەكەنى ايتىلدى.

باسپا ءسوز جيىنى سوڭىندا 15-17 قازاندا قازاقستاننىڭ وڭتۇستىك وڭىردە، ياعني تۇركىستان، كەنتاۋ، ارىس، شىمكەنت قالالارىندا «قازاقستاننىڭ بولاشاعى – قازاق تىلىندە» اتتى رەسپۋبليكالىق سەميناردىڭ وتەتىندىگى حابارلاندى.