الماتىدا ەسىرتكى قۇرالدارىن، پسيحوتروپتىق زاتتاردى، پرەكۋرسورلاردى تاسىمالدايتىن ارنالاردى شەكتەۋ جانە الدىن الۋ ماقساتىندا «كانال-كراسنىي بارحان» جەدەل الدىن الۋ ءىس-شاراسى جۇرگىزىلۋدە دەپ حابارلايدى Qamshy.kz اقپارات اگەنتتىگى الماتى قالاسى ءىىد باسپا ءسوز قىزمەتىنە سىلتەمە جاساي وتىرىپ.

«بۇل ءىس-شارا قالا ماڭىنداعى شاعىن اۋدانداردىڭ بىرىندە وتكىزىلدى. ءىس-شارا بارىسىندا ەسىرتكىگە تاۋەلدىلەرگە ارنالعان باسپانا تابىلدى. ءۇي يەلەرى – 1969 جىلى تۋعان ش. ەسىمدى ازامات پەن 1984 جىلى تۋعان پ. ەسىمدى ازاماتشا.

ءبىزدىڭ بولىمشەنىڭ قىزمەتكەرلەرى، سوبر جاۋىنگەرلەرى، كينولوگيا قىزمەتتەرىمەن بىرلەسىپ ارنايى ءىس-شارا وتكىزدى، سونىڭ ناتيجەسىندە سوت-حيميالىق ساراپتاما كورسەتكەندەي، جالپى سالماعى 110 گرامنان استام ەسىرتكى زاتى «گەروين» تابىلدى. تەرگەۋ بارىسىندا پاتەرگە ناشاقورلار ەسىرتكى ساتىپ الۋ ءۇشىن كەلىپ جۇرگەنى بەلگىلى بولدى. ايتپاقشى ش.ەسىمدى ازامات بۇرىنىراقتا بوتەننىڭ مۇلكىن ۇرلاعانى ءۇشىن، ال، پ.ەسىمدى ازاماتشا ەسىرتكى قۇرالدارىن ساقتاعانى ءۇشىن سوتتالعان»، - دەپ ايتتى الماتى قالاسى ءىىد ەسىرتكىگە قارسى كۇرەس باسقارماسىنىڭ باستىعى، پوليسيا پولكوۆنيگى نۇرلان موشكالوۆ.

قازىرگى ۋاقىتتا ق ر قك 297 باپ 3 تارماق جانە 302 باپ ەسىرتكى قۇرالدارىن، پسيحوتروپتىق زاتتاردى، ولاردىڭ انالوگتارىن جىبەرۋ نەمەسە ساتۋ ماقساتىندا زاڭسىز دايىنداۋ، وڭدەۋ، ساتىپ الۋ، ساقتاۋ، تاسىمالداۋ، سونداي-اق، وسىلار ءۇشىن ءۇي بەرۋ نەمەسە ۇيىمداستىرۋ بويىنشا تەرگەۋ جۇرگىزىلۋدە. كۇدىكتىلەر الماتى قالاسى ءىىد ۋاقىتشا ۇستاۋ يزولياتورىنا قامالدى.