اتباساردا ەكى جىل بويى قاڭىراپ بوس تۇرعان تۋبەركۋلەز ديسپانسەرىنىڭ عيماراتىنا جەرگىلىكتى اكىمدىك الەۋمەتتىك سالا قىزمەتكەرلەرىن ورنالاستىرماق. ال بالالاردى ەمدەگەن ءبىر قاباتتى نىسانعا جاعدايى تومەن ونشاقتى وتباسىن قونىستاندىرۋدا. الايدا، ۇل-قىزدارىنىڭ دەنساۋلىعىنا الاڭداعان جۇرت بۇل شەشىمگە قارسى. نىساننىڭ دۇرىس دەزينفەكسيالانعانىنا كۇمانى كوپ حالىق ونسىز دا ءالجۋاز پەرزەنتتەرى عيماراتتا ساقتالعان ءقاۋىپتى ينفەكسيانى جۇقتىرىپ الا ما دەپ قاۋىپتەنەدى. بۇل تۋرالى ەۋرازيا ءبىرىنشى ارناسى حابارلايدى.   

«بۇل – اتباسار قالاسىنداعى تۋبەركۋلەزگە قارسى ەمحانانىڭ بۇرىنعى عيماراتى. اتالمىش نىساندا اكىمدىك وكىلدەرى ءقازىر جوندەۋ جۇمىستارىن جۇرگىزىپ، ءتۇرلى الەۋمەتتىك سالا قىزمەتكەرلەرىنە بەرگەن. ال، ءوز كەزەگىندە 4 جىل قاڭىراپ بوس تۇرعان بالالار ەمحاناسىنىڭ ەسكى عيماراتىنا ءقازىر الەۋمەتتىك جاعدايى تومەن ءارتۇرلى وتباسىلار قونىستانباق».

تالاي جىلدان بەرى كوشىپ-قونىپ، اياداي  بولمەگە زار بولعاندار بۇل كۇندە قۇرت اۋرۋىنا شالدىققان بالالاردى ەمدەگەن مەكەمەنىڭ مىنا ءبىر قاباتتى ەسكى عيماراتىن پانالاۋدا. باسقا امالدارى جوق. ولار جاڭا قونىستارىنا شاما-شارقىلارى كەلگەنشە جوندەۋ جۇمىستارىن جۇرگىزىپ العان. ءبىراق، ىشكى كورىنىسى ايانىشتى.  

«مۇندا مەن سەكىلدى جاعدايى تومەن 10-عا جۋىق وتباسى قونىستانعالى جاتىر. بۇل عيمارات بۇرىنعى تۋبەركۋلەزگە قارسى ەمحانانىڭ بالالار ءبولىمىنىڭ عيماراتى. بىزگە بۇل باسپانانى اكىمدىك ۋاقىتشا بەردى، قانشا تۇراتىنىمىز بەلگىسىز. بولمەلەرگە شامامىز كەلگەنشە جوندەۋ جۇرگىزىپ الدىق» - دەيدى اتباسار قالاسىنىڭ تۇرعىنى ارتۋر جامالەتدينوۆ.

كۇننىڭ ىزعارىنا قاراماستان عيماراتتىڭ الدىنا جيىلعان جۇرتتىڭ قاراسى قالىڭ. ءبارىنىڭ  تالاپ-تىلەگى ءبىر، تەك ناۋقاس بالالارىنا تۇراقتى ەم-دوم جۇرگىزەتىن الەۋمەتتىك قىزمەتكەرلەرگە ءجونى ءتۇزۋ عيمارات بەرىلگەنىن قالايدى. 

«مىناۋ تۋبديسپانسەر تۋرالى ايتساق، تۋبديسپانسەردى ءبىزدىڭ بالالارىمىزعا بەرىپ جاتىر. ونىڭ ىشىندە ينفەكسيا ءجۇرىپ جاتىر، - دەيدى. ول ءبىزدىڭ بالالارىمىزعا كەرەك ەمەس. ءوزىمىزدىڭ بالالارىمىز ءالسىز. ءبىز وعان قارسىمىز. سولاردى شەشىپ بەرۋلەرىڭىزدى وتىنەمىز» - دەيدى اتباسار قالاسىنىڭ تۇرعىنى قۇندىز تىلەۋ قىزى.

ال، تۋعاننان دەنساۋلىعىندا ءتۇرلى اۋىتقۋلارى بار بالالاردىڭ اتا-انالارى ءوز پەرزەنتتەرىنىڭ بولاشاعىنا الاڭداۋلى. سەبەبى، قۇلاققا تۇرپىدەي تيەتىن ديسپانسەردە قالعان-قۇتقان ينفەكسيانى يممۋنيتەتى تومەن مۇگەدەك جاندار جۇقتىرىپ الۋى مۇمكىن دەيدى. 

«پۋست اكيمات زاسەليتسيا سيۋدا، ا ناشي دەتي پويدۋت ۆ زدانيە اكيماتا».

مۇمكىندىگى شەكتەۋلى بالالاردىڭ دەنساۋلىعىن ۇدايى باقىلاپ جۇرگەن الەۋمەتتىك قىزمەتكەرلەردىڭ قازىرگى جاعدايى مۇشكىل. ايماقتاعى كەنجەلەپ قالعان ماماندىق يەلەرى، اۋداندىق كىتاپحانانىڭ تاپ-تار 2 بولمەسىن جالعا الىپ، ولمەستىڭ كۇنىن كەشىپ ءجۇر ەكەن. ەرتەڭگى كۇنى ديسپانسەر عيماراتىنا كوشسە وزدەرىنىڭ ەمەس، بالاقايلاردىڭ دەنساۋلىعىنا الاڭداۋلى ەكەندەرىن دە ايتىپ قالدى.

«بىرىنشىدەن، ءبىز مۇمكىندىگى شەكتەۋلى جانداردىڭ دەنساۋلىعىنا الاڭداپ وتىرمىز. سەبەبى، ءبىزدىڭ سالا قىزمەتكەرلەرىن بۇرىنعى جۇقپالى اۋرۋلار اۋرۋحاناسىنىڭ عيماراتىنا كوشىرگەلى جاتىر. ولاردىڭ يممۋنيتەتى ءالسىز. اتالمىش نىسان تولىق ۆيرۋستاردان تازارتىلدى دەگەنگە سەنبەي وتىرمىز» - دەيدى الەۋمەتتىك قىزمەتكەر مارينا نيچەپريەنكو.

الاڭ جۇرتتىڭ ۇلارداي شۋلاۋى بەكەردەن-بەكەر ەمەس. سەبەبى، كەزىندە بۇل عيماراتتا تۋبەركۋلەزدىڭ اشىق تۇرىنە شالدىققاندار ەمدەلگەن ەكەن. 

نارازى تۇرعىندار اتى جامان اۋرۋدىڭ قوزدىرعىشى - "كوح تاياقشاسى" ۇزاق جىلدار بويى ساقتالۋى مۇمكىن ەكەنىن العا تارتادى. ال، جەرگىلىكتى سانيتارلىق دارىگەرلەردىڭ پىكىرى تۇرعىندارعا كەرەعار. ويتكەنى، جەرگىلىكتى قازىنادان تەك دەزينفەكسيا جۇمىستارىنىڭ وزىنە 20 ميلليون تەڭگە ءبولىنىپتى. ماماندار مۇنى تازالىققا كوڭىل ءبولىنىپ وتىرعاندىعىمەن تۇسىندىرەدى.

«بۇگىندە اتالمىش عيماراتقا ەكى دەڭگەيلى دەزينفەكسيا جۇمىستارى جۇرگىزىلدى. جۇرگىزىلگەن جۇمىستار «سانيتارلىق ەرەجە» تالاپتارىنا ساي ورىندالدى. ول ەرەجەدە تۋبەركۋلەزگە قارسى ديسپانسەر جابىلعان جاعدايدا، ارادا بەلگىلى ءبىر مەرزىم وتكەن سوڭ تازارتۋ جۇمىستارى اياقتالعاننان كەيىن پايدالانۋعا بولادى دەلىنگەن. سوندىقتان، ءبىز ەشقانداي ەرەجە بۇزعان جوقپىز» - دەيدى اتباسار اۋداندىق قوعامدىق دەنساۋلىق ساقتاۋ باسقارماسىنىڭ جەتەكشىسى قانات ىسقاقوۆ.

ال اۋدان اكىمى بۇل قىزمەتكە جاقىندا عانا كەلگەنىن، جاعدايمەن ءالى تولىق تانىس ەمەستىگىن ايتىپ، اقتالىپ باقتى. ونىڭ ويىنشا، اتالمىش عيماراتتا ەشقانداي ءقاۋىپتى ينفەكسيالار جوق، ماماندار مۇقيات تەكسەرىپ، بارلىق قۇرال جابدىقتارىن اۋىستىرىپتى.  

«دەنساۋلىق ساقتاۋ ءمينيسترىنىڭ نۇسقاۋى بويىنشا ەكى رەت دەزينفەكسيالىق جۇمىستارىن جۇرگىزىپ، كۆارسيەۆات ەتىپ 4-5 مەكەمەنى سول جەرگە شوعىرلاندىرايىن دەپ وتىرمىز. ءبىز ولارعا ءتۇسىندىرىپ ايتىپ جاتىرمىز. ول مەكەمەدە ەكى جىل ناۋقاستار بولعان جوق. سوڭعى جىلى 13-اق ادام بولىپتى. ول اۋرۋلار جۇقپالى ەمەس، تەك جەڭىل فورماداعى ادامدار بولعان ەكەن» - دەيدى اتباسار اۋدانىنىڭ اكىمى امانبەك قالجانوۆ.      

الىپقاشپا اڭگىمەدەن جۇرەكتەرى شايلىققان تۇرعىندار جەرگىلىكتى بيلىككە تاعى دا دەزينفەكسيا جۇمىستارىن جۇرگىزىڭدەر دەگەن تالاپ قويىپ وتىر. سوندا عانا تىنىشتالىپ، بالالارىمىزدى الاڭسىز ەمدەلۋگە الىپ بارا الامىز دەيدى جۇرت.