ەلىمىزدەگى بۇقارالىق اقپارات قۇرالدارىنىڭ قاتارى قازاقستان مەن جاھانداعى سۋ رەسۋرستارىنا ارنالعان su24.kz جاڭا اقپاراتتىق-تانىمدىق سايتىمەن تولىقتى.

سايتتا سۋ الەمىنە قاتىستى جاڭالىقتاردان بولەك، وزەن-كولدەر تۋرالى تانىمدىق ماتەريالدار، رەسپۋبليكالىق ماڭىزى بار سۋ نىساندارى، سونىمەن قاتار شارۋا قوجالىق باسشىلارى، بىلىكتى سۋ ماماندارى، وسى سالانىڭ ارداگەرلەرى مەن ەكولوگتار، قوعام قايراتكەرلەرىنىڭ سۇحباتتارى ۇسىنىلعان.

«سايتتىڭ يدەياسى اۋىل شارۋاشىلىعى مينيسترلىگى سۋ رەسۋرستارى كوميتەتىنىڭ ءتوراعاسى يسلام ابىشيەۆ مىرزاعا تيەسىلى. الداعى ۋاقىت سايت قولدانۋشىلارى ەلىمىزدىڭ ءار وڭىرىندە ورنالاسقان سۋ قويمالارىن 3D نۇسقادا تاماشالاي الادى. كاسىپكەرلەردىڭ بازاسىن دايىنداپ جاتىرمىز. ول جەردە كەز-كەلگەن قولدانۋشى وزىنە قاجەتتى شارۋا قوجالىعى تۋرالى اقپاراتقا قول جەتكىزەتىندەي مۇمكىندىك جاسايمىز. جىل سوڭىنا دەيىن 30 000 كاسىپكەر تۋرالى مالىمەت جۇكتەلەدى. سايت قىزمەتىنىڭ كەلەسى كەزەڭىندە قازاق تىلىندە جاريالانعان بارلىق كونتەنت ورىس، اعىلشىن تىلدەرىندە قاتار جۇرەدى. جاڭا جىلدان كەيىن «سيفرلى قازاقستان» باعدارلاماسى اياسىندا ەلەكتروندى قۇجات اينالىمى ىسكە قوسىلادى. وسىنىڭ كومەگىمەن ەلىمىزدىڭ ءار وڭىرىندەگى شارۋا قوجالىقتارى يەلەرى سۋعا قاتىستى وپەراسيالارىن ونلاين تۇردە جۇزەگە اسىرادى. تاعى ءبىر تىڭ باستاما – كوپ ۇزاماي مىڭداعان سۋ نىساندارى بەينەلەنگەن ينتەراكتيۆتى كارتا جۇمىس ىستەيدى. ءار وبلىستاعى سۋارمالى جەرلەرگە قاتىستى مالىمەتتەردىڭ بارلىعى وسى كارتادان كورىنىس تابادى. جالپى اۋىز سۋ، ەگىن سۋعا قاتىستى ماسەلەلەر بويىنشا ازاماتتاردان ارىز-تىلەكتەر قابىلدانادى. ولاردىڭ تىكەلەي جاۋاپتى ورىندارعا، باسشىلارعا جەتۋىنە اتسالىسامىز»، - دەيدى سۋ رەسۋرستارى كوميتەتى جانە «قازسۋشار» رمك-نىڭ باسپا ءسوز حاتشىسى ازامات بايعالي ۇلى.