سوڭعى ءبىر اپتادا  قازاقستان قوعامىن ءدۇر سىلكىندىرگەن ەكى وقيعا ورىن الدى. ءبىرىنشىسى – بۇكىل جەلىدە ءسوز بولعان كەشەگى كومسومولدىڭ جىرى بولسا، ەكىنشىسى – وسىدان بەس-التى كۇننەن بەرى تالقىلانىپ، اقيقاتى سوڭىنان اشىلعان ءتىل ماسەلەسى. ارينە، كومسومول وتكەن ءداۋىردىڭ ەلەسى، وعان سونشالىقتى باس قاتىرىپ قاجەتى جوق. كەلەر ۇرپاق ونى كەرەك قىلمايدى دا. ال سوناۋ ارقالىقتاعى دارىگەر ءمولدىر وتەبايەۆانىڭ ماسەلەسى اششى اقيقات، بۇگىنگى كۇننىڭ جىرى. تەك ماڭگىلىك جىرعا اينالماسىن! الايدا...

ونىڭ اقيقاتى ەندى عانا ايتىلا باستادى. بەس كۇن وتكەن سوڭ عانا. بولعان وقيعاعا وراي ەكى تاراپ كەلىستى. بىر-بىرىنەن كەشىرىم سۇرادى. ءبىراق قازاقشا سويلەگەنى ءۇشىن كەشىرىم سۇراۋى كەرەك پە ەدى؟ نامىسىڭ كەلەدى. تىنىشتاندىرۋعا ۇيرەنىپ قالعان ءبىزدىڭ قورقاق اتقامىنەرلەر ايرىقشا بەلسەندىلىك تانىتتى. رەسپۋبليكالىق سايتتاردىڭ بىرىنە بەرگەن سۇحباتىندا دارىگەر ءمولدىر وتەبايەۆا كەش تە بولسا، ماسەلەنىڭ اقيقاتىن اشتى.

–ءبىز بالاسى اۋىرىپ كەلگەن ناۋقاسپەن تاتۋلاستىق. جانجالعا نۇكتە قويىلدى. جۋرناليستەر قانشا سۇراسا دا، مەن وقيعانىڭ  قالاي بولعانى تۋرالى ەشقانداي پىكىر بىلدىرگىم كەلمەپ ەدى. ءبىراق، ماعان جانە مەنىڭ وتباسىما پسيحولوگيالىق قىسىم كورسەتىلگەندىكتەن، بولعان وقيعا جايلى ايتۋدى ءجون كوردىم. مەن ناۋقاستى قاراۋدى ورىس تىلىندە جۇرگىزدىم. ءبىراق، بالانىڭ اناسىنا  ورىسشا اكسەنتپەن سويلەگەنىم ۇنامادى. ءسويتىپ، ول مەنى بالاعاتتادى. «ساۋاتسىز، توپاس» دەپ ءتىل تيگىزدى. ونىڭ بۇل قورلاۋىنا «مەن قازاقپىن. ورىس ءتىلىن جەتىك بىلۋگە مىندەتتى ەمەسپىن. مەن ءوز ءتىلىمدى جاقسى بىلەمىن جانە ءوز انا تىلىمدە سويلەيمىن» دەپ جاۋاپ بەردىم. راسىندا دا ورىس ءتىلىن 100 پايىز بىلمەيمىن. ول مەنەن ورىس تىلىندە ەشقانداي قاتەسىز سويلەۋدى تالاپ ەتتى، – دەيدى ءمولدىر وتەبايەۆا.  

راسىندا دا بۇل جەردە وزىنە قاجەتتى بەينەكورىنىستى عانا بەرگەن ناۋقاس بالانىڭ اناسى اناستاسيا الەكسەەنكونىڭ ارەكەتى ءجون ەمەس. مۇنى ارانداتۋشىلىق دەپ قابىلداعان ءجون. ۇتىلاتىن ەشنەرسە جوق، ءمولدىردىڭ جانىندا كۋاگەرلەر دە بولدى. ءبىراق ورىسقۇل قوعامداعى قازاق جاندايشاپتارى ەكىجاقتى تاتۋلاستىردى، كەشىرىم سۇراتتى.

 –قازاقستان جانە ارقالىق گۇلدەنە بەرسىن. بۇل – كوپ ۇلتتى مەملەكەت. قۋانىشقا وراي، مەن ءوز ەلىمنىڭ پاتريوتىمىن. بۇل بارلىعىنا ساباق بولادى دەپ ۇمىتتەنەمىن، – دەپ جازدى ناۋقاس بالانىڭ اناسى ءوزىنىڭ تۆيتتەردەگى جازباسىندا.

اناستاسيا الەكسەەنكو شىن مانىندە ءوز ەلىنىڭ پاتريوتى بولسا، تىلدىك ماسەلەنى ەشقاشان قوزعاماس ەدى.  مۇنىڭ ءبارى دە قولدان جاسالعان ارانداتۋشىلىق. ال بۇل ماسەلەنى رەسەيدەگى ورىستىڭ ەلەكتروندى اقپارات قۇرالدارى مەن ينتەرنەت كوزدەرى بايبالام سالىپ، قۋانا ايقايلاپ، باستى تاقىرىپ ەتىپ بەردى. «ۆ كازاحستانە ۆراچ وتكازالاس پرينيمات پاسيەنتكۋ س رەبەنكوم يز-زا توگو، چتو ەي زادالي ۆوپروس نا رۋسسكوم يازىكە». ينتەرنەتكە كىرسەڭىز، وسىنداي تاقىرىپتاردان اياق الىپ جۇرگىسىز. ولار ادەيى جازادى، ال ءبىز الەۋمەتتىك جەلىدە شۋلادىق تا، قويدىق.

ءبىزدىڭ اتقارۋشى بيلىكتەگى ورىسقۇل سانا جۇرتشىلىقتىڭ  الدىندا  وتكەلبايەۆانى جىعىپ بەردى. قازاقشا سويلەگەنى ءۇشىن كەشىرىم سۇراعان قىزعا ءبىز دە قورعان بولا المادىق.  قاي ب ا ق وكىلى ىزدەپ بارىپ، ەكى تاراپتى جولىقتىرىپ، ماسەلەنىڭ انىق-قانىعىن زەرتتەدى؟! بىردى-ەكىلى جۋرناليست قوزعاۋ سالعاننان كەيىن عانا مولدىردەن ماسەلەنىڭ اقيقاتىن ەندى ەستىپ وتىرمىز. ۇلتتىق ماسەلەگە كەلگەندە، بەلسەندى ەمەسپىز. ەلدىك ماسەلەگە كەلگەندە نەگە ەنجارمىز؟ قۇلدىق پسيحولوگيادان قۇتىلماي، وسى جۇرگەنىمىز جۇرگەن! قورعان بولا  الماعانىمىز ءۇشىن ءبىز سەنەن كەشىرىم سۇراۋىمىز كەرەك، ءمولدىر؟!

كەشە ماسكەۋدىڭ ورتالىعىندا يسلام كاريموۆكە ەسكەرتكىش اشىلعان كۇننىڭ كەشىندە ورىستىڭ پاتريوتتارى 700 مىڭ ادامعا قول قويعىزىپ، ميتينگ جاسادى. «رەسەيدە مۇنداي ديكتاتورعا ورىن جوق» دەپ بيلىككە تالاپ قويدى. ەندەشە ءبىز دە تالاپ ەتۋىمىز كەرەك. ايتپەسە، ورىسقۇل اتقامىنەر قازاقى سانا وسىلاي بىلگەنىن ىستەيدى. كەشىرىم سۇراتا بەرەدى. جىعىپ بەرەدى، جىعىلا بەرەمىز، جەڭىلە بەرەمىز، كەشىرە بەرەمىز.

 ...ءبىز ءمولدىردى قورعاي المادىق.

بەرىك بەيسەن ۇلى