ءبىلىم كۇنىندە قازاقستاندىق وقۋشىلاردىڭ قۋانىشىندا شەك بولمادى. سەبەبى ايماق بويىنشا بىرنەشە مەكتەپ قاتار-قاتار اشىلىپ، تۇساۋكەسەر ءراسىمى ءوتىپ جاتىر. بۇگىن جامبىل وڭىرىندە 9 مەكتەپتە العاشقى قوڭىراۋ سوعىلىپ، بۇعان دەيىن ءۇش اۋىسىمدا جۇمىس ىستەپ كەلگەن 3 مەكتەپ پەن 3 اپاتتى جاعدايداعى مەكتەپتىڭ ماسەلەلەرى تولىق شەشىلدى.

وبلىس ورتالىعىندا جاڭادان سالىنعان «بايتەرەك» ىقشاماۋدانى تۇرعىندارى مەكتەپتىڭ اشىلۋىن تاعاتسىزدانا كۇتكەن ەدى. ايتا كەتەرلىگى اتالمىش ايماقتىڭ وقۋشىلارى قالاداعى باسقا مەكتەپتەرگە بارىپ وقىعان. ەندى جاڭا وقۋ جىلى قۋانىشتى جاڭالىقپەن باستالىپ، 1200 وقۋشىعا ارنالعان مەكتەپ-ليسەيى اشىلدى. ايتا كەتۋ كەرەك، باس مەردىگەرى «تاراز قۇرىلىس ينۆەست» جاۋاپكەرشىلىگى شەكتەۋلى سەرىكتەستىگى بولعان اتالمىش مەكتەپ «نۇرلى جول» مەملەكەتتىك اعدارلاماسىمەن سالىنعان. جالپى اۋدانى 1920 شارشى مەتردى قۇرايدى.

تاعى ءبىر مەكتەپ «ءشولدالا» يىنىندە №59 ورتا مەكتەبى اشىلدى. «نۇرلى جول» باعدارلاماسى ارقىلى بوي كوتەرگەن بۇل مەكتەپ 900 وقۋشىعا ارنالعان.

وبلىس ورتالىعىنان الىس ورنالاسقان قورداۋ اۋدانىندا دا 2 مەكتەپتىڭ تۇساۋكەسەرى ءوتتى. سوعاندى اۋىلى مەن كوكتوبە اۋىلىنداعى مەكتەپتىڭ سىيىمدىلىعى 50 ورىندى قۇراپ وتىر. بۇل مەكتەپتەر وبلىستىق بيۋدجەتتىڭ تاراپىنان قارجىلاندىرىلعان.

مەركى اۋدانى تەسكەنتوعان اۋىلىنىڭ وقۋشىلارى دا ءبىلىم كۇنى مەرەكەسىن جاڭا مەكتەپكە قارسى الدى. جاڭادان اشىلعان مەكتەپ 150 وقۋشىعا ارنالىپ سالىنعان.

تالدىقورعاندا قوس بىردەي مەكتەپتىڭ اشىلۋ سالتاناتى ءبىلىم كۇنى مەرەكەسىمەن تۇسپا تۇس كەلدى. اتالمىش شاراعا وبلىس اكىمى اماندىق باتتالوۆ تا قاتىسىپ، ءسوز سويلەدى.

«بۇگىن وڭىرىمىزدە 45 مىڭعا جۋىق بالا مەكتەپ تابالدىرىعىن العاش رەت اتتاپ وتىر. كەي اۋدانداردىڭ وزىندە 45 مىڭعا جۋىق حالىق تۇرادى. وسىعان قاراپ، ءبىز بۇگىن مەكتەپكە تۇتاس ءبىر اۋدان تۇرعىندارى كەلدى دەپ ايتۋعا دا بولادى. بۇل وتە قۋانىشتى جاعداي. ەلىمىزدەگى بەيبىتشىلىك پەن تۇراقتىلىقتىڭ ارقاسىندا ۇلتىمىز وركەندەپ، ۇرپاق سانىنىڭ ارتىپ كەلە جاتقاندىعىنىڭ كورىنىسى – بۇل. ءبىز ءوز تاراپىمىزدان وبلىستاعى بالالاردىڭ جاقسى، ساپالى تۇردە ءبىلىم الۋىنا جاعداي جاساۋعا ءتيىسپىز. مىنە، جاڭا وقۋ جىلىندا 7 مەكتەپ پايدالانۋعا بەرىلىپ وتىر. سونىمەن بىرگە 22 وقۋ عيماراتىن كۇردەلى جانە اعىمداعى جوندەۋدەن وتكىزۋگە 6،8 ملرد تەڭگەدەن استام قاراجات جۇمسالدى. ال جەتىسۋدا مەكتەپ سالۋع ءىسى جالعاسا بەرەدى. تاعى ءبىر ايتا كەتەرلىگى جىلدىڭ سوڭىندا 2 مەكتەپتىڭ قۇرىلىسى اياقتالىپ، قولدانىسقا بەرىلەتىن بولادى»، دەدى اماندىق باتالوۆ.