جۇڭگو حالىق رەسپۋبليكاسىندا حالىقارالىق مەرگەندەر سايىسى ءوتتى.  قازاقستان اتىنان جارىسقا تۇسكەن ۇلتتىق ۇلان «بۇركىت» ارنايى جاساعىنىڭ جاۋىنگەرلەرى ءتورت نوميناسياسىنىڭ ناتيجەسى بويىنشا ەكىنشى كوماندالىق ورىنعا يە بولدى، دەپ حابارلايدى Qamshy.kz اقپارات اگەنتتىگى. 

مەرگەندەر جارىسىنا الەمنىڭ 21 ەلىنەن 100 مەرگەن قاتىستى. ۇلتتىق ۇلاننىڭ «بۇركىت» ارنايى جاساعى دالدەپ اتۋدان كۇش سىناسىپ، زور جەتىستىكتەرگە قولجەتكىزدى.

ايتا كەتۋ كەرەك، قازاقستاندىق مەرگەندەر «كەشەندى جاۋىنگەرلىك سنايپينگ» نوميناسياسى بويىنشا ەكىنشى ورىنعا يە بولدى. جاتتىعۋلار تاۋلى ايماقتا ءوتتى. مەرگەندەر 10-نان باستاپ 600 مەترگە دەيىنگى ارا قاشىقتىقتا، جەتى نۇكتەدەن تاپانشا مەن مەرگەندىك مىلتىقتان وق اتتى. 

توپتىق سنايپينگتە دە قازاقستاندىقتار جاقسى ناتيجە كورسەتتى. ۇلتتىق ۇلاننىڭ مەرگەندەرى  باقىلاۋ جانە باعىت تابۋ، تاڭداۋلى نىسانالاردى تابۋ جانە تاۋداعى الىس قاشىقتىقتا ىزدەۋ اتىسى جاتتىعۋلارى بويىنشا 3 جانە 5 ورىنداردى يەلەندى.

ۇلتتىق ۇلاننىڭ «بۇركىت» ارنايى جاساعىنا تۇتقىنداردى بوساتۋ تاپسىرماسى بويىنشا جاتتىعۋدى جاقسى جاسادى. قازاقستاندىق كوماندا بارلىق ءتورت جىلجىمالى «لاڭكەس-تۇتقىن» نىساندارىنا ءدال ءتيىپ، بارلىق قاتىسۋشىلار اراسىندا ۇزدىك ناتيجە كورسەتتى. بۇدان بولەك ارنايى جاساق جاۋىنگەرلەرى ەكى وقپەن ەكى نىسانعا تيگىزىپ ارنايى جۇلدە جەڭىپ الدى.

جارىستى قىتايدىڭ حالىقتىق قارۋلانعان پوليسياسى ۇيىمداستىردى. ونىڭ ماقساتى - ءار ەلدىڭ انتيتەررورلىق كۇشتەرى اراسىندا تاجىريبە الماسۋ جانە دوستىقتى كۇشەيتۋ.

بۇدان بولەك، جارىس تەرروريزممەن كۇرەستە الەۋەتتى ءارى قاراي دامىتۋعا، سونداي-اق، مەرگەندەردىڭ جاۋىنگەرلىك دايارلىعىن جانە كاسىبي بىلىكتىلىگىن كوتەرۋگە باعىتتالعان.

انتيتەرورلىق ارنايى وپەراسيانىڭ ەرەكشەلىكتەرىن ەسكەرە وتىرىپ، اتالمىش جارىستار 12 پاندىك ءتورت ساناتتان قۇرالدى. ونىڭ ۇستىنە، ءار ءتۇرلى جارىستار ءار جەردە ءبىر مەزەتتە وتكىزىلدى.

ەكى جىلدا ءبىر وتەتىن جارىس العاش رەت 2016 جىلى بەيجىڭدە 15 ەلدىڭ قاتىسۋىمەن وتكەن.