"كومسومولدىڭ جىرى" پارلامەنتكە دە جەتتى. ءماجىلىستىڭ بۇگىنگى وتىرىسىن ۆيسە-سپيكەر ۆلاديمير بوجكو ءدال سول "جاس لەنينشىلەردىڭ" تۋعان كۇنىمەن قۇتتىقتاۋمەن باستادى. جانە دە ءوزىن وزگە ارىپتەستەرى ورە تۇرەگەلىپ قولدايتىنىنا سەنىمدى ەدى. ولاي بولمادى. بىردى-ەكىلى قولداعاندار بولدى، ارينە. "اق جولدىق" ازات پەرۋاشيەۆ بوجكونىڭ بۇلاي بۇرا تارتۋىنا جول بەرمەدى. ۆيسە-سپيكەردىڭ تاۋەلسىز قازاقستاندا تۇراتىنىن ەسىنە سالىپ، "رەسپۋبليكادا مۇنداي مەرەكە جوق" دەپ شارت كەتتى. كومسومولشىل بوجكوعا تۇسىنىكتى تىلدە ايتقان پەرۋاشيەۆتىڭ پىكىرىن سول قالپىندا جاريالاپ وتىرمىز (ورىسشادان قازاقشاعا اۋداردىق-رەد.). 
"- ءسىز ەكەۋمىز پارلامەنت ءماجىلىسىنىڭ رەسمي وتىرىسىندا وتىرمىز. ۆلاديمير كارپوۆيچ، ءسىز "ءبىسمىللانى" كومسومولدار مەرەكەسىمەن ارىپتەستەرىڭىزدى قۇتتىقتاۋدان باستادىڭىز.  سوندا قاي ەلدە ءومىر ءسۇرىپ جاتىرسىز؟ ەسىڭىزدەن شىعىپ كەتسە، ايتايىن، ەگەمەندى قازاقستاننىڭ تۇرعىنىسىز. ءبىزدىڭ ەلدە ونداي مەرەكە اتىمەن جوق. سوندىقتان دا قۇتتىقتاۋدىڭ ەش قاجەتتىلىگى جوق. بىرەۋ ءۇشىن جەكەمەنشىك مەرەكە بولسا، ءبىر-بىرىڭىزدى جۇمىستان تىس ۋاقىتتا، باسقا جەردە قۇتتىقتاڭىزدار"،-دەدى ازات پەرۋاشيەۆ.

ارمان سقابىل ۇلى