ەلوردالىق پوليسيا دەپارتامەنتىنىڭ كريمينالدىق پوليسيا قىزمەتكەرلەرى ينتەرنەتتە الاياقتىق جاساعان تاراز قالاسىنىڭ تۇرعىنى 23 جاستاعى كۇدىكتىنى ۇستادى، دەپ حابارلايدى Qamshy.kz اقپارات اگەنتتىگى استانا قالاسى اكىمدىگىنىڭ باسپا ءسوز قىزمەتىنە سىلتەمە جاساپ.

ءتارتىپ ساقشىلارى انىقتاعانداي، الاياق Instagram الەۋمەتتىك جەلىسى ارقىلى توندار جانە تەرى بۇيىمدارىن تومەن باعامەن ساتۋ جانە جەتكىزۋ تۋرالى جالعان اقپاراتتى تاراتقان. ول داۋىسىن تانىپ قويماسىن دەگەن ويمەن «كليەنتتەرمەن» حات الماسۋدى تەك قانا WhatsApp ارقىلى جۇرگىزىپتى. وسىلايشا، زيانكەس ساتىپ الۋشىلاردى قىزىقتىرىپ، تونداردىڭ تاپسىرىس بەرۋشىلەردىڭ ۇيىنە جەتكىزىلەتىنىن ايتىپ، Qiwi-كوشەلەك ارقىلى 100 % تولەمدى تالاپ ەتكەن.

كريمينالدىق پوليسيا باسقارماسىنىڭ ءبولىم باستىعى تالعات بولەگەنوۆتىڭ ايتۋىنشا، جابىرلەنۋشىلەر الاياقتىڭ شوتىنا 100 مىڭنان 300 مىڭعا دەيىن ءىرى سومادا اقشالاي قاراجاتتارىن اۋدارعان. اقشانى العاننان كەيىن الاياق نومىرلەردى بۇعاتتاپ، اككاۋنتتاردى جويىپ، ۇيالى تەلەفوندارىن ءسوندىرىپ وتىرعان.

«وسىلايشا، جەتى ازاماتتى الداعان كۇدىكتى 1،5 ميلليون تەڭگە كولەمىندە پايدا كورگەن. ءقازىر ۇستالعان ادامعا قاتىستى سوتقا دەيىنگى تەرگەۋ امالدارى جۇرگىزىلۋدە».

استانا قالاسىنىڭ پوليسيا دەپارتامەنتى ازاماتتارعا جانە ينتەرنەت ارقىلى ساتىپ الۋشىلارعا تەكسەرىلگەن ينتەرنەت-ونىم بەرۋشىلەرىنىڭ قىزمەتىن عانا پايدالانۋعا، سونداي-اق تاۋاردى جەتكىزگەننەن كەيىن جانە العاننان كەيىن عانا تولەم جاساۋعا كەڭەس بەرەدى.

وسىعان ۇقساس فاكتىلەر بويىنشا جابىرلەنۋشىلەردىڭ سانى ودان دا كوپ بولۋى مۇمكىن. سول سەبەپتى پوليسەيلەر اتالعان ازاماتشانىڭ زاڭعا قايشى ارەكەتتەرىنەن زارداپ شەككەن جابىرلەنۋشىلەرگە استانا قالاسىنىڭ پوليسيا دەپارتامەنتىنە (بەيبىتشىلىك كوشەسى، 19) جۇگىنۋىن نەمەسە 8 (7172) 71-62-91، 71-63-35 تەلەفوندارىنا نەمەسە 102 نومىرىنە قوڭىراۋ شالۋلارىن سۇرايدى.