الماتىداعى تانىمال سيرك ءارتىسىنىڭ ءولۋ سەبەبىن سان-ساققا جۇگىرتكەن الەۋمەتتىك جەلى قولدانۋشىلارى جاۋاپقا تارتىلۋى مۇمكىن. مارقۇم قاسىم ءجۇماعوجيننىڭ تۋىستارى مەن ارىپتەستەرى وسىنداي مالىمدەمە جاسادى. بۇل تۋرالى استانا ارناسىنىڭ جاڭالىقتارىندا ايتىلدى.

وتكەن سەنبىدە قالاداعى تۇنگى كلۋبتاردىڭ بىرىندە شوۋ-باعدارلاما كەزىندە قايتىس بولعان كاسكادەردىڭ ولىمىنە قاتىستى پوليسيا بىرنەشە سوت-مەديسينالىق ساراپتاما تاعايىندادى. الدىن الا بولجام بويىنشا گيمناستيكا شەبەرى جۇرەك تالماسىنان قايتىس بولۋى مۇمكىن. مارقۇم 5 قاراشادا جەر قويناۋىنا بەرىلدى. 

الماتىداعى تۇنگى كلۋبتاردىڭ بىرىندە اجال قۇشقان سيرك ءارتىسىنىڭ ولىمىنە قاتىستى الىپ-قاشپا اڭگىمە ءالى كۇنگە دەيىن باسىلماي تۇر. اسىرەسە، الەۋمەتتىك جەلىلەردە بۇل وقيعانى سان-ساققا جۇگىرتىپ جاتقاندار جەتەدى. ويىن-ساۋىق كلۋبىندا تۇسىرىلگەن مىنا كادرلەر ءقازىر عالامتوردى شارلاپ كەتتى. ينستاگرامدا پايدا بولعان بەينەجازبادا بەتى قان-قان، اق كيىمدەگى ادامنىڭ سۇلباسى جىپكە اسىلىپ تۇر. كۋاگەرلەردىڭ ايتۋىنشا، بۇل سەنبى كۇنى قايتىس بولعان كاسكادەر قاسىم ءجۇماعوجيننىڭ ءوزى. مۇنى سيرك ءارتىسىنىڭ ارىپتەستەرى دە راستادى.   

«بازبىرەۋلەر جازىپ جاتقانداي، فوتودا نەمەسە ۆيدەودا كورسەتىلگەن ارقان ونىڭ موينىنا بايلانىپ تۇرعان جوق. ول كوستيۋمنىڭ ءبىر بولشەگى عانا. ونى كيىمىنەن ارنايى ىلگەك ۇستاپ تۇرادى. قاسىم دەنساۋلىعىنا ەشقاشان شاعىمدانباعان. ءبىراق، كاسكادەر بولۋ سترەسس پەن جۇرەككە قاتتى سالماق سالاتىن كاسىپتىڭ ءتۇرى ەكەنىن ەسكەرگەن ءجون»، - «NOMAD STUNTS» توبىنىڭ PR مەنەدجەرى ەۆگەنيا لي.

قاسىمنىڭ ارىپتەستەرى ءارتىس بيىكتىكتەن جەرگە تۇسىرىلگەن ساتتە دە ءتىرى بولعانىن ايتىپ وتىر. ول ءوزىن جايسىز سەزىنگەن سوڭ، ويىن-ساۋىق كەشىنە جينالعاندار جەدەل جاردەم قىزمەتىن شاقىرعان. ءبىراق دارىگەرلەر كاسىبي سيرك ءارتىسىنىڭ سول جەردە قايتىس بولعانىن انىقتاپتى.  

قاسىم جۇماعوجين - تاجىريبەلى كاسكادەر. ول «Nomad Stunts» توبىنىڭ قۇرامىندا قازاقستاننان تىس گولليۆۋد كينولارى مەن رەسەي تۋىندىلارىندا كاسىبي تريۋكتەر ورىنداۋشلىعىمەن تانىمال. گيمناستيكادان سپورت شەبەرى 3 قاراشادا «حەللوۋين» مەرەكەسىنە وراي شوۋ-باعدارلاماعا شاقىرتۋ العانى بەلگىلى بولدى. زاڭگەر سەرگەي ۋتكيننىڭ ايتۋىنشا كاسكادەر كەشكە جالدانبالى تۇردە كەلسە، كلۋب اكىمشىلىگى جاۋاپقا تارتىلماۋى مۇمكىن.    

«مەنىڭشە، كلۋب پەن بۇل ءارتىستىڭ اراسىندا جازباشا كەلىسىم-شارت بولعانىنا نازار اۋدارۋ كەرەك. ەگەر، ول جەكە ءوزى جالدانىپ قىزمەت كورسەتسە، كلۋب ءۇشىن جاۋاپكەرشىلىك از بولادى. ال، ەڭبەك كەلىسىم-شارتىمەن جۇمىس ىستەپ جۇرسە، بۇل ولىمگە وراي ويىن-ساۋىق كەشەنىن تولىقتاي جاۋاپقا تارتۋعا بولادى. سەبەبى، مۇنداي جۇمىسقا تارتىلعانداردىڭ ءومىرى ساقتاندىرىلۋى كەرەك»، - دەدى زاڭگەر سەرگەي ۋتكين.

دەسە دە، الماتى قالالىق پوليسيا دەپارتامەنتى بۇل ءىس بويىنشا تەرگەۋدىڭ جان-جاقتى ءجۇرىپ جاتقانىن مالىمدەدى. كەشەندى سوت-مەديسينالىق ساراپتاما قورتىندىسىنان سوڭ ءولىمنىڭ ناقتى سەبەبى انىقتالماق.  

مارقۇمنىڭ جارى دا ارنايى ۇندەۋ جاريالاعان ەدى. ول ءارتىستى «اسىلىپ ءولدى»، «بىرەۋ قىلقىندىردى» نەمەسە «ساقتاندىرۋ قۇرالدارى ىستەمەگەن» دەپ داقپىرت تاراتقانداردى سوتقا بەرەتىنىن مالىمدەدى. ونىڭ ويىنشا، قاسىم جانعوجين جۇرەك تالماسىنان قايتىس بولعان.