ماڭعىستاۋ وبلىسى اكىمىنىڭ ورىنباسارىنا قوماقتى اقشانى سلوۆاكيالىق حوككەي قاقپاشىسى بەرگەن.
جەمقورلىققا قارسى ۇلتتىق بيۋرو ورتالىق اپپاراتىنىڭ قىزمەتكەرلەرى وسى اپتادا جوعارى لاۋازىمداعى كەزەكتى شەنەۋنىكتى ۇستادى. شەنەۋنىكتىڭ وتە ۇلكەن كولەمدە پارا العانى انىقتالدى. الگى شەنەۋنىك كىم دەسەڭىزدەر – ماڭعىستاۋ وبلىسى اكىمىنىڭ ورىنباسارى سەرىك امانعالييەۆ. جەمقورلىققا قارسى كۇرەسكەرلەر قالتاسىندا 115 مىڭ ەۋروسى بار اكىم ورىنباسارىن اقتاۋداعى اەروپورتتان ۇستادى. سوت ونى قاماۋعا الدى. كەيىن «ۆرەميا» باسىلىمى انىقتاعانداي، شەنەۋنىك اقشانى سپورتشىدان العان ەكەن. ەكى قازاقستاندىق كوماندادا ويناعان بۇرىنعى سلوۆاكيالىق حوككەيشى يان حوۆان ءبىزدىڭ شەندىگە قوماقتى اقشا بەرگەن. نەگە؟
يان حوۆان كارەراسىن جاقسى باستاپ كەلە جاتقان ەدى. العاشىندا ءوز وتانى ءۇشىن ويناعان سپورتشى كەيىن كاناداعا اۋىستى. 18 جاسىندا «تورونتو مەيپل ليفس» كلۋبىنىڭ ويىنشىسى بولدى. ال 2009 جىلى پاۆلودارلىق «ەرتىسپەن» كەلىسىمگە كەلىپ، ول جەردەن كوكشەتاۋلىق «ارلانعا» اۋىستى. قازاقستانداعى كارەراسىن اياقتاپ، ەۋروپاعا كەتەدى. 2014 جىلى قازاقستاندىق «ەرتىسكە» قايتىپ ورالدى. قازاقستاندا حوۆاننىڭ تۇراقتى جانكۇيەرلەرى دە بولعان.
سپورتتاعى كارەراسىنا نۇكتە قويعان يان حوۆان بيزنەسكە تابان تىرەدى. H + H TECHNIKA اتتى چەح كومپانياسىنىڭ قۇرىلتايشىسى اتاندى. اتالمىش فيرما توڭازىتقىشتار عانا ەمەس، مۇز ايدىندارىنا قاجەتتى تەحنيكانى دا شىعاردى. بۇرىنعى حوككەيشى ءدال وسى باعىتتا جۇمىس ىستەدى.
♦امانعالييەۆ 115 مىڭ ەۋروسىمەن قيماي قوشتاستى. اەروپورتتا... (ۆيدەو)
قازاقستانعا مۇز سارايلارىنىڭ قۇرىلىسىنا قاجەتتى اقشا قۇياتىن ينۆەستور رەتىندە كەلدى. بيىل ونىڭ فيرماسى اقتوبەدەگى مۇز سارايىن سالۋعا كىرىسكەن. ساراي قازاننىڭ باسىندا اشىلدى. جوبا 3،8 ميلليارد تەڭگەگە باعالاندى، 70 پايىز شىعىنىن شەتەلدىك ينۆەستورلار وزدەرىنە الدى. سەبەبى نىسان الەۋمەتتىك بولعان. اشىلۋ سالتاناتىندا يان حوۆان قازاقستاندا تاعى ەكى جوبانىڭ بارىن ايتقان. سونىڭ ءبىرى اقتاۋداعى مۇز ايدىنىنىڭ قۇرىلىسى ەدى. سوعان قاراعاندا، قۇرىلىسقا اقشا ءبولۋ كەرەك ينۆەستور جەرگىلىكتى شەنەۋنىكتەردىڭ دە قالتاسىن ۇمىتپاعان. ياعني يان حوۆان مەن ماڭعىستاۋ وبلىسى اكىمى ورىنباسارىنىڭ اەروپورتتاعى كەزدەسۋى كەزدەيسوق ەمەس. سلوۆاكيا ينۆەستورى شەنەۋنىككە 115 مىڭ ەۋرو بەرىپ تۇرعان جەرىنەن ۇستالدى. ناتيجەسىندە يان حوۆان پارا بەرۋشى، ال سەرىك امانعالييەۆ پارا الۋشى رەتىندە سوت الدىندا جاۋاپ بەرمەك.
