الداعى ۋاقىتتا ەلىمىزدىڭ سولتۇستىك وڭىرىندەگى 40-قا جۋىق اۋىلدى تاراتۋ جوسپارلانىپ وتىر دەپ جازادى Qamshy.kz اقپارات اگەنتتىگى.  ەندىگى جەردى مەملەكەت بولاشاعى بار ەلدى مەكەندەردى دامىتۋ ماقساتىندا عانا قاراجات بولەتىن بولادى.

بۇگىن ەڭبەك جانە حالىقتى الەۋمەتتىك قورعاۋ ءمينيسترى مادينا ءابىلقاسىموۆا جۇمىس بابىمەن سولتۇستىك قازاقستانعا ىسساپارمەن باردى. ول ءىسساپار كەزىندە سولتۇستىك قازاقسان وبلىسىنىڭ الەۋمەتتىك-ەكونوميكالىق دامۋىنىڭ پارامەترلەرىمەن قاتار، وبلىستىڭ تىنىس-تىرشىلىگىمەن تانىسىپ قايتتى. قىزىلجر اۋدانىنىڭ ورتالىعى ەسەپتەلەتىن بەسكولدى ارالاعان مينيستر ءوڭىردىڭ ايتارلىقتاي دامىپ كەلە جاتقانىن، اۋىل تۇرعىندارىنىڭ تۇرمىستىق ساپاسى جاقسارىپ كەلە جاتقانىن ايتىپ ءوتتى.

مادينا ءابىلقاسىموۆانىڭ ايتۋى بويىنشا، 2018 جىلى وڭىرلەردى دامىتۋ باعدارلاماسى جاڭارتىلىپتى. الداعى ۋاقىتتا تەك بولاشاعى بار ەلدى-مەكەندەرگە عانا بيۋدجەتتەن قاراجات ءبولىنىپ، الەۋمەتتىك نىساندار قۇرىلىسى، جول جوندەۋ، سۋ قۇبىرلارىن تارتۋ جانە باسقا دا جاعدايلار جاسالاتىن بولادى.

«سولتۇستىك قازاقستان وبلىسى  ۇلكەن. بۇل وبلىستا تۇرعىندارىنىڭ سانى 50-دەن اسپايتىن 100 شاقتى اسا اۋىل بار. بۇگىندە تۇرعىندارىنىڭ سانى 10-عا جۋىق 38 اۋىلدى تاراتۋ پروسەدۋراسى ءجۇرىپ جاتىر. مەملەكەت باسشىسى رەسۋرستاردى ءتيىمدى پايدالانۋ جانە تەك بولاشاعى بار اۋىل، اۋدان ورتالىقتارىن عان قارجىلاندىرۋ تۋرالى ايتتى. ونداعى تۇرعىندار سانى قانشالىقتى كوپ بولسا، جۇمىس ورنى دا سونشالىقتى كوبەيەدى. سونىمەن قاتار بۇل شاعىن جانە ورتاشا بيزنەستىڭ دامۋىنا نەگىز بولادى»، – دەيدى ءمادينا ءابىلقاسىموۆا.