ولجاس سۇلەيمەنوۆكە باتىرىپ اقىل ايتۋ كۇشەيە ءتۇستى. تالانتتى ءارى ۇزاق عۇمىرىن ۇلتىنىڭ ءوسىپ- وركەندەۋىنە ارناعان تۇلعا قايعىسىن ەشكىمنىڭ باسىنا بەرمەسىن. سول كولىك اپاتىن ءبارىمىز كوردىك. جول ەرەجەسى بۇزىلدى. ارينە، كىم بۇزباي جاتىر دەرمىز. اركىمنىڭ باسىندا بولعان جاي. سول ساتتە ءولىم مەن ءومىر اراسىندا وتقا ورانعان ەسكەندىرگە اينالاسىنداعى جۇرت جۇگىرىپ جەتىپ، قول ۇشىن بەرۋگە جانۇشىردى. ءبىراق، جول ەرەجەسىن بۇزعان پولكوۆنيكتىڭ قىزى ەسكەندىرگە جولامادى. بىردەن تەلەفونىنا جارماستى. ونىڭ تەلەفوننان كىممەن ۇزاق سويلەسكەنى بەلگىلى. جانە وسى وقىس جاعدايدان قۇتىلۋدىڭ شتريح شەشىمدەرى ايتىلعان دا شىعار. ال، سول كەزدە ارمانعا تولى جاس عۇمىر قيىلدى.
ادام. ادامگەرشىلىك. قينالعانعا قول ۇشىن بەر. مەنىڭشە، ماسەلە سوندا. بۇل – قوعام قاسىرەتى... زايىرلى قوعام باتىستا، بىزدە ەمەس دەگەنگە سيگنال.
سوتتا پولكوۆنيكتىڭ قىزى جول ەرەجەسىن بۇزعانىن مويىندادى. وكىنىشپەن جىلاپ، كەش بولسا دا كەشىرىم سۇرادى. قايعى شەككەن جاقتا دا ءۋاج از ەمەس. ەندەشە ءبىز وعان نەگە ارالاسامىز؟
قازاقشىلىققا سالىپ: "الدىڭا كەلسە، اتاڭنىڭ قۇنىن كەش" دەمەكشى، بۇل جاس قىزدى سوتتاتىپ، تەمىر توردىڭ ارتىنا وتىرعىزعاندا نەمەرەسى قايتا كەلمەيدى»، - دەپ ۇكىم شىعارامىز. تىپتەن موتوسيكلدى قاتتى جۇرگىزگەن مارقۇم ەسكەندىر ءوزى كىنالى دەۋشىلەر دە شىقتى.
ءبىز كىمبىز؟ زاڭ بارىنە ورتاق بولسىن دەيمىز دە، ەجەلگى قازاقشىلىقتان شىققىمىز كەلمەيدى. اقىل ايتامىز.
قانداي جاعدايدا دا زاڭ ۇستەمدىگى بولۋى ءتيىس. ولجاس اعامىز دا سونى ايتىپ، سوتقا بارۋدان باس تارتتى. نەمەرەسى ەسكەندىرى تۋرالى جۇرەك جىلايتىن ەسسەسىن وقىڭىزدار. تۇسىنەرسىزدەر ۇلى تۇلعانىڭ جان تەبىرەنىسىن.
ەگەر موتوسيكلدە ولجاس اعامىزدىڭ نەمەرەسى بولماعاندا بۇل وقيعا ءۇش كۇننەن سوڭ ەكى جاقتىڭ كەلىسىمىمەن جابىلىپ قالار ەدى. ەشكىم ول تۋرالى ەشتەڭە بىلمەس ەدى. ونداي جاعداي بولعان، بولا بەرەدى دە.
بۇگىنگى زيالىمىن دەيتىن زامانداستار ەسكىنىڭ كولەڭكەسىندە قالىپ قويماسا دەپ ويلايمىن. زاڭعا باعىنايىق. وركەنيەتتىلىككە ۇمتىلايىق. ولجاس اعامىزدى مازالامايىق.
ماحات سادىق
پىكىر قالدىرۋ