تەمىرتاۋلىقتار «نۇرلى جەر» باعدارلاماسى ارقىلى پاتەرگە يە بولدى دەپ جازادى Qamshy.kz اقپارات اگەنتتىگى. اتالمىش قالادا 1990 جىلدارى بوس قالىپ، ەسكىرگەن كوپ قاباتتى تۇرعىن ۇيلەر «نۇرلى جەر» باعدارلاماسى ارقىلى قايتا قالپىنا كەلتىرىلىپ جاتىر.  ءقازىردىڭ وزىندە قالانىڭ ەسكى ايماعىنداعى جوندەۋدى قاجەت ەتەتىن 90-عا جۋىق پاتەر قايتا جوندەلدى. اتالمىش باسپانالار ءۇيدى الۋعا ۇمىتتەنىپ، كەزەكتە تۇرعان وتباسىلارعا بەرىلدى. قۋانىشتى جايتپەن قاراعاندى وبلىسىنىڭ اكىمى ەرلان قوشانوۆتىڭ ءوزى تۇرعىنداردى جاڭا قونىسپەن قۇتتىقتادى.

ەرلان قوشانوۆ تۇرعىنداردى قۇتتىقتاۋ بارىسىندا بۇل قونىستويدىڭ ءالى دە جالعاساتىنىن ايتتى.

«تۇرعىن ءۇي ماسەلەسىن شەشۋ جۇمىستارى جالعاستىرىلادى. قۇرىلىس جۇرگىزۋگە بىزدە مۇمكىندىكتەر بار. ول ءۇشىن «نۇرلى جەر»، «7-20-25» باعدارلامالارى بويىنشا مەحانيزمدەردى پايدالانامىز، - دەدى ايماق باسشىسى. تەمىرتاۋدىڭ دامۋى ەلباسىنىڭ ەرەكشە نازارىندا تۇر. پرەزيدەنتتىڭ تاپسىرماسى بويىنشا الداعى ايلاردا ەمحانانىڭ قۇرىلىسى باستالادى. سونىمەن قاتار بالاباقشا جانە سپورت كەشەنى سالىنادى. جانەدە تەمىرتاۋلىقتاردى الاڭداتىپ وتىرعان ەڭ باستى سۇراق - جىلۋمەن قامتۋ ماسەلەسى دە شەشىلىپ جاتىر»، دەيدى قاراعاندى وبلىسىنىڭ اكىمى ەرلان قوشانوۆ.

ايتا كەتەتىن بولساق، اتالمىش كوپقاباتتى ءۇيدى قالىپقا كەلتىرۋگە 450 ملن تەڭگە قاراجات جۇمسالعان. وبلىس اكىمىنىڭ سوزىنە سەنسەك، بۇل قاراجات جەرگىلىكتى بيۋدجەتتەن بولىنگەن.

كەزەكتە تۇرعان 83 وتباسى كوپتەن كۇتىپ، ارمانداعان پاتەرگە قول جەتكىزدى. 83 وتباسىنىڭ ارمان تىلەگى ورىندالدى. بۇل وتباسىلاردىڭ كوبىسى مۇمكىندىگى شەكتەۋلى جاندار، بيۋدجەتتىك ۇيىمنىڭ قىزمەتكەرلەرى مەن جالعىز باستى انالار. سونىمەن بىرگە جاڭا قونىسقا يە بولعانداردىڭ قاتارىندا 27 جەتىم بالالار دا بار.

ولاردىڭ قاتارىندا ەربول نۇرپەيىسوۆ پەن ەليزاۆەتا اۋحادييەۆا دا بار. ولار "SOS تەمىرتاۋداعى بالالار اۋىلىنىڭ" تاربيەلەنۋشىلەرى بولىپ تابىلادى.

ەربول قازىرگى تاڭدا تەحنيكالىق ۋنيۆەرسيتەتتەردىڭ بىرىندە «اقپاراتتىق جۇيە» ماماندىعى بويىنشا مەملەكەتتىك گرانت بويىنشا ءبىلىم الىپ جاتىر. وعان ءبىرىنشى قاباتتىڭ ءبىر بولمەلى پاتەر بۇيىرىپتى.

ال ەليزاۆەتا اۋحادييەۆا بولسا ءۇي شارۋاسىنداعى ايەل، جاس انا. ونىڭ ءۇيى جوعارعى قاباتتا ورنالاسقان.

«ماعان 6-قاباتتان ەكى بولمەلى پاتەر بۇيىردى. مەن بۇل پاتەردى ۇزاق ۋاقىت كۇتتىم. پاتەردىڭ قۇرىلىسى ءجۇرىپ جاتقان كەزدە ۇزاق ۋاقىت كەلىپ، كورىپ ءجۇرمىن. بۇل جايت بىزگە كۇيەۋىم ەكەۋمىزگە وتە كەرەمەت جاڭالى بولدى. ءبىز بۇل ۋاقىتقا دەيىن پاتەردەن پاتەرگە كوشىپ، جالدامالى پاتەردى پانا تۇتتىق. ءقازىر ەكى باسىمىز ءۇش بولىپ، وتباسىمىزدىڭ سانىن قىزىمىز ارتتىردى. ءبىز بۇگىن وتە باقىتتىمىز»، دەيدى جاس انا.

جاڭا ۇيدە بارلىق جاعداي قاراستىرىلعان. بارلىعى ساپالى قۇرىلىس ماتەريالدارىنان جاسالىپتى. سونىمەن بىرگە اۋلادا بالالارعا ارنالعان الاڭ دا بار.

سۇلتان ءابىش