بۇگىن استانا قالالىق ەكىنشى سوتىندا ايىپتالۋشى ماليكا مۇحيتوۆا سوڭعى ءسوزىن سويلەدى. بۇل تۋرالى Sputnik قازاقستان ءتىلشىسى حابارلادى.

بۇگىن سوتتا سوڭعى ءسوزىن سويلەگەن ماليكا مۇحيتوۆا مارقۇم ەسكەندىر سۇلەيمەنوۆتىڭ اتا-اناسىنان تاعى ءبىر مارتە كەشىرىم سۇرادى. 

"قولدارىڭىزدان كەلسە، مەنى كەشىرۋدى وتىنەمىن…بۇل قانشالىقتى قيىن ەكەنىن تۇسىنەمىن. مەن بۇلاي بولعانىن شىن جۇرەكتەن قالاماپ ەدىم. تاعى دا قايتالاپ ايتامىن، ەگەر مەن ونى دەر كەزىندە كورگەندە، قايعىلى وقيعاعا جول بەرمەس ءۇشىن بارلىق شارانى قولعا الاتىن ەدىم. وتىنەمىن، راقىمشىل بولىڭىزدار، مەندە ەشقاشان مۇنداي ماقسات بولعان ەمەس. سول كۇندى ەش ۋاقىتتا ۇمىتپايمىن. سول كۇننەن باستاپ بۇكىل ءومىرىم وزگەردى"، — دەپ كوزىنە جاس الدى سوتتالۋشى. 

♦ەسكەندىر سۇلەيمەنوۆتىڭ قازاسى: پولكوۆنيكتىڭ قىزىنا ۇكىم شىقتى

ماليكا اناسى ءار جۇما سايىن شەلپەك ءپىسىرىپ، ەسكەندىردىڭ جانى و دۇنيەدە تىنىشتىق تاپسىن دەپ جالبارىناتىنىن ايتتى.

"بۇلاي بولعانىن قالاعان جوقپىن. ەگەر سىزدەردە ءبىر تامشىداي تۇسىنىستىك بولسا، تاعى ءبىر مارتە وتىنەمىن، مەنى كەشىرىڭىزدەرشى"، — دەپ جىلادى ول. 

♦ولجاس سۇلەيمەنوۆتىڭ نەمەرەسىنىڭ قازاسى: ءىىد باستىعىنىڭ قىزى كىناسىن مويىندادى

ايىپتالۋشى وسىدان ەكى اي بۇرىن مارقۇم ونىڭ تۇسىنە كىرگەنىن ايتتى.

"اق كيىممەن جاعاجاي ماڭىندا جۇگىرىپ ءجۇر ەكەن. ماعان قاراپ كۇلىمسىرەدى، ءبىر كىشكەنتاي قىزبەن ويناپ ءجۇردى. سول ساتتە مەن وندا ءبارى جاقسى شىعار دەپ ويلادىم"، — دەيدى ماليكا. 

سوتتالۋشى ەسكەندىردىڭ اتا-اناسىنان ونى باس بوستاندىعىنان ايىرماۋدى سۇرادى. 

"اكە-شەشەمدى، تۋعان-تۋىسقاندارىمدى، اتا-اجەمدى اياڭىزدارشى. وتىنەمىن، كەشىرىڭىزدەر، مەنى باس بوستاندىعىمنان ايىرماڭىزدارشى"، — دەدى ماليكا مۇحيتوۆا. 

♦ەسكەندىر سۇلەيمەنوۆتىڭ قالىڭدىعى: حاتىم سول كۇيى وقىلماي قالدى

ەسكە سالا كەتسەك، بەلگىلى اقىن، جازۋشى ولجاس سۇلەيمەنوۆتىڭ نەمەرەسى 27 جاستاعى ەسكەندىر سۇلەيمەنوۆ استانادا جول اپاتىنان كوز جۇمعان ەدى.  جول اپاتى ماڭگىلىك ەل – كەرەي جانىبەك حاندار كوشەلەرىنىڭ قيىلىسىندا بولعان. جاس جىگىت موتوسيكل جۇرگىزىپ كەلە جاتقان. ەسكەندىر سۇلەيمەنوۆتى قىزىلوردا وبلىسى ىشكى ىستەر دەپارتامەنتىنىڭ باستىعى، پوليسيا پولكوۆنيگى قايرات ءمۇحيتوۆتىڭ قىزى ماليكا مۇحيتوۆا قاعىپ كەتكەن. 29 جاستاعى ماليكا مۇحيتوۆا وتكەن اپتادا وتكەن سوت وتىرىسىندا مارقۇمنىڭ اتا-اناسىنان جىلاپ كەشىرىم سۇرادى. ءوزىنىڭ كىناسىن تولىعىمەن مويىنداپ، زارداپ شەككەن تاراپقا ماتەريالدىق شىعىندى تولەۋگە دايىن ەكەنىن مالىمدەدى.

♦ولجاس سۇلەيمەنوۆتى مازالامايىق!

24 قازاندا وتكەن سوت وتىرىسىندا زارداپ شەككەن تاراپ سوتتالۋشىدان 14 ميلليون تەڭگە مولشەرىندە ماتەريالدىق شىعىن ءوندىرۋدى تالاپ ەتكەن ەدى. الايدا كەيىن مارقۇمنىڭ وتباسى ول تالاپ-ارىزدى قايتارىپ الدى. 

9 قاراشادا وتكەن ءجارىسسوز بارىسىندا مەملەكەتتىك ايىپتاۋشى الىشەر بارايەۆ ايىپتالۋشى ماليكا مۇحيتوۆانى ەكى جىلعا باس بوستاندىعىنان ايىرۋدى جانە ءۇش جىل كولىك جۇرگىزۋگە تىيىم سالۋدى سۇراعان ەدى. 

بۇگىن مارقۇمنىڭ اتا-اناسى قازاقستاندىقتارعا ۇندەۋ جاساپ، سوتتالۋشىنىڭ شىن وكىنگەنىنە سەنبەيتىنىنە ايتتى.