بۇگىن «نۇر وتان» پارتياسىنىڭ باستاۋىش ۇيىمدارىنىڭ رەسپۋبليكالىق فورۋمى ءوز جۇمىسىن باستادى. العاش رەت وتكىزىلىپ وتىرعان ءىس-شاراعا ەلىمىزدىڭ ءار وڭىرىنەن كەلگەن 600-دەن استام دەلەگات قاتىسۋدا.

اۋقىمدى جيىننىڭ باستى ماقساتى – باستاۋىش پارتيا ۇيىمدارىنىڭ قىزمەتىن جانداندىرۋدىڭ ءتيىمدى جولدارى مەن تەتىكتەرىن تالقىلاۋ. جيىننىڭ اشىلۋىندا «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ بارشا قاتىسۋشىلارعا ساتتىلىك تىلەپ، فورۋمنىڭ ماڭىزىنا توقتالدى.

– ەلباسى بىزگە پارتيا قىزمەتىن جۇيەلى جاڭعىرتۋدى تاپسىرعانىن بىلەسىزدەر. باستاۋىش پارتيا ۇيىمدارىنىڭ تيىمدىلىگىن ارتتىرۋ – سول جۇمىستىڭ باستى باعىتتارىنىڭ ءبىرى. سوندىقتان سوڭعى ايلاردا وسى سالادا ايتارلىقتاي جۇمىستار اتقارىلىپ، شىمكەنت، قاراعاندى، پاۆلودار جانە اقتوبە قالالارىندا باستاۋىش ۇيىمداردىڭ ءتورت بىردەي ايماقتىق فورۋمى ءوتتى. سونىڭ قورىتىندىسى رەتىندە بۇگىن رەسپۋبليكالىق فورۋمدا باس قوسىپ وتىرمىز. وسىنداي يگى باستامالار باستاۋىش پارتيا ۇيىمدارىنىڭ جۇمىسىن زامان تالاپتارىنا ساي جەتىلدىرىپ، ولاردىڭ تيىمدىلىگىن ارتتىرا تۇسەتىنى ءسوزسىز، – دەدى ماۋلەن اشىمبايەۆ.

سونداي-اق پارتيا ءتوراعاسىنىڭ ءبىرىنشى ورىنباسارى فورۋم بارىسىندا ايتىلعان وزەكتى پىكىرلەردى ءار نۇروتاندىق ءتيىمدى پايدالانۋ كەرەكتىگىنە نازار اۋداردى.

– بۇگىنگى ءىس-شارانى سپيكەرلەردىڭ مونولوگى دەپ ەمەس، تاجىريبە الماساتىن، وزدەرىڭىزدى تولعاندىرىپ جۇرگەن ساۋالدارعا جاۋاپ الاتىن، ءوز ۇسىنىستارىڭىز بەن ويلارىڭىزدى جەتكىزەتىن پىكىر الماسۋ الاڭى رەتىندە قاراستىرعان ابزال. سوندىقتان بارشاڭىزدى اشىق جانە ەركىن ديالوگقا شاقىرامىز. ويتكەنى مۇنداي جيىندا جاڭا ادىس-تاسىلدەر ۇيرەنىپ، تاجىريبە الماسىپ، جۇمىس تيىمدىلىگىن ارتتىرۋدىڭ جولدارىن سارالاپ، ساراپتاۋعا مول مۇمكىندىك بار، – دەدى ماۋلەن اشىمبايەۆ.

سونىمەن قاتار فورۋم جۇمىسىنا ۇلتتىق ەكونوميكا ءمينيسترى تيمۋر سۇلەيمەنوۆ، قوعامدىق دامۋ ءمينيسترى دارحان قالەتايەۆ، دەنساۋلىق ساقتاۋ ۆيسە-مينيسترى ءلاززات اقتايەۆا، ءبىلىم جانە عىلىم ۆيسە-مينيسترى اسحات ايتماعامبەتوۆ جانە ەڭبەك جانە حالىقتى الەۋمەتتىك قورعاۋ ۆيسە-مينيسترى نۇرجان التايەۆ قاتىسىپ، ەلباسىنىڭ 5 قازانداعى قازاقستان حالقىنا جولداۋى مەن قازاقستان رەسپۋبليكاسى پرەزيدەنتىنىڭ بەس الەۋمەتتىك باستاماسىن ىسكە اسىرۋ شەڭبەرىندە باستاۋىش پارتيا ۇيىمدارىنىڭ قىزمەتىن جانداندىرۋ ماسەلەلەرىنە قاتىستى ءوز ويلارىمەن ءبولىستى.

ەكى كۇنگە جالعاساتىن فورۋمنىڭ ءبىرىنشى كۇنىندە پانەلدى سەسسيالار ءوتتى. وندا پارتيالىق جۇمىستىڭ حالىقارالىق تاجىريبەسى، بۇقارالىق اقپارات قۇرالدارى مەن الەۋمەتتىك جەلىلەردەگى جۇمىستىڭ زاماناۋي تەحنولوگيالارى، پارتيالىق كادرلىق رەزەرۆ قالىپتاستىرۋ، باستاۋىش ۇيىم جۇمىسىن باعالاۋ جۇيەسى جانە تاعى باسقا دا كوپتەگەن ماسەلەلەر تالقىلانۋدا. سپيكەرلەردىڭ اراسىندا شەتەلدىك ساراپشىلار مەن پارلامەنت دەپۋتاتتارى دا بار.