تانىمال قازاقستاندىق ءانشى ديماش قۇدايبەرگەننىڭ اناسى بولاشاق كەلىنىنىڭ قازاق وتباسىنان شىققانىن قالايتىنىن جەتكىزدى. سونداي-اق، ول الداعى كونسەرتكە دەگەن دايىندىقتىڭ جوسپارداعىداي ءجۇرىپ جاتقانىن ايتىپ ءوتتى دەپ جازادى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الىپ. 

سۆەتا ايتبايەۆا ديماشتىڭ ۇلتتىق قۇندىلىقتاردى جوعارى باعالايتىنىن جانە قازاقى بولمىسىنىڭ ارقاسىندا بولاشاق جارىنىڭ دە قازاق قىزى بولاتىنىنا سەنىمدى ەكەنىنە توقتالدى. ودان جۋرناليست "ديماشتىڭ شەتەلدىك قىزدى قالىڭدىعىم دەپ الىپ كەلۋىنە دايىنسىز با؟"، - دەپ سۇرادى.

"اركىمنىڭ ماڭدايىنا جازىلعان بۇيىرادى. سول سەبەپتى ءبىر جاقسى جاردى كەزدەستىرسە دەگەن تىلەكتەمىز. اركىمنىڭ كوڭىلى ءارتۇرلى ەكەنى ءسوزسىز. دەگەنمەن قازاقى وتباسىندا تاربيەلەنگەن، اعايىن-تۋمامەن ارالاسىپ، بارلىق ۇلت بولمىسى بويىنا سىڭگەن بالانىڭ كوزقاراسى باسقاشا بولاتىن سياقتى"، — دەپ سۆەتا ايتبايەۆا "تاڭعى حابار" باعدارلاماسىندا ۇلىنىڭ شەتەلدىك قىزدى جار ەتىپ تاڭدامايتىنىنا سەنىمدى ەكەنىن ايتىپ ءوتتى.

ءارى قاراي بولاشاق كەلىنىنىڭ قانداي بولعانىن قالايتىنىن سيپاتتاپ بەردى.

"قازاقتا ادەپتىلىگى، كورەگەندىلىگى، تازالىعى مەن يناباتتىلىعى ۇيلەسكەن قىزدى "ادال ءسۇت ەمگەن" دەپ ءبىر اۋىز سوزبەن سيپاتتايدى. ارينە، وسىنداي بولسا ەكەن دەگەن تىلەكتەمىز. كەلىنىمىزدىڭ كورەگەندى جەردىڭ قىزى بولعانىن قالايمىز"، — دەدى سۆەتا ايتبايەۆا.