بۇگىن – ومىرگە قۇلشىنىسى ەرەكشە سابيلەردىڭ كۇنى. 9 ايعا تولماي، انا جاتىرىن تەسىپ شىققان سابيلەردى مەديسينا تىلىمەن «شالا تۋعاندار» دەپ اتايدى. الايدا اعزاسى جەتىلمەي دۇنيە ەسىگىن اشسا دا، ولىممەن كۇرەسىپ، ونى جەڭەتىن نارەستەلەر كوپ.

244 گرامم – الەمدەگى ەڭ شالا تۋعان بالانىڭ سالماعى بۇل. شالا تۋىپ قانا قويعان جوق، ول بالا امان قالدى.

بالانىڭ شالا تۋۋى – سيرەك كەزدەسەتىن جاعداي ەمەس. ستاتيستيكاعا سايكەس، جۇكتى ايەلدەردىڭ 100 پايىزىنىڭ 5-10 پايىزى ومىرگە جەتىلمەگەن بالانى اكەلەدى.

وتكەن زامانداردا شالا تۋعان بالالاردىڭ ءتىرى قالۋى ەكىتالاي بولاتىن. ال بۇگىنگى مەديسينانىڭ قارقىندى دامىپ جاتقان ۋاقىتىندا تولىق جەتىلمەگەن بالالار دامىپ، ادام قاتارىنا قوسىلىپ جاتىر.  

جالپى تولىق 37 اپتادا بوسانعان ايەلدەردىڭ بالاسى جەتىلمەگەن بولىپ سانالادى. نەگىزىنەن سالماقتارى 2 500 گرامم. الايدا 25، ءتىپتى ودان دا از اپتادا دۇنيەگە كەلىپ، نەبارى 1 000 گرامم بولىپ تۋاتىن بالالار دا بار. مەديسينادامۇنداي بالالاردى «ەكستريمالدى شالا تۋعان نارەستە» دەپ اتايدى. نازارلارىڭىزعا دۇنيە ەسىگىن 1 000 گراممعا جۋىق سالماقتا اشىپ، عاجاپ كۇشتىڭ كومەگىمەن ءتىرى قالعان نارەستەلەردىڭ قاتارىن ۇسىنباقپىز.

1.توم تامب

25 اپتادا دۇنيە ەسىگىن اشقان تومنىڭ سالماعى العاشىندا 269 گراممدى قۇرادى. دەنساۋلىعىن قالپىنا كەلتىرۋ ءۇشىن دارىگەرلەر ۇزاق كۇرەستى. جاڭا تەحنولوگيا مەن قارىشتاپ دامىپ جاتقان مەديسينانىڭ ارقاسىندا بالا امان قالدى.

2.اميليا تەيلور

2006 جىلى امەريكادا اميليا تەيلور دەگەن ەرەكشە ءسابي دۇنيەگە كەلدى. ەرەكشىلىگى سول، نەبارى 21 اپتادا انا جاتىرىنان شىعىپ، امان قالعان. 284 گراممداعى اميليانىڭ بويى 24 سم بولعان. دەنەسى ادامنىڭ ءبىر قولىنا سىيىپ كەتەتىندەي. الايدا اعزاسى دۇرىس جەتىلمەي تۋعان اميليا ءومىر ءۇشىن كۇرەستى دە، جەڭدى. ول بۇگىن 12 جاستاعى ارۋ قىز. «بەرىلمەيتىن» دەگەن ماعىنانى بىلدىرەتىن اميليا ەسىمى دە قىزدىڭ زاتىنا ساي.

3.مەليندا ستار گۆيدو

2013 جىلى لوس-اندجەلەستە مەليندا ستار گۆيدو اتتى جەتىلمەگەن ءسابي دۇنيەگە كەلدى. جۇكىتىلكتىڭ 24-اپتاسىندا دۇنيە ەسىگىن اشقان نارەستە بىرنەشە اي ينكۋباتوردا جاتتى، الايدا ول كۇرەستى، ءومىر ءسۇردى.

4.رۋمايسا راحمان

الەمدەگى ەڭ كىشكەنتاي ءسابي رۋمايسا 244 گرامم سالماقپەن دۇنيەگە كەلدى. ال ەگىز-اپكەسى ەكى ەسە ارتىق سالماقپەن، ياعني 567 گراممدا تۋدى. ينكۋباتوردان شىققان ەگىزدەر 10 اپتادان سوڭ-اق ادام بولىپ قالىپتاسىپ ۇلگەردى.

5.مەدەلين مەنن

1989 جىلى 280 گرامم سالماقپەن مەدەلينن دۇنيەگە كەلدى. تۋعاندا ميىنا قان قۇيىلعان، الايدا ءسابيدىڭ ومىرىنە ءقاۋىپ توندىرمەدى. كىشكەنتاي عانا ءسابيدىڭ بۇگىن 29-دا، دەنساۋلىعى دا مىعىم.