الماتى قالاسى ءدىن ىستەرى جونىندەگى باسقارما ۇيىمداستىرۋىمەن بىرنەشە تۋرعا سوزىلعان «ەلتانىم» بايقاۋى مارەسىنە جەتتى. يمامداردىڭ ۇلتتىق قۇندىلىقتاردى قانشالىقتى مەڭگەرگەنىن، ءسالت-داستۇر مەن ۇلى تۇلعالاردىڭ ءدىن جايىنداعى ەڭبەكتەرىنە قاتىستى بىلىمدەرىن ساراپقا سالعان جوبا جوعارى دەڭگەيدە ءوتتى.

مەملەكەتتىك ءتىل جاناشىرى، «ءۇش بايلىق» قوعامدىق بىرلەستىگىنىڭ باسشىسى، قوعام قايراتكەرى و.اسانعازى حانىمنىڭ ۇسىنىسىمەن جۇزەگە اسقان جوباعا الماتى قالاسى ءدىن ىستەرى جونىندەگى باسقارما باسشىسى ا.ەسەنبەكوۆ پەن شاھاردىڭ باس يمامى ە.شوقاي مىرزالار ۇيىتقى بولدى.

العاشقى تۋردان وتكەن 25 يمامنىڭ اراسىنان اقتىق سىنعا 8 ۇمىتكەر جولداما الىپ، كەلەسى باعىتتاردا ب ا ق سىنادى:

1. ۇلتتىق ءسالت-داستۇر مەن يسلام ءدىنى قاعيداتتارىنىڭ ۇندەستىگىنە قاتىستى ءبىلىمىن باعالاۋ؛
2. قازاق دالاسىنا يسلام ءدىنىن تاراتۋشى ۇلى تۇلعالاردىڭ ەڭبەكتەرىن ءبىلۋ دەڭگەيى؛
3. ۋاعىز بارىسىندا سايىسكەر ءتىلىنىڭ ادەبي نورماعا ساي تازالىعىن تارازىلاۋ.

ۇمىتكەرلەر دەڭگەيىن ءدىن مەن داستۇردە جەتىك عىلىم دوكتورلارى، عالىمدار انىقتادى.

سايىس قورىتىندىسى بويىنشا باس جۇلدەنى (300 مىڭ تەڭگە) كۇنى ەرتەڭ اشىلۋ سالتاناتى وتەتىن الاتاۋ اۋدانىنداعى د.قونايەۆ مەشىتىنىڭ باس يمامى م.كۋلسۋماكوۆ جەڭىپ الدى.

1 - ورىن جەتىسۋ اۋدانى سۇلتان-قورعان مەشىتىنىڭ ازانشىسى م.كاسيموۆ (200 مىڭ تەڭگە)؛

2- ورىن بوستاندىق اۋدانى «وربيتا – 3» مەشىتىنىڭ نايب يمامى ە.ماجەن (150 مىڭ تەڭگە)؛

3- ورىن ناۋرىزباي اۋدانى قاراعايلى مەشىتىنىڭ نايب يمامى ت.پەرنەبەك ۇلى (100 مىڭ) يەلەندى.

ال ارنايى نوميناسيا بويىنشا (75 مىڭ تەڭگەدەن) ورتالىق مەشىتتىڭ نايب يمامى ق.اشيموۆ، اۋەزوۆ اۋدانى اقساي مەشىتىنىڭ نايب يمامى ق.ابيشيەۆ يەلەنسە، ەرەكشە كورسەتكىشى ءۇشىن (50 مىڭ تەڭگەدەن) بەكەت اتا مەشىتىنىڭ نايب يمامى ب.سابرالييەۆ، س.راحيمبايەۆتار ماراپاتتالدى. بۇدان وزگە «ەلتانىمنىڭ» بيىك دەڭگەيدە وتۋىنە ات سالىسقان قازىلار القاسىنىڭ مۇشەلەرىنە، بايگەنىڭ ىرىكتەۋ سىنىنا قاتىسۋشىلارى دا العىس حاتپەن ماراپاتتالدى. بايقاۋ بارىسىندا بەلگىلى ونەر جۇلدىزدارى ە.قانايەۆ، ا.تۇرعىنبەك، ب.ءبازىلجانوۆ ونەگەلى سوزبەن ورىلگەن جىر-تەرمەدەن شاشۋ شاشتى. قازىلار القاسىنىڭ مۇشەسى فيلول.ع.ك.، ابايتانۋشى، «حارەكەت»، «جاقسى» كىتاپتارىنىڭ اۆتورى ومار جالەلدىڭ،قوعام قايراتكەرى ورازكۇل اسانعازىنىڭ، ت.ب.ءسوز سويلەگەن بەلگىلى تۇلعالاردىڭ ۇلتتىق رۋحقا دەم بەرگەن لەبىزدەرى «ەلتانىمنىڭ» ابىرويىن اسقاقتاتا ءتۇستى. نۇر-مۇباراك ۋنيۆەرسيتەتىنىڭ رەكتورى، پروفەسسور مۋحامماد ءاش-شاححات ءال-جيندي مىرزا قازاق حالقىنىڭ وتانسۇيگىشتىك ىقىلاستارىنا ريزاشىلىعىن جاۋدىرىپ، مۇنداي شارالارعا ءاردايىم قولداۋ بىلدىرەتىندىگىن جەتكىزدى. ال ۇيىمداستىرۋشى الماتى اكىمدىگىنىڭ باسقارما باسشىسى ايدار راحىمجان ۇلى «ەلتانىم» جوباسى ءداستۇرلى جالعاسىن تابادى دەپ كوپشىلىكتىڭ قۋانىشىن ەسەلەي ءتۇستى.