پاۆلودار وبلىسى ەكىباستۇز قالاسىندا «نۇرلى جەر» باعدارلاماسى اياسىندا نارىقتاعى باعادان ءتورت ەسە ارزان باعادا پاتەر الۋعا مۇمكىندىك بار.

پاۆلودار وبلىسىنىڭ ەكىباستۇز قالاسىندا «قازاقستاننىڭ تۇرعىن ءۇي قۇرىلىس جيناق بانكى» اق ارقىلى ساتىلىمعا قويىلعان توعىزىنشى شاعىن اۋدانداعى جاڭا تۇرعىن ءۇيدىڭ باعاسى ادەتتەگى تۇرعىن ءۇي باعاسىنان شامامەن ءتورت ەسەگە ارزان، ال №21 شاعىن اۋداندا «نۇرلى جەر» مەملەكەتتىك تۇرعىن ءۇي باعدارلاماسى اياسىندا بەس قاباتتى 4 ءۇيدىڭ قۇرىلىسى ءجۇرىپ جاتىر.

«ەكىباستۇز قالاسىنداعى ەنەرگەتيكوۆ كوشەسىندەگى توعىزىنشى شاعىن اۋدانداعى №66، 68، 70 جاڭا بەس قاباتتى ۇيلەردەگى پاتەرلەردىڭ قۇنى ءبىر شارشى مەترىنە 135 مىڭنان 100 تەڭگەگە دەيىن تومەندەگەن. سالىستىرمالى تۇردە ايتار بولساق، نارىقتا تۇرعىن ءۇيدىڭ ءبىر شارشى مەترىنىڭ ورتاشا باعاسى، بۇگىندە، 200 مىڭ تەڭگەنى قۇرايدى. اتالمىش پاتەرلەر «قازاقستان تۇرعىن ءۇي قۇرىلىس جيناق بانكى» اق ارقىلى جۇزەگە اسىرىلادى»، - دەپ مالىمدەدى پاۆلودار وبلىسى ەكىباستۇز قالاسى اكىمدىگىنىڭ باسپاسوز-قىزمەتىندەگىلەر.

ەكىباستۇز قالاسىنىڭ جۇزدەن اسا تۇرعىندارى بۇگىنگى تاڭدا پاتەر ساتىپ الۋ ءۇشىن ءوتىنىم بەرگەن. بۇل جايىندا قارجى-نەسيە مەكەمەسىنىڭ پاۆلودار وبلىستىق فيليالىنىڭ №1 سەرۆيستىك ورتالىعىنىڭ باسشىسى ارمان نۇرعالاموۆ مالىمدەدى. ايتا كەتەيىك، پاتەر الۋ ءۇشىن ءوتىنىم بەرۋ جەتىنشى قازانعا دەيىن جالعاسادى.

ارمان نۇرعالاموۆ ءوز سوزىندە بۇل پاتەرلەردىڭ «نۇرلى جەر» مەملەكەتتىك تۇرعىن ءۇي باعدارلاماسى اياسىندا سالىنعانىن اتاپ ءوتتى. ال بۇل پاتەرلەردىڭ قۇرىلىسىن ەكىباستۇزدىق كومپانيا ج ش س «گيدروپروم» كومپانياسىنىڭ قىزمەتكەرلەرى جۇرگىزگەن.

«گيدروپروم» دشس كومپانياسىنىڭ قىزمەتكەرلەرى وزدەرىنىڭ جۇمىسىنا ەكى جىلدىق كەپىلدىك بەرەدى. ولار اعىمداعى جىلدىڭ شىلدە ايىندا پايدالانۋعا بەرىلگەندىگىن دە اكىمدىك اتاپ ءوتتى. پاتەرلەر تولىعىمەن جوندەلگەن، تاپ-تازا قالپىندا تۇرعىندارعا تابىستالادى. تۇرعىن ۇيگە قول جەتكىزۋ ءۇشىن پاتەردىڭ جالپى سوماسىنىڭ 20 پايىزىن باستاپقى جارنا رەتىندە وتەۋى قاجەت، ارى قاراي باسپانا نەسيەسى رەتىندە بەرىلەدى.

بەلگىلى بولعانداي، بۇل ۇيلەردەگى پاتەرلەر ءبىر بولمەلى، ەكى بولمەلى جانە ءۇش بولمەلى بولىپ سالىنعان، جالپى سانى – 180 پاتەر.

«ءبىر بولمەلى پاتەرلەردىڭ اۋدانى 44 شارشى مەتردى قۇرايدى، ال ەكى بولمەلى پاتەرلەر 54 شارشى مەتردەن تۇرسا، ءۇش بولمەلى پاتەرلەردىڭ جالپى اۋدانى 75 شارشى مەتردەن تۇرادى.  ءبىر بولمەلى پاتەردىڭ قۇنى 4،4 ميلليون بولسا، ونىڭ العاشقى جارناسى 900 مىڭ تەڭگەنى قۇرايدى، ال ەكى بولمەلى پاتەر 5،4 ميلليون تەڭگە، العاشقى جارنا رەتىندە 1،1 ميلليون تەڭگەنى تولەۋدى قاجەت ەتەدى، ءۇش بولمەلى پاتەردىڭ قۇنى 7،5 ميلليون بولسا، ونىڭ العاشقى جارناسى 1،5 ميلليون تەڭگەنى قۇرايدى»، - دەپ اتاپ ءوتتى ارمان نۇرعالاموۆ.

سونىمەن قاتار، ارمان نۇرعالاموۆ پاتەر الۋ ءۇشىن دە وزىندىك شارتتار بار ەكەنىن اتاپ ءوتتى. ەڭ الدىمەن، «تۇرعىن ءۇي قۇرىلىس جيناق بانكىندە» دەپوزيتتىك شوت اشتىرىپ، العاشقى جارنانى سول جەردە جيناۋ قاجەت.

«پاتەر نەسيەسى 70 جاسقا دەيىنگى تۇرعىندارعا بەرىلەدى. جىلدىق ءوسىمى بەس پايىزدان كوپ ەمەس. نەسيەنىڭ ماكسيمالدى ۋاقىتى ون توعىز جىلعا دەيىن سوزىلادى. سونىمەن بىرگە، نەسيەنى 15 جىلعا الىپ، ونى ون جىلدا جاۋىپ تاستاۋعا دا بولادى»، - دەپ مالىمدەدى قارجى-نەسيە مەكەمەسىنىڭ پاۆلودار وبلىستىق فيليالىنىڭ №1 سەرۆيستىك ورتالىعىنىڭ باسشىسى.

ونىڭ ايتۋىنشا، نەسيەنى ۋاقىتىنان بۇرىن تولەۋ ءۇشىن ەشقانداي دا ايىپپۇلدار مەن سانكسيا سالىنبايدى. تەك، العاشقى جارتى جىلدا نەسيەنى بەلگىلى گرافيك بويىنشا تولەپ تۇرۋ قاجەت. پاتەرلەردى ۇلەستىرۋ كونكۋرس ارقىلى جۇزەگە اسىرىلاتىن بولادى، پاتەر الۋعا ءوتىنىم قابىلداۋ ءالى ءجۇرىپ جاتىر.

«پاتەر الۋعا ءوتىنىم بەرگەن تۇرعىننىڭ بۇرىن سوڭدى نەسيە العان با، ونى ۋاقىتىلى تولەگەن بە، پاتەر نەسيەسىن تولەۋگە شاماسى جەتە مە جانە سوڭعى التى اي كولەمىندە زەينەتاقى شوتىنا تولەم جاسالعان با – وسىنىڭ بارلىعى دا تەكسەرىلەدى. سونىمەن قاتار، قانداي دا ءبىر تۋىسىن نەمەسە ءۇشىنشى جاقتاعى ادامدى كەپىل رەتىندە كورسەتۋگە بولادى. ەگەر دە بارلىعى ءساتتى وتسە، اعىمداعى جىلدىڭ قاراشا ايىندا تۇرعىندار جاڭا پاتەرگە قول جەتكىزىپ، قونىس تويىن تويلاي الادى دەپ ويلايمىن»، - دەپ اتاپ ءوتتى ساراپشى.

پاۆلودار وبلىسى ەكىباستۇز قالاسى اكىمدىگىنىڭ حابارلاۋىنشا، «نۇرلى جەر» مەملەكەتتىك تۇرعىن ءۇي باعدارلاماسى اياسىندا بەس قاباتتى ءتورت تۇرعىن ءۇيدىڭ قالانىڭ №21 اۋدانىندا قۇرىلىسى ءجۇرىپ جاتىر. ول تۇرعىن ۇيلەردى اعىمداعى جىلدىڭ اياعىنا قاراي پايدالانۋعا بەرۋ جوسپارلانۋدا. بۇل اۋدانداعى پاتەرلەر دە «تۇرعىن ءۇي قۇرىلىس جيناق بانكى» ارقىلى نەسيەگە بەرىلەتىن بولادى.