ق ر قورعانىس مينيسترلىگىنىڭ اقپاراتتىق ساياساتىن ءتيىمدى جۇرگىزگەنى جانە قازاقستان اسكەرىنىڭ بەدەلىن نىعايتۋدا قوسقان ۇلەسى ءۇشىن الماتى وبلىسىنىڭ ءبىرقاتار تىلشىلەرى گراموتالارمەن ماراپاتتالدى.

قازاقستان رەسپۋبليكاسى تۇڭعىش پرەزيدەنتى كۇنىنە وراي الماتى وبلىسى قورعانىس ىستەرى جونىندەگى دەپارتامەنتىندە سالتاناتتى جيىن بولىپ ءوتتى. جەرگىلىكتى اسكەري باسقارۋ ورگانى باستىعىنىڭ مىندەتىن ۋاقىتشا اتقارۋشى پودپولكوۆنيك سەيىلجان بەكمۇراتوۆ قارۋلى كۇشتەردىڭ تىنىس-تىرشىلىگىن جاريالاۋدا قوسقان ۇلەستەرى ءۇشىن قىلقالام شەبەرلەرىنە العىسىن ءبىلدىرىپ، «جەتىسۋ» تەلەارناسىنىڭ باس رەداكتورى نازگۇل بوشاندى قورعانىس ءمينيسترى نۇرلان ەرمەكبايەۆتىڭ اتىنان كەلىپ تۇسكەن گراموتامەن ماراپاتتادى.

سونداي-اق، «Tinfo» جەلىلىك اگەنتتىگىنىڭ باس رەداكتورى دياس بەيسەنبەك، قالماحانبەت مۇقامەتقالي («ەگەمەن قازاقستان» گازەتى)، يرينا كارياكينا («وگني الاتاۋ» گازەتى)، ماۋلەن انەرباي «جەتىسۋ» گازەتى)، گۇلميرا تەمىرعالييەۆا («ديالوگ-جەتىسۋ»)، الما ورازايەۆا («Taldykorgan-online.kz») سىندى ءبىرقاتار جۋرناليستەر الماتى وبلىسى قورعانىس ىستەرى جونىندەگى دەپارتامەنتى باستىعىنىڭ گراموتالارىمەن ماراپاتتالدى.

* ءبىز قازاقستاندىق اسكەرلەردىڭ تىنىس-تىرشىلىگىن كاسىبي تۇرعىدا جاريالاپ كەلە جاتقان ۇزدىك تىلشىلەردى ماراپاتتادىق. الداعى ۋاقىتتا دا بىرلەسە جۇمىس اتقارىپ، ءوزارا ىنتىماقتاستىعىمىز ارتا بەرەدى دەگەن سەنىمدەمىن، - دەپ اتاپ ءوتتى الماتى وبلىسى ءقىد باسپا ءسوز قىزمەتىنىڭ باستىعى لەيتەنانت جانار ءامىرجانوۆا.