قازاقان شىققان تۇڭعىش وليمپيادا چەمپيونى جاقسىلىق ۇشكەمپىروۆ اقتوبەلىك سپورتشىلارعا جەتىستىككە جەتۋدىڭ سىرىن اشتى.

1980 جىلعى گرەك-ريم كۇرەسىنەن ماسكەۋ وليمپياداسىنىڭ چەمپيونى جاقسىلىق ۇشكەمپىروۆ ىس-ساپارمەن اقتوبە قالاسىنا كەلدى. ءىس-ساپار كەزىندە وڭىردەگى جاڭادان بوي كوتەرگەن سپورت نىسانداردى ارالاپ، سپورتشىلارمەن كەزدەستى. الدىمەن، بيىل قازان ايىنداعى ەلباسىنىڭ اقتوبە وبلىسىنا ساپارى بارىسىنداعى ەكى جاڭادان اشىلعان «اسە» تەننيس ورتالىعى مەن مۇز سارايىنا بارىپ، عيماراتتاردىڭ جاي-كۇيىمەن تانىستى.

ودان ءارى قازاقتىڭ ايگىلى پالۋانى اۋىل بالالارى تاربيەلەنىپ جاتقان ەسەت باتىر اتىنداعى مەكتەپ-ينتەرنات-كوللەدجىنە باردى. ول جاستارعا تىلەك سوزدەر ارناپ، جەتىستىككە جەتۋدىڭ قيىن جولى تۋرالى شىندىقتى ايتتى. 

-ءقازىر قانداي جارىسقا بارامىز دەسەك تە جولىمىز اشىق. ال، بۇرىندا 15 رەسپۋبليكانىڭ ىشىنەن جالعىز باراتىنبىز. مەن سوۆەت وداعىنىڭ چەمپيونى بولا تۇرا، 25 جاسىمدا مونرەالگە بارا المادىم. قايتكەندە تاعى 4 جىل كۇتىپ، 30 جاسىمدا وليمپياداعا بارىپ، چەمپيون اتاندىم. 31 جاسىمدا الەم چەمپيونى بولدىم. 32 جاسىمدا الەم كۋبوگىن جەڭىپ الدىم. قايتادان سوۆەت وداعىنىڭ چەمپيونى بولىپ، ۇلكەن سپورتتى قويدىم. سپورتتىڭ، جالپى كەز كەلگەن سالانىڭ شىڭىنا شىعۋ ءۇشىن سوعان بۇكىل ءومىرىڭدى ارناۋىڭ كەرەك. ەلىم، حالقىم، جەرىم دەپ ايانباي تەر توگىپ، جۇمىستى اياعىنا دەيىن جەتكىزۋ قاجەت. ەستەرىڭدە بولسىن، ءوزىم ءۇشىن دەسەڭدەر، ەشقاشان جەڭىسكە جەتپەيسىڭدەر، - دەدى جاقسىلىق ۇشكەمپىروۆ جاستاردىڭ الدىندا.

سونىمەن قاتار، جاقسىلىق ۇشكەمپىروۆ اقتوبە وبلىسىنىڭ وليمپيادا رەزەرۆىن دايارلاۋ ورتالىعىندا باستاۋ العان بوكستان Cسرو حالىقارالىق دارەجەدەگى سپورت شەبەرى باۋىرجان اقشولاقوۆتى ەسكە الۋعا ارنالعان حح حالىقارالىق ءتۋرنيرىنىڭ سالتاناتتى اشىلۋىنا قاتىستى. شارادا ءسوز العان وليمپيادا چەمپيونى، بارلىق قاتىسۋشىلارعا ساتتىلىك تىلەپ، ءوزىنىڭ قۇتتىقتاۋ ءسوزىن ارنادى.

وسىلايشا، قازاق پالۋانى اقتوبە سپورتىنىڭ تىنىس تىرشىلىگىمەن تانىسىپ، وعان وتە جوعارى دەگەن باعا بەردى.

-قازىرگى بالالارىمىز وتە باقىتتى دەپ ەسەپتەيمىن. سەبەبى، مىناداي جاعداي ءبىزدىڭ كەزىمىزدە بولعان جوق. ايماقتا سپورتشىلاردىڭ جۇيەلى تۇردە سپورتپەن شۇعىلدانۋىنا بارلىق جاعداي جاسالىنعان. جىل سايىن ايماق كوركەيىپ، سپورت نىساندارى كوپتەپ سالىنىپ جاتىر. سول سەبەپتى دە، وبلىس باسشىسى بەردىبەك ساپاربايەۆقا سپورتقا دەگەن ەرەكشە قولداۋى ءۇشىن  ۇلكەن العىسىمدى بىلدىرەمىن،- دەدى جاقسىلىق ۇشكەمپىروۆ.