«نۇرلى جول» ينفراقۇرىلىمىن دامىتۋ باعدارلاماسىن ىسكە اسىرۋ بارىسىندا مەملەكەتتىك باعدارلامانىڭ ەلىمىزدىڭ جالپى ىشكى ءونىمىنىڭ وسۋىنە ايتارلىقتاي اسەر ەتىپ، سونىمەن قاتار، جاڭا جۇمىس ورىندارىن اشۋعا جانە الەۋمەتتىك ينفراقۇرىلىمدى جاقسارتۋعا ەداۋىر ىقپال ەتكەنىن بايقاۋعا بولادى. سونىمەن بىرگە، بۇكىل قازاقستان بويىنشا قازىرگى زامان تالابىنا سايكەس ءارى ساپالى اۆتوجولداردى سالۋعا باسا نازار اۋدارىلدى.

ەلباسى نۇرسۇلتان نازاربايەۆ ءوزىنىڭ 2017 جىلدىڭ قاڭتارىندا جاريالاعان «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا وتكەن جىلدا «نۇرلى جول» باعدارلاماسى تولىقتاي اقتالىپ، ەداۋىر جاقسى ناتيجە بەرگەندىگىن جانە ەكونوميكانى تولىققاندى جۇرگىزۋشىسى رەتىندە ودان ءارى ىسكە اسىرۋ مىندەتىن قويعانىن اتاپ وتكەن بولاتىن.

«قازىرگى تاڭدا جالپى ۇزىندىعى 4،6 مىڭ شاقىرىمدى قۇرايتىن رەسپۋبليكالىق ماڭىزى بار اۆتوموبيل جولدارىن سالۋ جانە قايتا جاڭارتۋ بويىنشا 23 جوبانى جۇزەگە اسىرۋ جوسپارلانىپ وتىر. ونىڭ ىشىندە 528 شاقىرىمى جىلدىڭ سوڭىنا دەيىن پايدالانۋعا بەرىلمەك. ەلدىڭ كولىكتىك جانە ترانزيتتىك الەۋەتىن تولىعىمەن كوتەرۋ ءۇشىن كورشىلەس ەلدەرمەن ءوزارا ىنتىماقتاستىق پەن ۇيلەستىرۋ قاجەت. تاۋارلاردى ترانزيتتەۋدىڭ ەركىندىگىن قامتاماسىز ەتىپ، كولىك دالىزدەرىن قۇرىپ، ولاردى جاڭعىرتۋ قاجەت. كولىك ينفراقۇرىلىمىن باسقارۋ مەكەمەسىنە، سەرۆيس قىزمەتىنىڭ وتە ساپالى ءارى جوعارى دەڭگەيدە بولۋىنا جانە اكىمشىلىك كەدەرگىلەردىڭ تولىعىمەن جويىلۋىنا باسا نازار اۋدارۋ قاجەت. ترانسكاسپييلىك ءدالىزىنىڭ بويىنداعى قوزعالىس كولەمىنىڭ ۇلعايۋىنا بايلانىستى قۇرىق پورتى قۇرىلىسىنىڭ ەكىنشى كەزەڭىنە اياق باسىپ، جولدى كەسىپ وتۋگە مۇمكىندىكتەر جاساۋدى قولعا الۋ قاجەت»، - دەلىنگەن جولداۋدا.

2018 جىلى اۆتوموبيل جولدارىن سالۋ مەملەكەتتىك باعدارلاماسى بويىنشا جۇمىس ورنىنىڭ سانى دا ەداۋىر كوبەيگەن. ەگەر 2017 جىلى 100 مىڭنان استام جۇمىس ورنى اشىلىپ، ونىڭ 70 پايىزى جول قۇرىلىسىنا باعىتتالعان بولسا، 2018 جىلى رەسپۋبليكالىق ماڭىزى بار اۆتوموبيل جولدارىنىڭ قۇرىلىسىندا 75 مىڭ جۇمىس ورنى پايدا بولعان. بۇل كورسەتكىش وتكەن جىلمەن سالىستىرعاندا جۇمىس ورنىنىڭ كوبەيگەنىنىڭ ناقتى دالەلى بولا الادى.

«نۇرلى جول» باعدارلاماسى اياسىندا 2020 جىلعا دەيىن 6،5 مىڭ شاقىرىمعا جۋىق اقىى جولدى ەنگىزۋ جوسپارلانىپ وتىر. ولاردىڭ ىشىندە اعىمداعى جىلى 471 شاقىرىم ىسكە قوسىلدى. ولار: استانا-تەمىرتاۋ باعىتىنداعى اۆتوموبيل جولى، الماتى-قاپشاعاي باعىتىنداعى اۆتوموبيل جولى جانە الماتى-قورعاس باعىتىنداعى اۆتوموبيل جولى بولىپ تابىلادى.

جالپى، 2020 جىلعا دەيىن جەتى مىڭ شاقىرىم جولدى رەكونسترۋكسيالاپ، قۇرىلىسىن جۇرگىزۋ جوسپارلانىپ وتىر. سونىمەن قاتار، ترانزيتتىك كونتەينەرلىك جۇك تاسىمالىنىڭ سانىن 10 ەسەگە دەيىن – 2 ميلليون كونتەينەرگە دەيىن ارتتىرۋ كوزدەلۋدە.  ال اۋە جولاۋشىلارىنىڭ تاسىمالىن 4 ەسەگە دەيىن – 1،6 ميلليونعا دەيىن ارتتىرۋ جوسپارلانۋدا.