2018 جىل اقتوبە وبلىسىندا بالا جىلى دەپ جاريالانىپ، ونىڭ شەڭبەرىندە «باقىتتى بالا» اۋقىمدى جوباسى ىسكە اسىرىلدى. باستامانى ءبىلىم جانە عىلىم مينيسترلىگى، وتباسى جانە بالالار ماسەلەلەرىمەن اينالىساتىن حالىقارالىق ۇيىمدار مەن قايىرىمدىلىق قورلارى قولدادى.
بۇل تۋرالى اقتوبە وبلىسىنىڭ اكىمى بەردىبەك ساپاربايەۆ ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا حابارلادى.
- جوبا پرەزيدەنتتىڭ «رۋحاني جاڭعىرۋ» باعدارلاماسىندا جيناقتالعان تاپسىرمالارىنا نەگىزدەلگەن. كوپتەگەن ماڭىزدى الەۋمەتتىك باستامالار جۇزەگە اسىرىلدى. باستى ماقسات - بالالارعا، ولاردىڭ ينتەللەكتۋالدى، فيزيكالىق، رۋحاني جانە ادامگەرشىلىك دامۋىنا جاعداي جاساۋ. كەلەسى جىلى جوبا ەلباسى جاريالاعان «جاستار جىلىنىڭ» اياسىندا جالعاسادى، - دەدى سپيكەر.
جوبانى جۇزەگە اسىرۋعا 4 ملرد. تەڭگە ءبولىندى. بۇدان باسقا دەمەۋشىلىك كومەكتەر تارتىلدى. ناتيجەسىندە، ازعانا ۋاقىتتا اقتوبە وبلىسىندا ەلىمىزدەگى العاشقى جىل بويى «كۇنشۋاق» ساۋىقتىرۋ ينكليۋزيۆتى لاگەرى، بيۋدجەتتەن تىس قاراجاتقا اۋتيزممەن اۋىراتىن بالالارعا ارنالعان ورتالىق، تۇزەتۋ بالاباقشاسى، مۇمكىندىگى شەكتەۋلى بالالارعا ارنالعان وڭالتۋ ورتالىعى، جىل بويى «اسەم» وقۋ-تانىمدىق ورتالىعى اشىلدى.
بۇدان باسقا، 36 مەكتەپكە دەيىنگى ۇيىم، 177 سپورتتىق جانە ويىن الاڭدارى، حوككەي كورتى، جازعى اكۆاپارك، مۇز ايدىنى، تەننيس ورتالىعى پايدالانۋعا بەرىلىپ، جەڭىل اتلەتيكالىق مانەجدىڭ قۇرىلىسى جالعاسۋدا.
25 IT-كلاسس اشىلىپ، مەكتەپتەر 24 3D-پرينتەرمەن، 27 روبوت تەحنيكاسىنىڭ جيىنتىعىمەن، 28 ەكسكليۋزيۆتى فوكۋس-پروەكتورمەن جابدىقتالدى.
وبلىستىڭ 120 مىڭ وقۋشىسى جازعى دەمالىستارمەن قامتىلدى، ونىڭ ىشىندە 17 مىڭ بالا قازاقستاننىڭ كيەلى جانە كورىكتى جەرلەرىنە تۋريستىك ساپارلارعا شىعىپ، 11 مىڭنان استام دارىندى بالا رەسەي، تاتارستان، جۇڭگو، اقش جانە مالايزيا ەلدەرىندەگى ەڭ جاقسى جازعى دەمالىس جانە ءبىلىم بەرۋ لاگەرلەرىندە بولدى.
جوبانىڭ باستى ماقساتى جەتىم بالالار مەن اتا-اناسىنىڭ قامقورلىعىنسىز قالعان بالالارعا تولىق قولداۋ كورسەتۋ بولدى. ناتيجەسىندە جىل باسىنان بەرى كاسىپورىندار مەن مەملەكەتتىك ورگاندار بالالاردىڭ قتقجب-داعى جيناق ەسەپشوتتارىن 80 ملن. تەڭگەگە تولىقتىردى. 81 جەتىم بالاعا جاڭا پاتەرلەر مەن ۇيلەردىڭ كىلتتەرى تابىستالدى.
