فرانسيادا توتەنشە جاعداي ەنگىزىلۋى مۇمكىن. پاريج، تۋلۋز سياقتى قالالاردىڭ تۇرعىندارى جاپپاي الاڭعا شىعىپ، نارازىلىق تانىتۋدا. قالانىڭ استان-كەستەنى شىققان. ماشينالار ورتەنىپ جاتىر، دۇكەندەر جابىق، جابىلىپ ۇلگەرمەگەندەرى قيراپ جاتىر. كوك تۇتىنگە ورانعان ءپاريجدىڭ جاعدايى قيىن. الداعى ۋاقىتتا سەناتتا ۇلكەن جيىن بولماق. وندا ىشكى ىستەر ءمينيسترى مەن مەملەكەتتىك حاتشى ءسوز الماقشى. "فرانسۋزدار نەگە ءبۇلىندى؟" دەگەن زاڭدى سۇراق تۋىندايدى. ازىرگە قولدا بار 3 ءتۇرلى نۇسقانى وقىرمان نازارىنا ۇسىنايىق:
ءبىرىنشى نۇسقا – حالىق «سابىر ءتۇبى – سارى التىن» دەۋدەن جالىقتى. وسى ۋاقىتقا دەيىن كوپ نارسەگە كوز جۇمىپ كەلگەن فرانسۋزدار مەملەكەتتىك ساياساتقا تۇسىنىستىكپەن قاراۋدان شارشادى. جانارماي باعاسىنىڭ كوتەرىلۋى جىعىلعان جۇدىرىق بولدى. اشۋ مەن ىزاعا بۋلىققان فرانسۋزدار تۇرعىندارعا قولايلى جاعداي جاسامايتىن مەملەكەتتىك ساياساتقا وسىلايشا نارازىلىق بىلدىرۋدە.
ەكىنشى نۇسقا – بۇل ەندى كورشىلەرىمىزدىڭ قوسقان ۇلەسى قاتتى سەزىلەتىن نۇسقا. رەسەيلىك ب ا ق فرانسۋزداردىڭ ارەكەتى ۇيىمداستىرىلعانىن ەرەكشە اتاپ ءوتىپ، «مايداندىق» سيپاتتىڭ باسىم ەكەندىگىن قايتالاپ ايتۋدا. الەۋمەتتىك جەلى ارقىلى بىر-بىرىمەن بايلانىستا بولعان كوتەرىلىسشىلەردىڭ بىرلىگى، نارازىلىق شاراسىنىڭ «سارى جيلەتتەر» (فر. Mouvement des gilets jaunes-رەد.) دەگەن اتاۋعا يە بولۋى، بەت-الپەتتەرىن جاسىرا بىلۋلەرى، اقسيعان ازۋلى تىستەر قۇساپ تۇيىلگەن جۇدىرىقتىڭ كوتەرىلىستىڭ سيمۆولىنا اينالۋى – مۇنىڭ ءبارى مىسىردان باستاۋ الىپ، ۋكراينادا جالعاسقان «ءتۇرلى-تۇستى توڭكەرىستەرگە» ءتان دۇنيە. "دەمەك ۇيىمداستىرۋشىلار دا، قارجىلاندىرۋشىلار دا بار دەگەن سوزگە نەگىز بار"،- دەيدى رەسەيلىك ارىپتەستەر. جاۋابىن دا اشىق ايتۋدان تايسالماپتى. "بالەنىڭ ءبارى – اقش-تان، فرانسۋزداردىڭ بۇلىنۋىنە دە سولار سەبەپكەر" دەپ ايتادى. فرانسيانىڭ اقش-قا قارسى جاساقتالعان «ەۋروپالىق كواليسيانىڭ» بەلدى مۇشەسى ەكەندىگىن ايتا وتىرا، "وسى كوتەرىلىس ارقىلى ۆاشينگتون ءپاريجدىڭ ابىرويىنا نۇقسان كەلتىرگىسى كەلەدى"،- دەيدى.
ءۇشىنشى نۇسقا – قيت ەتسە بولدى، قارسىلىق تانىتاتىن كوشە بەلسەندىلىگى – فرانسيانىڭ ساياسي ءومىرىنىڭ ءداستۇرلى اجىراماس بولشەگى بولىپ تابىلادى. ونىڭ ارتىندا «كوشەگە» جاۋاپ بەرەتىن قوعامدىق ۇيىمدار (كاسىبي وداقتار نەگىزىنەن-رەد.) جاتىر. دەمەك، بيلىك پەن ۇيىمدار اراسىندا بەلگىلى ءبىر كەلىسىم بار. پوليسيامەن قاقتىعىسىپ، تەمىر تۇلپار ورتەپ جاتقاندار راديكالداردىڭ ءوز-وزىن قالپىنا كەلتىرە الاتىن فرانسۋز جۇيەسىنىڭ مەحانيزمى.
