جۋىردا دەنساۋلىق ساقتاۋ مينيسترلىگى 16 جاستاعى قىزدارعا اتا-اناسىنىڭ كەلىسىمىنسىز تۇسىك جاساتۋعا رۇقسات بەرۋدى ۇسىنعان بولاتىن. دەنساۋلىق ساقتاۋ ءمينيسترى ەلجان ءبىرتانوۆ قوعامدا قىزۋ تالقىعا تۇسكەن تۇسىك جاساتۋ ماسەلەسىنە قاتىستى تۇسىنىكتەمە بەردى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ. 

16 جاستاعى قىزدارعا اتا-اناسىنىڭ كەلىسىمىنسىز تۇسىك جاساتۋعا رۇقسات بەرۋ نورماسىن حالىق دەنساۋلىعى جانە دەنساۋلىق ساقتاۋ جۇيەسى تۋرالى كودەكستىڭ جاڭا رەداكسياسىنا ەنگىزۋ ۇسىنىلىپ وتىر.  

"مەنىڭشە، ءبىزدىڭ بالالارىمىز 16 جاسىندا ءبىراز جاۋاپكەرشىلىكتى ءوز موينىنا الادى. ولاردىڭ مەديسينالىق كومەكتىڭ كەز كەلگەن ءتۇرىن الۋعا قۇقىعى بولۋى كەرەك. ياعني، ءقازىر ءبىز ولاردى بارلىق جاعىنان شەكتەپ وتىرمىز"، — دەدى مينيستر ۇكىمەت كۋلۋارىندا. 

ءبىرتانوۆ قوعام، ەڭ الدىمەن، "ءبىز ءوز بالالارىمىزدى قانشالىقتى دۇرىس تاربيەلەپ جاتىرمىز؟" دەگەن سۇراقتى وزىنە قويۋى كەرەك دەيدى.  

"ەگەر بالالارىمىز جىنىستىق قاتىناسقا ءتۇسۋ تۋرالى شەشىمدى ءبىزسىز-اق قابىلداپ جاتسا، قالعانىنا ءبىزدىڭ پىكىرىمىز قاجەت دەپ ويلايسىزدار ما؟ اركىم وسى ساۋالدى وزىنە قويۋى ءتيىس. تالقىلاۋ كەرەك، جۇرتتىڭ تالقىلاپ جاتقانى قۋانتادى. ءالى ۋاقىت بار"، — دەدى مينيستر. 

ول دەنساۋلىق تۋرالى مۇلدە جاڭا كودەكس ازىرلەنىپ جاتقانىن، تيىسىنشە ءتۇسىپ جاتقان يدەيالار كوپ ەكەنىن اتاپ ءوتتى. 

"جوسپارعا سايكەس، كەلەسى جىلدىڭ كوكتەمىندە ءبىز جاڭا جوبانى تانىستىرۋىمىز كەرەك. ءقازىر يدەيا وتە كوپ، سونىڭ ىشىندە راديكالدى، ماسەلەن، قوعامدىق ورىنداردا تەمەكى تارتۋعا تىيىم سالۋ، ءوز دەنساۋلىعى ءۇشىن اكىمشىلىك جاۋاپكەرشىلىك ەنگىزۋ سەكىلدى ۇسىنىستار بار"، — دەدى ءبىرتانوۆ.