بۇل تۋرالى «نۇر وتان» پارتياسى ءتوراعاسىنىڭ ءبىرىنشى ورىنباسارى ءوزىنىڭ Facebook-تەگى پاراقشاسىندا جازعان.
وندا ماۋلەن اشىمبايەۆ ەندى ساناۋلى كۇندەردەن كەيىن ەلدىگىمىزدىڭ بويتۇمارىنداي بولعان تاۋەلسىزدىك كۇنىن تويلايتىنىمىزعا نازار اۋدارىپ، بۇل مەرەكەنىڭ حالقىمىز ءۇشىن اسا قاسيەتتى ءارى قاستەرلى ەكەنىن ايتقان.
«ءبىز ازاتتىقتىڭ ارقاسىندا الەمدىك قاۋىمداستىققا ەتەنە ەنىپ، ونىڭ تولىق مۇشەسى اتاندىق. ەشكىمگە جالتاقتاماي، ەرتەڭىمىزدى ءوزىمىز باعامدايتىن، ساياساتىمىزدى ۇلتتىق مۇددەگە ساي جۇرگىزەتىن دەڭگەيگە جەتتىك. ەلباسىمىزدىڭ دانا باسشىلىعىمەن تاۋەلسىزدىك جىلدارىندا ەل دامۋىنىڭ جاڭا ەكونوميكالىق جانە ساياسي نەگىزى قالىپتاستى. حالىقتىڭ ءال-اۋقاتى مەن الەمدىك دەڭگەيدەگى ابىروي-بەدەلىمىز دە ايتارلىقتاي ارتا ءتۇستى. سوندىقتان تاۋەلسىزدىك كۇنىن اتاپ وتۋدە وتانعا دەگەن ماحابباتتىڭ جارقىن ۇلگىسىن كورسەتۋ ءار قازاقستاندىقتىڭ ازاماتتىق بورىشى بولۋى ءتيىس»، – دەلىنگەن جازبادا.
سونىمەن قاتار «نۇر وتان» پارتياسى ءتوراعاسىنىڭ ءبىرىنشى ورىنباسارى تاۋەلسىزدىك كۇنىن لايىقتى دەڭگەيدە تويلاۋ ءۇشىن مەملەكەتتىك دەڭگەيدەگى مەرەكەلىك ىس-شارالارمەن شەكتەلمەي، ءار ادام از دا بولسا ءوز ۇلەسىن قوسۋعا تىرىسۋى قاجەت ەكەنىن ايتقان.
«وسىعان وراي بارشا جەكە كاسىپكەرلەر مەن كاسىپورىنداردى جانە حالىققا قىزمەت كورسەتىپ وتىرعان جەكە ۇيىمداردى تاۋەلسىزدىك كۇنىن ناعىز ەلدىكتىڭ، ەگەمەندىكتىڭ مەرەكەسى رەتىندە اتاپ وتۋگە شاقىرامىز. ياعني، مەرەكە كۇندەرى سورەلەر مەملەكەتتىك رامىزدەردىڭ تۇسىمەن بەزەندىرىلىپ، قىزمەتكەرلەر ۇلتتىق ناقىشقا ساي كيىمدەر كيسە، ساۋدا ورىندارىندا ارنايى اكسيالار مەن جەڭىلدىكتەر سياقتى بىرەگەي باستامالار قولعا الىنسا مەرەكەنىڭ ماڭىزى مەن ءمانى ودان ءارى ارتا تۇسەتىنى انىق. قالاي دەسەك تە، بۇل كۇندەرى ءار قازاقستاندىق مەرەكەلىك كوڭىل-كۇيگە بولەنىپ، بارلىق قوعامدىق ورىنداردا تاۋەلسىزدىكتىڭ ءمانى مەن ماڭىزى ايقىن سەزىلىپ تۇرۋى ءتيىس. سول كەزدە ءبىز اتا-بابامىز اڭساعان ازاتتىقتىڭ باعاسىن پايىمداپ، جاڭا قازاقستان تاريحىنداعى ەڭ ۇلىق كۇنگە دەگەن قۇرمەتىمىزدى كورسەتەر ەدىك»، – دەيدى ءوز جازباسىندا ماۋلەن اشىمبايەۆ.
سونداي-اق ول بۇل باستاماعا ءار قازاقستاندىق ءبىر كىسىدەي اتسالىسىپ، ءوز ۇلەسىن قوسسا، تاۋەلسىزدىك كۇنىنىڭ شىن مانىندە جالپىۇلتتىق جانە ءار قازاقستاندىقتىڭ اسىعا كۇتەتىن ەڭ باستى مەرەكەسىنە اينالاتىنىنا كامىل سەنەتىنىن ايتقان.
