قازاقستان رەسپۋبليكاسىنىڭ تۇڭعىش پرەزيدەنتى كۇنى قارساڭىندا اقتاۋدا كوشى-قون قىزمەتتەرىن كورسەتۋ ورتالىعى اشىلدى، دەپ حابارلايدى qamshy.kz وبلىس اكىمدىگىنىڭ باسپا ءسوز قىزمەتىنە سىلتەمە جاساپ.

سالتاناتتى شاراعا قاتىسقان وبلىس اكىمى ەرالى توعجانوۆ جينالعانداردى تۇڭعىش پرەزيدەنت كۇنىمەن قۇتتىقتاپ، ورتالىق جۇمىسىنا ساتتىلىك تىلەدى. جاڭا ورتالىقتىڭ جالپى كولەمى 3372،7 شارشى مەتر، 4 قاباتتان تۇرادى. كوشى-قون قىزمەتتەرىن كورسەتۋ ورتالىعى "ءبىر تەرەزە" قاعيداتى بويىنشا جۇمىس ىستەمەك.

مۇندا شەتەلدىك ازاماتتار مەديسينالىق تەكسەرۋدەن ءوتىپ، جسن الا الادى، بارلىق قىزمەت تۇرلەرىن ۇسىنۋ ءۇشىن مەملەكەتتىك باج سالىعىن تولەي الادى، ساقتاندىرۋ ءپوليسىن راسىمدەپ، قازاقستان رەسپۋبليكاسىنداعى ەڭبەك قىزمەتىنە رۇقسات الۋ ءۇشىن قاجەتتى داكتيلوسكوپيالىق تىركەۋدەن وتە الادى. سونداي-اق كورسەتىلەتىن قىزمەتتەر قاتارىنا شەتەلدىكتەردى تىركەۋ، ۆيزالىق قولداۋ ماسەلەلەرىن شەشۋ، تۇراقتى تۇرۋعا قالدىرۋ جانە ازاماتتىق الۋ ماسەلەلەرى كىرەدى.

"ەلباسىنىڭ جولداۋىنا سايكەس، وبلىس ورتالىقتارىندا كوشى-قون قىزمەتتەرىن كورسەتۋ ورتالىعىن قۇرۋ قاجەتتىگى باستى ماقسات بولاتىن. سوندىقتان وبلىس اۋماعىنا كەلگەن شەتەل ازاماتتارىن ءتيىستى تىركەۋدى قامتاماسىز ەتۋ جانە ولاردىڭ ايماقتا بولۋىن باقىلاۋ، قىزمەت كورسەتۋ ءۇشىن قولايلى جاعداي جاساۋ ءۇشىن ءبىز زاماناۋي جابدىقتالعان ۇلكەن زالى بار كوشى-قون قىزمەتى ورتالىعىن اشتىق. بۇل ورتالىق مەملەكەتتىك قىزمەت كورسەتۋ ساپاسىن جاقسارتۋعا، سونداي-اق ازاماتتاردىڭ كۇتۋ ۋاقىتىن قىسقارتۋعا ىقپال ەتەدى»،-دەدى ەرالى توعجانوۆ.

بۇدان باسقا ورتالىقتا پوليسيا ۇسىناتىن بارلىق مەملەكەتتىك قىزمەتتەر كورسەتىلەدى: قارۋدى تىركەۋ جانە ساقتاۋعا رۇقسات بەرۋ، گاز جابدىعىن ورناتۋعا رۇقسات بەرۋ، اكىمشىلىك ايىپپۇلداردى تولەۋ جانە كۇزەت قىزمەتى ءۇشىن ليسەنزيا بەرۋ.