پرەزيدەنت نۇرسۇلتان نازاربايەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن جاقسارتۋ» اتتى حالىققا ارناعان جولداۋىندا «سىبايلاس جەمقورلىقپەن بەلسەندى كۇرەس جالعاساتىن بولادى... جۇرتتىڭ جانە بيزنەس قوعامداستىعىنىڭ نارازىلىعىن تۋعىزاتىن باسقا دا باعىتتار بويىنشا ءتيىستى رەتتەۋ جۇمىستارىن جۇرگىزۋ كەرەك. جالپى، 2019 جىلى كورسەتىلەتىن مەملەكەتتىك قىزمەتتەردىڭ 80 پايىزى، ال 2020 جىلى كەمىندە 90 پايىزى ەلەكتروندى فورماتقا كوشىرىلۋگە ءتيىس» دەپ اتاپ كورسەتكەنى بەلگىلى.

راسىندا ەلەكتروندى قىزمەت قوعامداعى سىبىيلاس جەمقورلىقتى تۇبىرىمەن جويادى. مۇنىڭ ءتيىمدى جاعى وتە كوپ. بارلىعى دا ەلەكتروندى قىزمەت ارقىلى ءوتىپ، جۇزەگە اساتىن بولعان سوڭ، ادامداردىڭ دا بيلىككە، جالپى اتقارۋشى قىزمەتتە وتىرعاندار شەنەۋنىكتەرگە دەگەن سەنىمى كۇشەيەدى.

ال بۇل ورايدا پرەزيدەنت تاپسىرماسىن ورىنداۋ ءۇشىن قانداي شارالار جۇزەگە اسىرىلىپ جاتىر؟ بۇل ورايدا ەلىمىزدە «2015-2025 جىلدارعا ارنالعان  سىبايلاس جەمقورلىققا قارسى ستراتەگياسى» قابىلدانعان. سونداي-اق  قوعامنىڭ، مەملەكەتتىڭ دامۋىنا زور زالالىن تيگىزىپ وتىرعان جەمقورلىقتى جويۋ جولىندا زاڭدىق قۇقىقتىق قۇجاتتار قابىلدانىپ، جۇمىس ىستەپ تۇر. راسىندا دا، جەمقورلىق دەگەن – جەگى قۇرت. ال مۇنى تۇبىرىمەن قۇرتۋ ءۇشىن ەلىمىزدە پرەزيدەنت تاپسىرماسىنا وراي بۇگىندە جۇيەلى جۇمىستار جۇرگىزىلىپ جاتىر.

قازاقستان رەسپۋبليكاسى  مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆتىڭ سوزىنە قاراعاندا،  بۇگىنگى كۇنى ەلىمىزدە كورسەتىلەتىن مەملەكەتتىك قىزمەتتىڭ 78  پايىزى ەلەكتروندى فورماتا كوشكەن. پرەزيدەنت نۇرسۇلتان نازاربايەۆ اتاپ كورسەتكەندەي. الداعى ەكى جىلدا بۇل كورسەتكىشتى 90 پايىزعا جەتكىزۋ كوزدەلىپ وتىر. ارينە جەمقورلىقتى جويۋدا ەلەكتروندى قىزمەتتىڭ جاعىمدى جاعى كوپ. ويتكەنى بۇل جەردە «بارماق باستى، كوز قىستى بولمايدى». ءقازىردىڭ وزىندە قازاقستان جەمقورلىقتىڭ الدىن الۋدا ءوز تاجىريبەسى جانە وزىندىك ۇلگىسى بار مەملەكەت. بۇۇ-نىڭ رەيتينگىسىندە قازاقستان ەلەكتروندى ۇكىمەتتى دامىتۋ جاعىنان  الەۋەتتى  ەلدەردىڭ قاتارىندا تۇرعانىن ايتپاي كەتپەۋگە بولمايدى.  

ءبىزدىڭ قوعامداعى قازىرگى كورىنىسكە قاراساق، كوپ جاعدايدا ورىن العان جەمقورلىق ارەكەت ءۇشىن مەكەمەدەگى نەمەسە مينيستەرلىكتەگى ءبىرىنشى باسشىلار جاۋاپ بەرمەيتىن جاعدايلار ورىن الىپ جاتادى. سوندىقتان الداعى ۋاقىتتا ءبىرىنشى باسشىنىڭ جاۋاپكەرشىلىگى مىندەتتى تۇردە كۇشەيتىلەدى. سوندىقتان دا پرەزيدەنت نازاربايەۆ حالىققا ارناعان جولداۋىندا الداعى ەكى جىلدا مەملەكەتتىك قىزمەتتىڭ 90 پايىزىن ەلەكتروندى فورماتقا كوشىرۋ تۋرالى تاپسىرما بەرىپ وتىر. دەمەك، بۇل سىبايلاس جەمقورلىقتىڭ الدىن الۋدىڭ ەڭ ءتيىمدى جولى ەكەنىن ۇعىنۋدىڭ ماڭىزى زور.

ەركىن قالدان